15
हेराल गिला के परमेसर खोजेला
1 ईसु ठीन मासूल लेवइया गिला आर पापी सउब उकर काथा के सुनेक तेहें आत रहयँ। 2 ई देइख कहन यहूदी गिला केर फरीसी दलेक धरम गुरु गिला आर सास्त्र ग्यानी सउब कुरकुराय कहन कहे लागलयँ कि, “ई तो पापी गिला के स्वागत करेला आर उमन संगे खाना-पीनाउ करेला।”
हेराल भेड़ी केर कहबी काथा
3 तखन ईसु उमन के कहबी काथा सुनालक, 4 “माइन लेवा जदि तोहरेक लेक केकरो पासे एक सौ भेड़ी आहयँ, आर ऊ गुला लेक एक टा भेड़ी बोने हेराय जायला तो का ऊ बाकी निनानबे भेड़ी गिला के राइख कहन हेराल भेड़ी टाके खोजे नाइ जायला? आर जखन तक नाइ पावायला तखन तक नाइ खोजत रहेला? 5 आर जखन ऊ भेड़ी टाके पायला तो उके रीझे खान्धे उठाय कहन घर आनेला। 6 आर घर आय कहन आपन संगी आर आस-पासेक लोग गिला के जामा कइर कहन कहेला कि, ‘आवा मोर संगे खुसी मानावा, काहेकि मोर हेराल भेड़ी टा पावालक।’ 7 तो सुना, एहे रकमे जदि एक टा पापी लोग केर मन बदइल जायला तो सरग माहने बेजाइन आनन्द होयला, आर एसन आनन्द बाकी निनानबे धरमी लोग खातिर नाइ होयला, जे हेराय निखयँ।”
हेराल सिक्का केर कहबी काथा
8 चाहे माइन लेवा एक टा बेटी छुवा पासे चाँदी केर दस टा सिक्का रही आर उकर एक टा सिक्का हेराय जाई। तो का ऊ दीया जोइर कहन गोटा घर नाइ खोजी? आर जखन तक ऊ सिक्का टा नाइ पावाइ तखन तक बाड़हाय कहन खोजत नाइ रही। 9 आर जखन ऊ सिक्का टाके पायला तो ऊ आपन गोतनी आर आस-पासेक बेटी छुवा गिला के जामा कइर कहन कहेला, “मोर संगे खुसी मानावा काहेकि मोर हेराल सिक्का टा पावालक।” 10 एहे रकमे एक टा पापी लोग टा मन बदलेला तो परमेसर केर सामने सरग दूत गिलाउ आनन्द मनायँला।
ऊड़ाउ बेटा केर कोहनी
11 फिन ईसु कहलक, “एक टा लोग केर दुइ टा बेटा रहयँ। 12 तो छोटे बेटा टा आपन बाप के कहलक, आपन सम्पत्ति केर जे मोर हिस्सा होई उके मोके दे देहिन। तखन बाप टा दुइयो झन के आपन सम्पत्ति के बाँइट देलक। 13 तेकर थोड़ेक दिन केर बादे छोटे बेटा टा आपन हिस्सा केर सउब सम्पत्ति के बेंइच राखलक, आर टाका-पयसा के ले कहन परदेस चइल गेलक। आर हुवाँ खाराब काम माहने आपन सउब टाका-पयसा के उड़ाय देलक। 14 जखन ऊ सउब टाका-पयसा के सिराय देलक, तखन ऊ कांगाल होय गेलक। उ खने गोटा देस माहने भेयानक आकालो होलक। 15 तखन ऊ हुवाँ केर एक टा किसान ताहाँ काम करेक तेहें गेलक, तो उके सुवेइर चाराय केर काम देलक। 16 तेऊ उके खायेक तेहें केइवे कोनो नाइ देत रहयँ, सेतेहें ऊ भूखे सुवेइर केर चारा गिला के खाय कहन आपन भूख मेटात रहे। 17 आखिर माहने, एक दिन उके होंस आलक तो मने सोंचे लागलक कि ‘मोर बापेक घरे कमिया गिला के पेट भोइर लेक बेसी खायेक पावायला आर मोयँ हियाँ भुखे मोरतँ 18 एबार मोयँ उइठ कहन आपन बाप ठीन जामूँ आर उके कहमूँ, “ए बा, मोयँ परमेसर आर तोर बिरोध माहने पाप करलँ। 19 मोयँ ई लाइख नेखों, कि तोर बेटा कहाम, मोके एक टा कमिया जाइन कहन राइख ले।”’ 20 एसन सोंइच कहन ऊ उठलक आर आपन बाप ठीन घुइर कहन आत रहे। सेखन ऊ घर लेक धूरेइ रहे, कि उकर बाप उके आत के देखलक तो उकर हिरदय माहने दया भोइर गेलक, आर कुइद कहन गेलक आर उके पटोइर कहन चूमा करलक। 21 तखन बेटा बाप के कहलक, ‘ए बा, मोयँ तोर आर परमेसर केर बिरोध माहने पाप करलँ, एबार मोयँ ई लाइख नेखों कि तोर बेटा कहाम।’ 22 लेकिन उकर बाप धांगर गिला के कहलक, ‘चाँड़े जावा! आर घर केर सउब लेक बढ़ियाँ लुगा लाना आर इके पिन्धावा आर हाँथे आँगठी आर गोड़े जुता पिन्धावा।’ 23 आर मोटा-तागडा़ पोसल जानवर के लाइन कहन काटा आर हामरे सउब खाय कहन खुसी मानाब। 24 काहेकि मोर ई बेटा टा, मोरल रकम हामरेक लेक दूर रहे आर आइज घुइर कहन आलक, ई हेराय जाय रहे एबार पावालक, आर उमने सउब खुसी मानाय लागलयँ। 25 किन्तु उकर बोड़े बेटा टा खेते काम करत रहे, जखन ऊ खेत लेक घर ठीन पहँचोलक, तो घरे गाजा-बाजा आर नाचेक आवाज सुनलक। 26 तखन ऊ एक टा धांगर टाके पुछलक, ‘ई का हो तेहे?’ 27 धांगर टा कहलक, ‘तोर छोटे भाई टा आय आहे। उकर खुसिये तोर बाप जे मोटा-तागडा़ पोसल जानवर टाके काटुवालक, काहेकि ऊ बेसे-बेस उके पालक।’ 28 इटा सुइन कहन ऊ बेजाइन रागालक आर घरो ढुके नाइ खोजलक, बल्कि उकर बाप बाहिर बाहरालक आर उके डोबल दुलारे मानाय लागलक। 29 तखन ऊ आपन बाप के जबाब देलक, ‘देख! मोयँ एतना बछर लेक तोर सेबा करतँ, आर कबोउ तोर आग्यां के नाइ टाललं तेऊ तोयँ मोके कबोउ एक टा पठरु तक नाइ देले कि मोयँ आपन संगी गिला संगे आनन्द मानातँ।’ 30 किन्तु तोर ई बेटा टा आलक जे तोर सउब सम्पति के रण्डीबाज माहने उड़ाय देलक। तो उकर तेहें तोयँ मोटा-तागडा़ पोसल जानवर टाके काटुवाय आहिस। 31 उकर बाप कहलक, ‘बेटा सुन, तोयँ सउब दिन मोर संगे आहिस। आर जतना मोर आहे ऊ सउब तोरे तो हेके। 32 किन्तु आइज तोके खुसी होयेक चाही आर आनन्द मानायेक चाही काहेकि ई मोइर जाय रहे फिन बांइच उठलक, हेराय जाय रहे एबार पावालक।’”