13
मन बदलेक उपदेस
1 उखने थोड़ेक लोग गिला ईसु ठीन आलयँ आर उके गलील प्रदेस केर लोग गिला केर बारे बाताय लागलयँ। जखन ऊ गलील प्रदेस केर लोग गिला बलिदान चेढ़ात रहयँ सेखन राइजपाल पिलातुस उमन के मारुवालक। आर उमन केर लोहू टा उमनेक बलिदान माहने गिर कहन मेसाय होलक। 2 इटा सुइन कहन ईसु उमने के कहलक कि “तोहरे का सोंचाला कि गलील केर लोग गिला, जेके मोराल गेलयँ तो का उमने दोसर गलीली गिला लेक बेसी पापी रहयँ कि उमने ई भाभेक मोरलयँ? 3 मोयँ तोहरे के कहँला, नाहीं, किन्तु जदि तोहरे गलत काम के छोइड़ कहन, मन नाइ बदलोबा तो तोहरोउ नास होय जाबा। 4 आरो यरूसालेम माहने आठारो टा लोग गिला केर ऊपरे सिलोह केर गुम्मट केर छत टा गिरलक आर सउब जांतायं मोरलयँ। तो उमनेक बारे तोहरे का सोंचाला, कि उमने यरुसालेम केर दोसर लोग गिला लेक बेसी पापी रहयँ? 5 नाहीं! किन्तु जदि तोहरे गलत काम के छोइड़ कहन मन नाइ बदलोबा तो तोहरोउ नास होय जाबा।”
नि फरइया गाछ
6 फिन ईसु एक टा कहबी काथा कहलक, “एक झनेक आँगूर केर बागाने एक टा आंजीर केर गाछ लागल रहे, ऊ आंजीर केर गाछे फर खोजेक तेहें आलक, तो एको टा नाइ पालक। 7 तखन मालिक टा बागान केर ओगरोइया के कहलक, देख मोयँ तीन बछर लेक ई गाछ टाय फर खोजेक तेहें आवँला, लेकिन एको टा नाइ पावँला, सेइ तेहें इटा के काइट देहिन, काहेकि बेकार केर जायगा टाके मड़ियाय आहे, इकर जायगाय दोसर गाछ लागाती। 8 ओगरोइया टा कहलक, ए मालिक इटा के ई बछर तक रहे देहिन, मोयँ इकर माहने चाइरो बाटे गाढ़ा खोइन कहन माइद डलमूँ। 9 जदि ई बछर फरी होले तो ठिके होई आर नाइ होले तो काइट देबिक।”
ईसु एक टा कुबड़ी बेटी छूवा के परमेसर केर पबित्र दिने बेस करलक
10 ईसु परमेसर केर पबित्र दिने एक टा आराधनालय माहने सिच्छा देत रहे। 11 हुँवा एक टा बेटी छुवा रहे, जेके आठारो बछर लेक दुस्टात्मा धइर रहे, जेकर चलते ऊ कमजोर होय कहन कुबी होय रहे। ऊ कोनो रकमोउ सीधा ठाड़ होय नाइ पारत रहे। 12 ईसु उके देइख कहन डाकलक आर कहलक “ए नारी, तोयँ आपन रोग लेक बेस होय गेले।” 13 आर ईसु उकर ऊपरे हाँथ राखलक आर ऊ तुरंत सीधा ठाड़ होय गेलक आर परमेसर केर बड़ाई करे लागलक। 14 ईसु परमेसर केर पबित्र दिने ऊ बेटी छुवा टाके बेस करलक, सेइ चलते ऊ आराधनालय केर सारदार टा दोमे खिंसालक। आर लोग गिला के कहे लागलक, “हाप्ता माहने छह दिन तो काम करेक तेहें आहे, आर एहे छह दिन केर भीतरेइ बेस होयेक तेहें तोहरे के आयेक चाही, लेकिन परमेसर केर पबित्र दिने नाही!” 15 ई सुइन कहन ईसु उमने के कहलक “ए ढोंगी, का परमेसर केर पबित्र दिने तोहरे आपन-आपन गोरु चाहे गाधा गिला के खूँटा लेक खोइल कहन पानी पियाएक तेहें नाइ लेगावाला?” 16 ई बेटी छुवा टाउ अब्राहम केर बंस लेक हेके, जेके सैतान आट्ठारो बछर लेक बांइध राइख आहे, का इके परमेसर केर पबित्र दिने ई बन्धन लेक छोड़ायेक उचित नेखे? 17 ई सुइन कहन ईसु केर बिरोधी गिला लज्जित होय गेलयँ। बाकी भीड़ केर सउब लोग गिला उकर अच्मभित काम गिला के जे ऊ करत रहे, देइख कहन खुसी होलयँ।
परमेसर केर राइज राई आर सोडा निहार पसइर जायला
18 फिन ईसु कहलक, “परमेसर केर राइज, केकर बराबइर आहे? आर मोयँ उकर केकर संगे जोखा करमूँ? 19 ऊ राई केर एक टा मंजी केर बराबइर आहे, जेटा के एक झन ले कहन आपन बाड़ीये बुनलक, आर ऊ बाइढ़ कहन गाछ बनलक, आर आकास केर चरई गिला उकर डाइरे बासा करलयँ।”
20 ऊ फिन कहलक, “परमेसर केर राइज के, केकर संगे जोखा करमूँ? 21 ऊ सोडाa केर बराबइर आहे जेके एक टा बेटी छुवा रोचिक टा सोडा के ले कहन दोमे आंटा माहने मेसालक आर ऊ सउब आंटा माहने पसइर गेलक।”
उद्धार पायेक तेहें पातला डहरे ढुकेक चेस्टा करा
22 ईसु जखन नगर-नगर आर गाँव-गाँव सिच्छा देत के यरुसालेम बाटे जात रहे। 23 तखन उके केउ पुछलयँ, “ए परभु, का थोड़ेक लोग गिला केरेइ उद्धार होई?” 24 ईसु उके कहलक, “पातला दुरा लेक ढूकेक चेस्टा करा, काहेकि मोयँ तोहरे के कहँला कि ढेइर लोग गिला ढूके चाहबँय, किन्तु ढूके नाइ पारबयँ। 25 जखन घर केर मालिक उइठ कहन दुरा के बन्द कइर देला, आर तोहरे बाहिरे ठाड़ होय कहन दुरा के ठोकठोकाय के कहबा, ए परभु, हामरेक तेहें दुरा छोइर देहिन, आर ऊ भीतर लेक कही कि मोयँ तोहरे के नाइ जानँला, तोहरे काहाँ लेक आय आहा? 26 तखन तोहरे कहे लागबा, हामरे तोर संगे खावा-दावा कइर आही, आर तोयँ हामरेक बाजार-हाट गिलाय सिच्छाउ दे आहिस। 27 मिन्तुक ऊ तोहरे के कही, मोयँ नाइ जनँला, तोहरे काहाँ लेक आय आहा, आर के हेका? ए गलत काम करइया गिला! मोर पास लेक दूर होय जावा।
28 जखन तोहरे अब्राहम, इसहाक, याकुब आर सउब भबिस्यबक्ता गिला के परमेसर केर राइज माहने बइसल देखबा, किन्तु तोहरे के बाहेइर ढेकेइल कहन निकलाबयँ जहाँ कान्देक आर दाँत मिसेक होई। 29 गोटा संसार केर लोग गिला आबयँ आर परमेसरेक राइजे भोज खायेक तेहें सामिल होबयँ, 30 आर देखा, जोतना पेछुवे आहयँ उमन आघुवाबयँ, आर जे गिला आघुवे आहयँ उमन पेछुवे रहबँय।”
ईसु यरुसालेम नगर के देइख कहन दुःखी होयला
31 ओहे खने थोड़ेक फरीसी गिला ईसु के कहलयँ, हियाँ लेक तोयँ चइल जा! काहेकि हेरोदेस राजा तोके मारूवाय चाहेला। 32 ईसु उमने के कहलक, “जाय कहन ऊ सियाड़ के कइह देवा, कि देखा, मोयँ आइज आर काइल दुस्टात्मा गिला के निकलावँला, आर रोगी गिला के बेस करँला, फिन तीसरा दिने आपन काम के पूरा करमूँ। 33 मोके आइज, आर काइल आर पारसु चले केइ होई, काहेकि ई होय नाइ पारी कि केउ भबिस्यबक्ता गिला यरुसालेम लेक बाहिर मोराल जाबयँ। 34 ए यरुसालेम केर लोग गिला! तोहरे जे भबिस्यबक्ता गिला के माइर मोरावाला, आर जे गिला के परमेसर तोहरे के साहेता करेक तेहें पइठायला उमन के पाखनाय ठेंइस मोरावाला। मोयँ कोतना धंव चाहलँ कि, जेसन मुरगी आपन छुवा गिला के आपन डेनखाय ढाँइप कहन राखेला, ओहे रकमे मोयँ तोहरेक छुवा-पुता के जतन कइर कहन राखमूँ! लेकिन तोहरे नाइ चाहला। 35 देखा, तोहरेक सहर तोहरेक तेहें उजड़ाय कहन छोड़ल जायला, आर मोयँ तोहरे के कहँला, तोहरे मोके ऊ समय तक आरो कोखनो नाइ देखे पारबा, जखन तक तोहरे नाइ कहबा, कि धन्य आहे ऊ, जे परभु केर नामे आयला।”