लूका 14

फरीसी गिला केर घरे ईसु

¹ एक दिन ईसु परमेसर केर पबित्र दिने फरीसी गिला केर सारदार गिलाक मइधे एक झन केर घरे खायेक तेहें गेलक, आर हुँवा उमने सउब उकर कोनो गलती धरेक ताके रहयँ। ² आर देखा, उमनेक ताहाँ एक टा अदमी रहे, जेकर जलंधर केर रोग रहे। ³ ईसु मूसा केर नियम जानइया आर फरीसी गिला के पूछलक, का परमेसर केर पबित्र दिने रोगी गिला के बेस करेक उचित आहे, न नाही? ⁴ किन्‍तु उमने सउब चुप चाप रहलयँ। ईसु ऊ अदमी केर ऊपरे हाँथ राइख कहन बेस करलक, आर उके पइठाय देलक। ⁵ आर उमने के कहलक, तोहरेक मइधे के एसन आहा, जेकर गाधा चाहे गोरु कुँइयाय गिर जाबयँ, तो का तोहरे उके परमेसर केर पबित्र दिने तुरते बाहिर नाइ निकलाबा? ⁶ उमने ईसु केर ई काथा टा केर कोनो जबाब नाइ दे पारलयँ।

नरम बनेक आर भोज माहने गरीब दुःखी गिला के नेवता

⁷ जखन ईसु देखलक, कि भोज माहने आवल नेवथारिया गिला बेस-बेस आर खास जायगाय बइसेक चाहत रहयँ। तो उमने के एक टा उदाहरन दे कहन कहलक, ⁸ “जखन केउ तोके बिहा भोजे नेवता दे कहन डाकबयँ, तो तोयँ कोनो खास जायगाय ना बइसबे, एसन ना होवुक कि ऊ तोर लेको बोड़े लोग के नेवता दे होई। ⁹ आर जे लोग टा तोहरे दुइयो झन के नेवता दे कहन डाइक आहे, ऊ आय कहन तोके कही, तोयँ इकर तेहें बइसेक जायगा छोइड़ देहिन, तखन तोके लज्जित होय कहन सउब लेक हेंठे बइसेक होई। ¹⁰ किन्‍तु जखन तोके नेवता दे कहन बिहा भोजे डाकबयँ, तो तोयँ सउब लेक हेंठे बइसिन। काहेकि तोके जे नेवता दे कहन डाइक आहे, ऊ आय कहन तोके कही, तोर तेहें आघुवे बढ़ियाँ बइसेक जायगा आहे। ई रकम सउब गोतिया गिलाक पासे तोर माइन होई। ¹¹ काहेकि जे गिला निजे के बोड़े बनायँला, उके छोटे करल जाई, आर जे गिला निजे के छोटे बनायँला, उके बोड़े बनाल जाई।”

¹² ईसु नेवता देवइया कोउ कहलक, “जखन तोयँ दिने चाहे राइते भोज करबे, तो आपन संगी, भाई-बन्‍धु, हित-कुटुम्‍ब, चाहे आस-पासेक धनिमान लोग गिला के ना डाकबे, काहेकि बदल माहने तोकोउ नेवता दे घुराबयँ, एहे टाइ तोर फल होई। ¹³ किन्‍तु जखन तोयँ भोज करबे तो गरीब-दुःखी, लंगड़ा-लूल्हा आर आँधरा गिला के डाकबे। ¹⁴ तबे गानी इटा तोर आसिरबाद केर कारण होई काहेकि उमनेक पासे तोके बदला दे घुरायक तेहें कोनो नेखे, आर जखन धरमी गिला केर बांइच उठेक, समय परमेसर तोके इकर ईनाम देई।”

बोड़े भोज

¹⁵ उकर संगे भोज खावइया मइधे एक झन ई काथा के सुइन कहन कहलक, “जे परमेसर केर राइजे भोज खाई ऊ धन्‍य हेके।”

¹⁶ तखन ईसु उमने के उदाहरन दे कहन कहलक, “एक टा अदमी बोड़े भोज देलक, आर ऊ भोज माहने बेजाइन लोग गिला के नेवता देलक। ¹⁷ जखन भोज तेयार होय गेलक, तो ऊ आपन धांगर के नेवताहारी ताहाँ कइह पइठालक कि ‘आवा, भोज तेयार होलक।’ ¹⁸ लेकिन उमने सउब केर सउब बाहना करे लागलयँ। पहिलेक टा कहलक, मोयँ खेत ले आहों, सेटा के देखेक जरुरी आहे, मोयँ तोके बिनती करतँ, मोके छमा कइर देहिन। ¹⁹ दोसर टा कहलक, मोयँ पाँच जोड़ा बरद कीन आहों, ऊ गुला के हार जोइत ताके जा तहँ, मोयँ बिनती करतँ, मोके छमा कइर देहिन। ²⁰ आरो एक झन कहलक, ‘मोयँ काइल-पोरसुवे बिहा कइर आहों, सेइ तेहें मोयँ जायेक नाइ पारमूँ।’ ²¹ जखन ऊ धांगर टा आय कहन आपन मालिक टाके ई सउब काथा के कइह सुनालक। सेखन घर केर मालिक बेजाइन खिंसालक, आर आपन धांगर टाके कहलक, ‘नगर केर हाट-बाजार आर कुल्‍ही गिलाय तुरंत जाय कहन, गरीब-दुःखी, लांगड़ा-लूल्‍हा आर आँधरा गिला के हियाँ ले कहन आव।’ ²² तेकर बादे धांगर टा घुइर आय कहन फिन उके कहलक, ‘ए मालिक, जेसन तोयँ कइह रहिस, ओसनेइ करलँ, तेऊ जायगा एखनो खाली आहे।’ ²³ सेखन मालिक, धांगर टाके कहलक, ‘संड़क डहर गिलाय, आर गाँव लेक बाहिरेक लोग गिला के जबरन ले कहन आव, ताकि मोर घर भोइर जाउक।’ ²⁴ काहेकि मोयँ तोहरे के कहतँ, कि ऊ नेवताहारी लोग गिला जेके मोयँ डाइक रहँ उमनेक मइधे एको झन मोर तेयार करल भोज के चाखे नाइ पारबयँ।”

चेला बनेक तेहें कीमत चुकाएक

²⁵ जखन दोमे भीड़ ईसु केर संगे जात रहयँ, सेखन ऊ पेछु बाटे देइख कहन उमने के कहलक, ²⁶ जदि केउ मोर पासे आयला, आर आपन मांय, बाप, आर आपन जनी, छुवा, आर भाई, बहिन आर एतना तक कि आपन प्रान टाकोउ हिया हरन नाइ छोड़ी, तो ऊ मोर चेला नाइ बोने पारी। ²⁷ आर जे आपन कुरुस बोइह कहन मोके नाइ गुड़ियाइ, होले उहो मोर चेला नाइ होय पारे।

²⁸ तोहरेक मइधे के एसन आहा, जे बोड़े निहार घर बनाय खोजेला, आर ऊ बइस कहन खरचा नाइ जोड़ी, कि मोर पासे इटा के पूरा करेक तेहें जांगरा आहे न नेखे? ²⁹ एसन ना होवुक कि घर केर नेव गाढ़ा कोड़ाय जाई, आर घर बनाय कहन तेयार करे नाइ पारी, होले सउब देखोइया उकर माजाक उड़ाबयँ आर हाँसे लागबयँ कि, ³⁰ ई मानुस टा घर बनायेक सुरु तो करलक, किन्‍तु तेयार करे नाइ पारलक।

³¹ चाहे के एसन राजा आहे, जे दोसर राजा केर संगे लड़ेक तेहें जात होवी, आर पहिले बिचार नाइ कइर लेइ कि दोसर राजा आपन सेना गिला के बीस हाजार ले कहन मोर संगे लड़ेक तेहें आयला, तो का मोयँ दस हाजार सेना के ले कहन उकर संगे लड़े पारमूँ, न नाहीं? ³² आर ना होले उकर दुरे रहत केइ ऊ आपन दूत गिला के पइठाय कहन उकर संगे सालाह करे खोजी। ³³ एहे रकमेइ तोहरेक मइधे जे गिला आपन सउब टाके नाइ छोइड़ देई, तो ऊ मोर चेला नाइ होय पारेला।

आपन महत्‍व टाके ना हेजाबा

³⁴ “नून तो बढ़ियाँ जिनिस हेके, किन्‍तु जदि नून केर सवाद बोगइड़ जाई, होले उके का जिनिस टाय नमकीन करल जाई? ³⁵ ऊ ना तो भूईं केर आर ना तो माइद केर कामे आयला, उके तो लोग बाहिरे फेंइक देन्‍ला। जेकर सुनेक कान आहे उमने सुइन लेवा।”