11
ईसु चेला गिला के प्राथना करेक सिखायला
1 फिन एसन होलक कि ईसु एक दिन एक टा जायगाय बिनती करत रहे। आर जखन ऊ बिनती कइर चुकलक, तो उकर चेला गिला लेक एक झन उके कहलक, “ए परभु, जेसन कि योहन आपन चेला गिला के बिनती करेक सिखाय आहे, ओसनेइ हामरे कोउ तोयँ सिखाव।” 2 ईसु उमने के कहलक, जखन तोहरे बिनती करबा, तो कोहा -
“ए बाप, तोर नाम पबित्र मानोल जाऊक, आर तोर राइज आउक।
3 तोयँ हामरे के गोटा दिनेक रोटी खायेक तेहें रोज दिन देते रहिंग।
4 आर हामरेक पाप गिला के छमा करिन, काहेकि हामरोउ हामरेक बिरोध माहने गलत काम करइया गिला के छमा करिला।
आर हामरे के गलत काम करेक लेक बाचाइन।”
प्राथना करते रहा
5 ईसु उमने के एक टा उदाहरन दे कहन प्राथना केर समझालक कि “तोहरेक मइधे के एसन आहा कि जेकर एक टा संगी होई, आर ऊ आधा राइते उकर घरे जाय कहन कोहि ‘ए संगी, मोके तीन टा रोटी केर जउरत आहे मोके देहिन।’ 6 काहेकि मोर एक टा संगी ढेइर दूर लेक आय आहे, उके खियाएक तेहें मोर पासे कोनो नेखे।” 7 सेखन का ऊ घर भितर लेक एसन कोहि, “मोके ना उठाइन, मोयँ दूरा बन्द कइर आहों आर हामरे छुवा-पुता सउब सुतल आही, मोयँ उइठ कहन तोके कोनो दे नाइ पारमूँ?” 8 लेकिन मोयँ तोहरे के कहतँ, उकर आपन संगी हेके होलउ उके उइठ कहन नाइ देई, तेऊ उकर आपन लाज सरम के छोइड़ कहन सराधंव माँगेक चलते उके जोतन जउरत आहे ओतना उइठ कहन देई। 9 मोयँ तोहरे के कहतँ, “माँगबा तो तोहरे के देल जाई, खोजबा तो पाबा, आर ठोकठोकाबा तो तोहरेक तेहें खोलल जाई। 10 काहेकि जे गिला माँगोयँला तो उके देल जायला, आर जे गिला खोजयँला उमने पायँला, आर जे गिला ठोकठोकायँला उमनेक तेहें खोलल जायला।” 11 तोहरेक मइधे के एसन बाप आहा, कि जखन उकर छुवा रोटी माँगी होले उके पाखना देई? चाहे माछ माँगी होले उके साँप देई?a 12 आर चाहे आँड़ा माँगी होले उके खांकड़ बिछा देई? 13 जखन तोहरे खराब लोग होय कहनोउ, आपन छुवा गिला के बढ़ियाँ जिनिस देक जानाला, तो तोहरेक सरगेक बाप परमेसर आपन माँगोइया गिला के पबित्र आत्मा काहे नि देई।
ईसु आर दुस्ट आत्मा केर सरदार
14 फिन एक दिन ईसु एक टा गुँगी दुस्ट आत्मा के बाहराय लागलक, तखन एसन होलक, कि जखन दुस्ट आत्मा बाहरालक तो गुँगा टा काथा करे सुरु करलक। भीड़ केर लोग गिला उके देइख कहन अचम्भित होलयँ। 15 लेकिन थोड़ेक लोग गिला कहे लागलयँ “ऊ तो दुस्ट आत्मा केर सरदार सैतानb केर साहेता लेक दुस्ट आत्मा के बाहरायला।” 16 आरो दोसर लोग गिला ईसु के सही माहने मसीह हेके न नाइ हेके कइह कहन उके परखेक तेहें कहलयँ हामरे के कोनो चिन्हा देखाय देहिन, होले हामरे जानब कि तोयँ सरग बाटे लेक हेकिस।
17 लेकिन ईसु उमनेक बिचार के जानोत रहे, सेइ तेहें उमने के ऊ कहलक, “जे राइज माहने फूट होई तो ऊ राइज टा उजइड़ जाई। आर जे घरे विवाद आर झागड़ा होइ होले ऊ घर केरउ एसने हाल होई।” 18 जदि तोहरे कहाला, कि सैतान टा मोके दुस्ट आत्मा के बाहराला तेहें सक्ति देला तो ऊ निज आपन माहने दुसमनी होयला। एसन टाय उकर राइज का निहार बनल रही? 19 फिन जदि मोके दुस्ट आत्मा के बाहरायेक तेहें सैतान लेक सक्ति मिलेला तो तोहरेक संगी गिला के काहाँ लेक मिलेला? काहेकि उमनोउ तो दुस्ट आत्मा गिला के बाहरायँला। का तोहरे सोंचो ताहा, कि सैतान उमने के दुस्ट आत्मा के बहरायेक तेहें सक्ति देला? सेइ तेहें उमने निजे तोहरेक न्याय करबयँ। 20 लेकिन मोयँ जदि परमेसर केर सक्ति लेक दुस्ट आत्मा गिला के बाहरातँ होले संदेह ना करा बल्कि निस्चित जाइन लेवा कि परमेसर केर राइज तोहरेक पासे पहँइच आहे। 21 काहेकि जखन एक टा पहलवान लोग टा हाँथियार धोइर कहन घर केर पाहरा करेला तो उकर सउब सम्पति सुरछित रहेला। 22 लेकिन जखन उकर लेक बोड़े केउ पहलवान लोग टा उकर संगे लड़ाई कइर कहन उकर लेक जीत लेला, तो उकर हाँथियार के लुइट लेला, जेकर माहने उकर भरोसा रहे, आर उकर सम्पति के लुइट कहन बाँइट देला। 23 आर जे गिला मोर संगे निखयँ उमने मोर बिरोध माहने आहयँ, आर जे गिला मोर संगे जामा नाइ करयँला उमने छितरायँला।
बाहराल दुस्ट आत्मा आरो घुइर आयला
24 जखन मानुस लेक दुस्ट आत्मा बाहराय जायला, तो सुखल जायगाय आराम करेक तेहें खोजेला। जदि उके आराम करेक तेहें काहाँउ नाइ मिलेला, तखन ऊ कहेला, मोयँ उकरे ताहाँ आरो घुइर कहन जामूँ, जहाँ लेक बाहराय रहँ। 25 जखन दुस्ट आत्मा टा उकर ताहाँ पहँइच जायला तो उके साफ-सुथरा आर सिंगराल पायला। 26 तखन ऊ आपन लेक बेसी खाराब आरो दोसर सात टा दुस्ट आत्मा गिला के आपन संगे लाइन कहन आयला, आर उमने सउब उकर माहने सामाय जाबयँ, तखन ऊ लोग केर दासा पहिलेक दासा लेक बेसी खराब दासा होई।
धन्य लोग
27 जखन ईसु ई काथा के कहत रहे, सेहे खने एक टा बेटी छुवा भीड़ मांझे दोम आंटे कहे लागलक, “ऊ मांय टा धन्य हेके, जे तोके जनम देलक आर तोके दूध पियाय आहे।” 28 ईसु कहलक! “हों! किन्तु धन्य उमन हेकयँ, जे परमेसर केर बचन के सुनयँला आर मानयँला।”
अबिसासी लोग गिला के चेतावनी
29 जखन आरो बेसी भीड़ जामा होय लागलयँ सेखन ईसु कहलक, “ई पीढ़ी केर लोग कोतना दुस्ट हेकयँ! जे चमत्कार केर चिन्हा माँगोयँला, किन्तु परमेसर केर दास योना भबिस्यबक्ताc केर चिन्हा लेक दोसर चिन्हा नाइ देल जाई। 30 जेसन योना भबिस्यबक्ता केर संगे होलक, ऊ नीनवे नगर केर लोगेक तेहें ई चिन्हा रहे, कि ऊ परमेसर बाटे लेक रहे। सेइ निहारे मोयँ मानुस केर बेटा केर संगे जे होई, ई जुग केर लोगेक तेहें चिन्हा होमूँ।”d 31 एक टा दखिन देस केर रानी रहे। जे सुलेमान राजा ताहाँ उकर ज्ञान के सुनेक तेहें दुनिया केर कोना लेक आलक, लेकिन हियाँ एक झन सुलेमान लेको बोड़े आहे। जखन न्यायe होई सेखन ऊ रानी टा ई समय केर लोग संगे ठाड़ होई आर उमने के दोसी ठहराई। 32 निनवे नगर केर लोग गिला योना भबिस्यबक्ता केर परचार के सुइन कहन आपन गलती के माइन लेलयँ आर उमनेक मन बदइल गेलक। आर देखा हियाँ जे आहे योना लेको बोड़े हेके। निनवे नगर केर लोग गिला न्याय होई सेखन ई समय केर लोग गिला संगे ठाड़ होबयँ आर उमने के दोसी ठहराबयँ।
परमेसर केर बचन आलो हेके
33 केउ लोम्फो के जोइर कहन लुकाय के नाइ राखयँला, आर ना तो कोनो टाय ढाँइप कहन राखयँला। बल्कि दिरखा माहने राखयँला ताकि आयेक-जायेक वाला के आलो मिलुक। 34 तोर आँइख तोर गातेक लोम्फो हेके, सेइ तेहें जदि तोर आँइख साफ आहे होले तोर गोटा गात टा आलो माहने आहे, आर जदि तोर आँइख खराब आहे होले गोटा गात टा आन्धार माहने आहे। 35 सेइ तेहें ध्यान रखा जेटा तोहरेक भीतरे आलो आहे उटा आन्धार ना रहुक। 36 जदि तोर गोटा गात टा आलो माहने आहे आर काहाँउ कोनो अंग आन्धार माहने नाइ रही आर सउब के सउब आलो होई, होले तोर सम्पुरन जीबन टा एसन आलो होय जाई जेसन कि लोम्फो केर सउब आलो टा तोकेइ कइर आहे।
ईसु फरिसी आर शास्त्र ग्यानी गिला केर दोसी ठहरायला
37 जखन ईसु आपन काथा कइर सिरालक तो एक टा फरीसी उके आपन घर खायेक तेहें बिनती करलक। तो ईसु उमनेक संगे भीतर जाय कहन खायेक तेहें बोइसलक। 38 ई देइख कहन फरीसी टा अचम्भित होलक कि ऊ खायेक लेक पहिले उमनेक नियम केर मोताबिक हाँथ नाइ धोलक। 39 परभु उके कहलक, “ए फरीसी सउब, तोहरे थारी-छिपी के ऊपरे-ऊपरे तो माँजाला, किन्तु तोहरेक भीतरे लोभ आर बुराई भरल आहे।” 40 ए निरबुध्दि सउब जे बाहिरेक हिस्सा के बनाय हे, तो का ऊ भीतरेक हिस्सा टाके नाइ बनाय आहे? 41 सेइ तेहें तोहरेक पासे जेटा आहे, उटा के गरीब गिला के दान कइर देवा, तबे तोहरेक तेहें सउब टाइ पबित्र होय जाई।
42 “ए फरीसी सउब, तोहरेक ऊपरे हाय! तोहरे फुदना, आर सुदाब, आर सउब किसिम केर साग-पात केर दसवाँ हिस्सा परमेसर के देवाला, किन्तु जे उचित न्याय के आर परमेसर केर प्रेम टाके घसकाय देवाला, जउरत रहे कि उचित न्याय के आर परमेसर के प्रेम करते रहेक चाही, आरो दसवाँस टाउ देते रहेक चाही। 43 ए फरीसी सउब, तोहरेक ऊपरे हाय, तोहरे चाहाला कि आराधनालय माहने ऊँचा पद वाला जायगा मिलुक आर बाजारे लोग तोहरे के परनाम करुन। 44 हाय तोहरेक ऊपरे! काहेकि तोहरे एसन मुरदा गाड़हा हेका, जेकर माहने लोग चलयँला लेकिन जाने नाइ पारयँला।”
45 तखन एक झन मूसा केर नियम जानेक वालाf ईसु के उत्तर देलक, “ए गुरु, ई सउब बात लेक तोयँ हामरे कोउ बेजति करिसला।” 46 ईसु उके कहलक, “ए मुसा केर नियम जानइया, तोहरेक ऊपरोउ हाय! तोहरे एसन बोझा टाके लोगेक ऊपरे लादाला जेके उठायेक मुस्किल होयला, आर ऊ बोझा टा के तोहरे निजे आपन आंगुरोउ नाइ छुवाला।”
47 हाय तोहरेक ऊपरे, “तोहरे पहिलेक भबिस्यबक्ता केर मुरदा गाड़हा बनावाला, जे गिला के तोहरे केरेइ पुरखा गिला मोराय रहयँ। 48 इटाय ई साबित होयला कि तोहरे आपन पुरखा केर कामे सहमत आहा, काहेकि उमने भबिस्यबक्ता के मोरालयँ आर तोहरे उमनेक इयादगारी माहने पथल गाड़ी कराला।” 49 सेइ तेहें परमेसर केर बिचारो कहेला, “मोयँ उमनेक ताहाँ भबिस्यबक्ता गिला के आर प्रेरित गिलाg के पोइठामूं, आर उमने उमन लेक थोड़ेक गिला के मोराय देबयँ, आर थोड़ेक गिला के सताबयँ। 50 ताकि जोतना भबिस्यबक्ता गिला केर लोहू संसार केर सिरजन लेक एखन तक बहाल जाय आहे, ऊ सउब केर लेखा-जोखा ई जुगेक लोग लेक लेल जाई। 51 हाबिल केर खून लेक जकरिया केर खून तक, जे वेदी आर मंदिर केर मांझे बहाल जाय आहे। मोयँ तोहरेक संगे सत कहतँ, ई सउब केर लेखा-जोखा एहे पीढ़ीक लोग लेक लेल जाई। 52 ए नियम के जानइया तोहरेक ऊपरे हाय! तोहरे परमेसर केर बुद्धि पायेक चाभी तो लेला, किन्तु तोहरे तो निजे ढुके नाइ पारला, आर ढुकोइया कोउ रोइक देला।” 53 जखन ईसु हुआँ लेक बाहरालक, तो शास्त्र ग्यानी आर फरीसी गिला उकर बिरोध माहने उकर पिछे पइड़ गेलयँ, आर नाना रकम केर सवाल पुछे लागलयँ, 54 काहेकि उमने ईसु के उकर कोनो काथा टाये फँसाय चाहोत रहयँ।