12
चेला गिला के सिच्छा
1 सेखन हुआँ हाजार लेक बेसी लोगेक भीड़ जामा होलयँ, एतना तक कि लोग ठेला-ठेली होय कहन गिरे लागलयँ, तखन ईसु आपन चेला गिला के कहे लागलक, “फरीसी गिला केर कपटी जे सोडा निहार पसइर जायला सेटा लेक सावधान रहा। 2 कोनो ढाँपल नेखे, जेके उटकाल नाइ जाई, आर कोनो छिपल नेखे, जेके केउ नाइ जानबयँ। 3 सेइ तेहें जेटा के तोहरे आँधार माहने कइह आहा सेटा के आलो माहने सुनाल जाई, आर जेटा के तोहरे कोठरी माहने चुपे-चुपे केकरो काने कइह आहा, सेटा के कोठा ऊपर लेक परचार करल जाई।”
4 मोयँ तोहरे के जे मोर संगी हेका कहँला कि “जे सरीर के माइर देन्ला लेकिन उकर बादे कोनो करे नाइ पारोयँला, उमनेक संगे ना डराबा। 5 मोयँ तोहरे के कइह दे तहँ कि केकर संगे डरायेक चाही, परमेसर संगे डरायेक चाही, जेकर पासे लोग गिला के नास करेक आर नरक माहने डालेक सक्ति आहे। सेइ तेहें उकरे डर-भय राखा।
6 देखा, दुई पयसाय पाँचटा गरैंचा नाइ बेचायँला? तेऊ परमेसर उमन लेक एको टाके नाइ भुलेला। 7 आर तोहरे तो ऊ चरई गिला लेक बेसी किमती आहा, तोहरे केर मुड़ेक चुइलो गनल आहे, सेइ तेहें ना डाराबा।”
8 मोयँ तोहरे के कहँला, “जे गिला मोके लोगेक मांझे मानबयँ, उमने के मोयँ जे मानुस केर बेटा हेकँ परमेसर आर सरग दूत केर मांझे माइन लेई। 9 आर जदि केउ मोके लोगेक मांझे इन्कार करबयँ आर नाइ मानबयँ, तो उकर परमेसर केर सरग दूत केर सामने इन्कार करल जाई। 10 जदि केउ मोर बिरोध माहने जे मानुस केर बेटा हेकँ कोनो कहबयँ, तो उके छमा करल जाई, किन्तु जे पबित्र आत्मा केर निन्दा करबयँ, उके छमा नाइ करल जाई।”
11 जखन लोग गिला तोहरे के साभा गिलाये आर राइजपाल आर अधिकारी गिला केर सामने लेगाबयँ, तखन का निहार हामरे जबाब देबिक आर का कहब सेटा केर चिन्ता ना करबा। 12 काहेकि पबित्र आत्मा ओहे खने तोहरे के सिखाय देई, कि का कहेक चाही।
एक टा मुरुख धनिमान
13 फिन भीड़ मांझे एक झन उके कहलक, ए गुरु मोर भाई के कहिंग, कि बाप केर सम्पति टाके मोकोउ बाँटा देउक। 14 ईसु उके कहलक, “ए मानुस, के टा मोके तोर न्याय करइया आर बाँटोइया ठहराय आहे?” 15 आरो ईसु उके कहलक, “हुँसयारे रहा आर हरेक रकम केर लोभ लेक निजे के बांचाय कहन रखा काहेकि केकरो जीबन उकर धन-सम्पति केर ऊपरे निरभर नेखे।”
16 ईसु उमने के एक टा कहबी काथा कहलक, एक टा धनिमान केर खेते दोमे ऊपज होलक। 17 तखन ऊ आपन मने बिचार करे लागलक, एबार मोयँ का करम? काहेकि मोर ताहाँ एसन जायगा नेखे जहाँ आपन धन के राखमूँ। 18 आर कहे लागलक, कि मोयँ आपन भंड़ार घर के धोंसाय कहन बोड़े निहार बनामूँ आर हुआँ आपन सउब धन सम्पति के राखमूँ। 19 आर आपन जीव के कहमूँ, तोर खातिर ढेइर बछरेक तेहें दोमे धन-सम्पति राखल आहे, निचिन्त खाय-पी कहन सुखे रहिंग। 20 किन्तु परमेसर उके कहलक, “ए मुरुख, आइज राइते तोर प्रान टाके लेल जाई, होले जेटा तोयँ जामा कइर आहिस उटा केकोर होई। 21 एसने ऊ मानुस टाउ हेके जे आपन खातिर धन-सम्पति जामा करेला, किन्तु परमेसर केर नजइरे ऊ धनिमान ना लागे।”
खायेक, पियेक आर पिंधेक तेहें चिन्ता ना करा
22-23 तखन ईसु आपन चेला गिला के कहलक, “खाना-पीना लेक बोड़े तोहरेक जीबन हेके, आर लुगा लेक बोड़े सरीर हेके। सेइ तेहें मोयँ तोहरे के कहँला कि आपन जीबन लेक बेसी का खाबिक आर का पिन्धबिक सेटा केर चिन्ता ना करा।”
24 काउवा गिला के देखा, उमन ना तो रोपयँला, आर ना तो काटयँला, आर ना तो उमन केर राखेक गोदाम आर खाँचा रहेला, तेऊ परमेसर उमने के आहार देला, तोहरेक कीमत तो ऊ चरइ लेको बेसी आहे। 25 तोहरेक मइधे के टा एसन आहा, जे चिन्ता कइर कहन आपन उमइर के एक तनिको बाढ़ाय पाराला? 26 जदि तोहरे ई छोटे-मोटे काम टाके नाइ करे पारबा, तो बाकी कामेक तेहें काहे चिन्ता कराला।
27 टाँइड़ेक फूल गिला के देखा! का रकम बाढ़ेला? ऊ ना तो खाटेला, आर ना तो लुगा गाँथेला। तेऊ मोयँ तोहरे के कहँला, कि सुलेमान राजाउ सुन्दर राइज पोसाक पिन्धोत रहे। किन्तु ई फूल गिला निहार सुन्दर पोसाक कबोउ एकोटा नाइ पिन्ध रहे। 28 तोहरे बिसास तो कराला लेकिन बहुत कम बिसास कराला। जदि परमेसर टाँइड़ेक फूल के आइज आहे आर काइल आइगे पोड़ाय देई, सेटा के एसन पिंधायला तो तोहरे के काहे नाइ पिंधाई? 29 तोहरे का खाबिक आर का पीबिक, सेटा केर खोजेक माहने ना रहा आर ना तो चिन्ता करा। 30 काहेकि अबिसासी लोग गिला ई सउब केर चिन्ताय रहयँला: आर तोहरेक बाप परमेसर जानेला कि तोहरे के ई सउब जिनिस केर दरकार आहे। 31 किन्तु पहिल तोहरे परमेसर केर राईज के खोजेक माहने रहा, तो ई सउब जिनिस तोहरे के मिल जाई।
32 “ए छोटे मंडली, तोहरे के आपन राइज देक तेहें तोहरेक बाप परमेसर के उचित बुझालक, सेइ तेहें तोहरे ना डराबा। 33 आपन सम्पति के बेइंच कहन गरीब गिला के दान कइर देवा, आर आपन तेहें एसन बटुआ बनावा जे कबोउ पुरना नाइ होयला। सरग माहने एसन धन जामा करा जाहाँ ना तो घटेला आर ना तो चोरायँला, आर पोकाउ नाइ लागोयँला। 34 काहेकि जहाँ तोहरेक धन रहेला हुआँइ तोहरेक मनो लागल रही।”
मालिक आवइया आहे तेयार रहा
35 सेइ तेहें तोहरेक डाँड़ा बाँधल रहूक, आर तोहरेक लोम्फो जोरते रहूकका। 36 आर तोहरे ऊ लोग गिला निहार बना, जे आपन मालिक केर आयेक आसरा देखत होबयँ, कि ऊ बिहा भोज लेक कोखन घुरी, आर जखन ऊ आय कहन दूरा के ठोकठोकाइ होले तुरते उकर तेहें दुरा छोइर देम। 37 धन्य हेकयँ, ऊ धांगर गिला जेके मालिक आय कहन जागत के पाई, मोयँ तोहरे के कइह देवँला, कि मालिक डाँड़ा बाँइध कहन धांगर गिला के खायेक तेहें बोइसाई आर सामने आय कहन सेबा-सुसरा करी। 38 जदि ऊ आय कहने आधा राइते चाहे भिन्सारे उमने के जागत के पायला, सेइ धांगर गिला धन्य हेकयँ।
39 किन्तु तोहरे ई काथा के जाना कि जदि घरेक मालिक जानेला कि चोर कोन समय आबयँ तो जागल रहेला आर आपन घरे चोरी होय नाइ देला। 40 तोहरोउ तेयार रहा, काहेकि जे समय तोहरे सोंचबो नाइ कराला ओहे समय मानुसेक बेटा आय जाई।
41 तखन पतरस कहलक, “ए परभु, का ई कहबी काथा टा तोयँ हामरे केइ कहतिस न सउब के कहतिस।” 42 परभु कहलक, बिसास करेक निहार आर बुद्धिमान जोगाइया के आहे? जेके मालिक आपन धांगर गिलाक ऊपरे मुखिया राखी, ताकि उमन के ठीक समय खायेक-पीयेक देउक। 43 जखन मालिक आय कहन उके एसने काम करत के पाई ऊ धांगर टा धन्य हेके,। 44 मोयँ तोहरे के सते केरेइ कहँला, मालिक उके आपन सउब सम्पतिक ऊपरे अधिकारी बनाइ। 45 किन्तु जदि ऊ धांगर टा सोंचे लागी कि मोर मालिक आयेक माहने देरी करो तेहे, आर धांगर-धांगरीन गिला के माइर-पीट करे लागी, आर खायेक-पीयेक बादे मद पी कहन माताल बने लागी, 46 आर मालिक टा, एसन दिने आय जाई जखन धांगर टा उकर आसरा नाइ देखत होवी, तो मालिक उके भारी दंड देई आर ऊ अबिसासी केर समान गनाइ।
47 एसन धांगर जे आपन मालिक केर हिंछा के जानत तो रहे लेकिन उकर हिंछा केर मुताबिक काम नाइ करलक, ऊ दोमे माइर खाई। 48 किन्तु जे मालिक केर हिंछा के ना जाइन कहन माइर खायेक निहार काम करलक, तो ऊ तोनिके माइर खाई। सेइ तेहें जेके ढेइर देल जाय हे उके ढेइरे मांगल जाई, आर जेके ढेइरे जिमा देल जाय आहे, उके उकर लेक बेसी लेल जाई।
ईसु केर चलते मेल नाहीं
49 मोयँ धरतीये आइग लागायेक तेहें आय आहों, आर मोर हिंछा रहे कि एखन सोल्गोतक। 50 किन्तु मोके एक टा दुःख उठायेक बपतिस्मा लेक आहे, आर जबले उटा पूरा नाइ होई तबले मोयँ बेयाकुल रहमूँ। 51 तोहरे का सोंचाला, मोयँ धरतीये मेल करेक तेहें आय आहों? मोयँ तोहरे के कहँला, नाहीं, बरन्चो मोयँ भिनू करेक तेहें आय आहों। 52 काहेकि एधंव लेक जे घरे पाँच झन आहयँ उमनेक मांझे बिरोध होई, तीन झन एक बाटे होय कहन दुई झन केर बिरोध करबयँ आर दुई झन तीन झन केर। 53 उमने एक दुसर केर बिरोधी होबयँ, बाप बेटा केर आर बेटा बाप केर। मांय बेटी केर आर बेटी मांय केर, आर साइस पुतोउ केर आर पुतोउ साइस केर बिरोधी होबयँ।
54 ईसु भीड़ केर लोग गिला के कहलक, “जखन तोहरे पछिम बाटे लेक बादेइर उठत के देखाला तो तुरते कहाला कि आइज पानी गिराइ, आर एसने होयला। 55 जखन दखिन बाटे लेक हवा चलेला तो तोहरे कहाला, ‘दोमे गरम लागी, आर एसने होयला।’ 56 ए ढोंगीa सउब, तोहरे पानी गिरेक आर गरम लागेक लछन के जे धरती आर आकासे होयला सेटा के जानाला, किन्तु एखन परमेसर केर न्याय केर समय आय चुइक आहे, सेटा के आंदाज करे नाइ पाराला?”
57 “तोहरे परमेसर केर काम के देइख कहन काहे मन नाइ बदलाला आर उकर बाटे नाइ घुराला? 58 जखन तोयँ आपन मुदई केर संगे राइजपाल ताहाँ कछइरी जा तिहिस तो डहरेइ उकर संगे सालाह करेक कोसिस करिन। एसन ना होवुक कि ऊ तोके टाइन कहन हाकीम ताहाँ ले जाई, आर राइजपाल तोके सिपाही केर हाँथे जिमा देई, आर सिपाही जेहले ढुकाय देबयँ। 59 मोयँ तोहरे के कहँला, जबले तोयँ पूरा दंड नाइ भरबे तबले जेहेल लेक छुटे नाइ पारबे।”