17
पाप माहने गिरेक आर छमा
1 एक दिन ईसु आपन चेला गिला के कहलक, “ई संसारे पाप करेक तेहें उसकायेक काथा हमेसा होते रही, लेकिन हाय ऊ मानुस के, जे पाप करेक तेहें उसकायला। 2 जे एसन छोटे लोग गिला लेक केकोउ एक झन के पाप करेक तेहें उसकायला, उकर तेहें बेस होतक, कि उके घेंचाय जाँता केर चाक्का के बांइध कहन समुन्दरे फेंइक देल जातक। 3 चेंटगार रहा! जदि तोर भाई, गलत काम करेला तो उके सुधरावा, आर जदि ऊ उकर लेक पोस्तायला,a होले उके छमा कर। 4 जदि ऊ गोटा दिने सात धंव तोर गुनाह करेला, आर ऊ सातो धंव तोर पासे आय कहन कहेला, मोयँ आपन गुनाह लेक पोस्तावँला तो उके छमा कर।”
बिसास केर काम
5 तखन प्रेरित गिला परभु के कहलयँ, “हामरेक बिसास टाके बाढ़ाव।” 6 परभु उमने के कहलक, “जदि तोहरेक बिसास टा सेरसों केर मंजी बराबइर होतक, तो तोहरे ई तूंत गाछ के कहे पारतोला, कि जेइर मेसा उखइड़ कहन समुन्दरे चइल जा, तो ऊ तोहरेक काथा के मानतक।”
बेस धांगर केर काम
7 “तोहरेक मइधे के एसन आहा, कि जेकर धांगर खेते हार जोततक, चाहे भेड़ी गिला के चारातक, आर जखन ऊ खेत लेक घर आई, तो का तोयँ उके कहबे, ‘आव चाँड़े-चुँड़ू भात खाय बइसिन? 8 नाहीं, बरन्चो तोयँ धांगर टाके कहबे, कि पहिल मोर तेहें भात बाटिन, आर जखन तक मोयँ नाइ खामूँ-पीमूँ, तखन तक डाँड़ा बाँइन्ध कहन मोर सेबा-सुसार करिन, तेकर बादे तोयों खाबे-पीबे।’ 9 जखन धांगर टा तोर कहल मोताबिक काम करी, तो का तोयँ उके साबासी देबे? 10 एहे रकमे तोहरोउ आड़हाल काम के पूरा करल बादे कहा, हामरे धांगर हेकी, हामरे तो ओहे काम कइर आही जेटा हामरे के करेक चाही।”
ईसु दस टा ठूंठा रोगी के बेस करलक
11 आरो एसन होलक कि ऊ यरुसालेम जात खने, सामरिया आर गलिल प्रदेस होय कहन जात रहे। 12 जखन ऊ एक टा गाँवे ढुकत रहे तो दसटा ठूंठा रोगी गिला के भेंटालक। 13 उमने दूर लेकेइ दोमे आंटे हाँकालयँ, “ए ईसु, ए मालिक, हामरेक ऊपरे दया करिन!” 14 सेखन ईसु उमने के देइख कहन कहलक, “जावा, आर आपन के याजक गिला के देखावा।” bआर उमने जाते के डहरे बेस होय गेलयँ। 15 तखन उमनेक लेक एक झन ई देखलक कि मोयँ बेस होय गेलँ, ऊ आंटे-आंटे परमेसर केर बड़ाई करत के घुरलक, 16 आर ऊ ईसु केर गोड़े गिर कहन उकर धन्यबाद करे लागलक, ऊ लोग टा सामरिया प्रदेस केर रहे। 17 तखन ईसु कहलक, “का दसो झन बेस नाइ होलयँ, तो आरो नो झन गिला काहाँ गेलयँ? 18 का ई परदेसी लोग टाके छोइड़ के आरो केउ नाइ बाहरालयँ कि घुइर कहन परमेसर केर धन्यबाद देतयँ?” 19 तखन ऊ उके कहलक, “उइठ कहन चइल जा, तोर बिसास टाइ तोके बेस कइर आहे।”
परमेसर केर राइज केर आयेक
20 जखन फरीसी गिला ईसु के पुछलयँ कि परमेसर केर राइज कबे आई? ऊ उमन के जबाब देलक, “परमेसर केर राइज देइख नजइरे नाइ आई। 21 केउ नाइ कहे पारबयँ, ‘कि देखा, हियाँ आहे, चाहे हुवाँ आहे।’ काहेकि परमेसर केर राइज तोहरेक मांझे आहे।”
22 फिन ऊ चेला गिला के कहलक, “एसन दिन आई, जेकर माहने तोहरे मानुसेक बेटा केर दिने जदि एको दिन के देखेक खोजबा, किन्तु देखे नाइ पाबा। 23 लोग तोहरे के कहबयँ, ‘देखा, हुवाँ आहे! चाहे हियाँ आहे! किन्तु तोहरे हुवाँ ना जाबा, आर ना तो उकर पेछुवे कुदबा’। 24 काहेकि जेसन बिजली आकास केर एक टा कोना लेक दोसर कोना तक चमकेला, ओसनेइ मानुस केर बेटाउ आपन दिने दिस्तार होई। 25 किन्तु पहिल उके दोमे दुःख उठाय होई, आर ई जुगेक लोग गिला उके बेकार समझोबयँ। 26 जेसन नूह केर परियाय होय रहे, ओसनेइ मोयँ मानुसेक बेटा परगट होयेक दिनोउ होई। 27 जे दिन तक नूह नाउकाय नाइ चेढ़लक, सेइ दिन तक लोग गिला खात-पीयोत रहयँ, आर सादी-बिहा करत रहयँ। सेइ तखन पानी डूबा आय कहन ऊ सउब के नस्टो कइर देलक।c 28 आरो जेसन लूत केर दिने होय रहे कि लोग गिला खात-पीयोत रहयँ, लेन-देन करत रहयँ, गाछ-बिरिछ लगात रहयँ, आर घर बनात रहयँ, 29 किन्तु जे दिन लूत सादोम नगर लेक बाहरालक, सेइ दिने आकास लेक आइग आर गंधक केर बइरसा होलक आर सउब के नस्टो कइर देलक।d 30 जे दिन मानुसेक बेटा परगट होई, सेइ दिने एहे रकमेइ होई।”
31 “ऊ दिन जे छत ऊपरे आहे, आर उकर सामान घर भीतरे आहे, तो ऊ उटा के आनेक तेहें हेंठे ना उतरुक, आर ओसनेइ जे खेते आहे, ऊ पेछु बाटे ना घुरुक। 32 लूत केर घरइया के मने करा!e 33 जे गिला आपन प्रान के बांचायेक चाहबँय, उमने प्रान के गावांय देबयँ, आर जे गिला आपन प्रान के गावांबयँ उमने उके बांचाय लेबयँ। 34 मोयँ तोहरे के कहँला, कि उ राइते एक टा खाइटे दुई झन सुतल रहबयँ, तो एक झन के लेजल जाई आर दोसर के छोइड़ देल जाई। 35 आरो दुई टा बेटी छुवा जाँताए पिसत रहबयँ, सेहे खने एक झन के ले लेल जाई आर दोसर के छोइड़ देल जाई। 36 [दुई झन खेते काम करत रहबँय, तो एक झन के ले लेवल जाई आर दोसर के छोइड़ देवल जाई।f]” 37 ई सुइन कहन चेला गिला उके पुछलयँ, “ए परभु, ई सउब काहाँ होई?” तखन ईसु उमने के कहलक, “जाहाँ लोथg आहे, हुवाँ गिधी गिलाउ जामा होबयँ।”