16
चालाक भांड़ारी केर कोहनी
1 फिन ईसु आपन चेला गिला के कहलक, “एक टा धनिमान लोग केर भांड़ारीa रहे। जखन लोग गिला ऊ भांड़ारी केर ऊपरे दोस लागाय कहन मालिक के कहलयँ, ‘तोर भांड़ारी टा, तोर सउब सम्पति के उड़ाय देला।’ 2 तखन मालिक उके डाइक कहन कहलक, ‘ई का हेके! जे तोर बारे मोयँ सुनतँ? तोयँ आपन भांड़ारी गिरी केर हिसाब मोके दे देहिन। काहेकि एधाँव लेक तोयँ आरो मोर भांड़ारी नाइ रहे पारबे।’ 3 सेखन भांड़ारी टा मने-मने सोंचे लागलक, ‘एबार मोयँ का करमूँ? काहेकि मोर मालिक एबार भांड़ारी केर काम लेक मोके निकलाय दे तेहे। माटी काटे केर तो ताकतो नेखे, आर भीख माँगेक तेहें मोके लाज लागेला। 4 एबार मोयँ समइझ गेलों कि मोके का करेक चाही, कोनो काम करमूँ, तबे गानी जखन मालिक भांड़ारी काम लेक मोके हाटाय देइ तखन लोग गिला मोके आपन घरे लेगाबयँ आर माइन करबयँ।’
5 ऊ आपन मालिक केर रीन लेवइया गिला के एकुक झन कइर कहन डाकलक, आर ऊ पहिलेक टाके पूछलक कि ‘तोयँ मोर मालिक केर कतना रीन धारिसला?’ 6 तखन ऊ कहलक ‘एक सौ मन तेल’ सेखन ऊ उके कहलक, ‘आपन खाता-बही ले लेहिन आर बइस कहन तुरंत पचास मन तेल लिख देहिन।’ 7 फिन ऊ दोसर टाके पूछलक, ‘तोयँ मोर मालिक केर कतना रीन धारिसला?’ ऊ कहलक, ‘एक सौ मन गहम’ तखन ऊ उके कहलक, ‘तोयँ आपन खाता-बही के ले लेहिन आर बइस कहन तुरंत अस्सी मन गहम लिख देहिन।’
8 तखन मालिक टा ऊ बयमान भांड़ारी केर प्रसंसा करलक, काहेकि ऊ बेजाइन हुँसयारी केर काम करलक। काहेकि संसारिक लोग गिला आपन जुगेक लोग केर संगे बेबहार करेक माहने आलो माहने रहइया लोग गिला लेक बेसी हुँसयार आहयँ। 9 मोयँ तोहरे के कहँला, कि ई संसार केर धन-सम्पति केर दाराय आपन तेहें संगी बनावा। काहेकि जखन धन-दौलत सिराय जाई, तखन उमने तोहरे के सरगे स्वागत करबयँ। 10 जे छोटे-मोटे जिनिसे बिसास लाइख रहेला, ऊ ढेइर जिनिस माहनोउ बिसास लाइख रही, आर जे छोटे-मोटे जिनिसे बयमानी करेला, ऊ ढेइर जिनिस माहनोउ बयमानी करी। 11 एहे निहारे जदि तोहरे संसारिक धन-सम्पतिये भोरसा लाइख नाइ रहबा, तो तोहरे के, के टा आसल धन-सम्पति के जिमा देई? 12 आर जदि तोहरे परेक धने बिसास लाइख नाइ रहबा, तो जेटा तोहरेक निजेक हेके, उटाके के टा तोहरे के देई?”
13 “केउ धांगर दुई टा मालिक केर सेबा-सुसार नाइ करे पारी, काहेकि ऊ एक झन के घिनाइ, आर दोसर के प्रेम करी, चाहे एक झन केर संगे मिलल रही आर दोसर के बेकार समझी। तोहरे परमेसर आर धन दुइयो केर सेबा-सुसार करे नाइ पारबा।”
ईसु केर उपदेस
14 फरीसी गिला, ई सउब बात के सुइन कहन ईसु केर माजाक उड़ाय लागलयँ, काहेकि उमने धन केर लोभी रहयँ। 15 तखन ईसु उमन के कहलक, “तोहरे तो लोग गिला केर सामने आपन के धरमी बनावाला, किन्तु परमेसर तोहरे केर मनेक बिचार के जानेला, काहेकि जेटा मानुस केर नजइरे कीमती आहे, ऊ परमेसर केर नजइरे बेकार आहे।”
16 मूसा भबिस्यबक्ता केर धरम-बिधि आरो भबिस्यबक्ता गिला केर संदेस योहन बपतिस्मादाता तक सुनाल जात रहे। तेकर बाद लेक परमेसर केर राइज केर बारे सुसमाचर सुनाल जा तेहे, आर सोभे गिला बलपुर्वक परमेसर केर राइजे सामातहयँ। 17 धरती आर आकास घसइक जाई, किन्तु धरम-विधि केर कहल काथा एको तनिको नाइ घसकी, सउब पूरा होई।
18 “जे गिला आपन घरइया के छोइड़ कहन दोसर संगे बिहा करेला, तो ऊ बेभिचारb करेला, आर जे गिला दोसर केर छोड़ल घरइया के बिहा करेला तो उहो बेभिचार करेला।”
धनिमान आर गरीब लाजर
19 “एक टा धनिमान लोग रहे, जे दोमे दाम केर बेगनी रंगेक लुगा पिन्धत रहे, आर ऊ रोजे मोज-मस्ति आर धूम-धाम से रहत रहे। 20 सेइ धनिमान केर घरेक बेड़ केर दुरा ठीन आनगाय एक टा लाजर नामेक गरीब भीक माँगा के जे गोटा गात घावे भरल रहे, उके लाइन कहन बइसाय देत रहयँ। 21 आर ऊ धनिमान केर टेबुल लेक फेंकल जुठा पातेइर लेक आपन भूख मेटाय चाहत रहे, हियाँ तक कि उकर घाव के कुकुर चाटत रहयँ। 22 एक दिन ऊ भीक मांगा टा मोइर गेलक, तो सरग दूत गिला उके ले जाय कहन सरगे आब्राहम केर पासे सटाय के बइसाय देलयँ। फिन ऊ धनिमान लोग टाउ मोरलक, आर उके तोइप देलयँ। 23 नरक माहने तड़पत के जखन ऊ ऊपर बाटे ताकलक, तो दोमे धूरे लाजर के अब्राहम केर संगे सइट के बइसल देखे पालक। 24 तखन ऊ दोमे आंटे डाकलक आर कहलक, ‘ए बाप अब्राहम, मोर ऊपरे दया करिन! आर लाजर के पइठाय देहिन, ताकि ऊ आपन आगा आँगुर के पानिये भींजाय कहन मोर जिभ टाके ठांड़ा करुक, काहेकि मोयँ ई नरके आइग केर भाठाय तड़पोतँ।’ 25 किन्तु अब्राहम उके कहलक, ‘ए बेटा, मने करिन, कि तोयँ आपन जिन्दगी माहने बढ़ियाँ जिनिस के पाय चुइक हिस, आर ओसनेइ गरीब लाजर खराब जिनिस के पाय आहे, किन्तु ऊ एबार हियाँ सूख-सान्ति पा तेहे आर तोयँ दुःखे तड़पो तिहिस। 26 आर एतनाइ निहि, हामरेक आर तोहरेक मांझे एक टा एसन बिराट गाढ़ा बनाल जाय आहे कि जे हियाँ लेक उ पार तोहरेक ठीन जायेक चाहबयँ, उमने जाय नाइ पारबयँ, आर ना तो केउ हुवाँ लेक इ पार हामरेक ठीन आय पारबयँ।’ 27 तखन धनिमान टा उके कहलक, ‘ए बा, तबे दया कइर कहन उके मोर बापेक घर पइठाय देहिन, 28 काहेकि मोर पाँच टा भाई आहयँ, ऊ उमने के जाय कहन इटाक बारे चेतावनी देउक, ताकि उमन एसन कलपेकc जायगाय ना आउन का।’ 29 अब्राहम उके कहलक, ‘उमनेक ताहाँ तो मूसा भबिस्यबक्त आर भबिस्यबक्ता गिला केर शास्त्र माहने लिखल आहे, उटा के उमन पढ़ून आर जानून।’ 30 ऊ अब्राहम के कहलक, ‘नाहीं बाप अब्राहम! जदि केकोउ मोरल लेक उमनेक ठीन पइठाले, उमन पाप लेक मन बदलोबयँ।’ 31 अब्राहम उके कहलक कि ‘जखन उमने मूसा भबिस्यबक्ता आर भबिस्यबक्ता गिला केर काथा के नाइ मानबयँ, तो जदि मोरल मइधे केउ बांइच उइठ कहन जाई तेऊ उकर नाइ मानबयँ।’”