10
तीन कुड़ी दसटा दोसर चेला गिला के पइठालक
1 इकर बादे ईसु तीन कुड़ी दस टा दोसर चेला गिला के राखलक। आर उमने के दुदुई झन कइर कहन भिनु-भिनु गाँवे आर सहरे आपन लेक पहिले पइठालक, जहाँ उके निजे केइ जायेक रहे। 2 आर उमने के ईसु कहलक कि “खेते तो खेती दोमे पाइक आहे, किन्तु कमिया तनिक टाइ आहयँ। तोहरे खेत केर मालिक संगे बिनती करा कि ऊ ‘खेती’ काटेक तेहें आरो कमिया गिला के पोइठाउक। 3 एबार तोहरे जावा, आर इयाद राखबा कि मोयँ तोहरे के पठरु केर समान हाड़गा गिलाक मांझे पइठावँला। 4 तोहरे आपन तेहें ना तो टाका-पयसा लेगावा आर ना तो कोनो राखेक तेहें थोइला, आर ना तो दुदुई जोड़ा जुता लेगावा, आर डहर माहने समय बेकार बरबाद ना करा। 5 आर जखन जेकर घर माहने जाबा तो सउब लेक पहिले उके आसिर्वाद देवा। 6 जदि ऊ घरेक लोग गिला आसिर्वाद पायेक निहार रहबयँ तो तोहरेक आसिर्वाद उमनेक ऊपरे बनल रही, आर नाही तो आसिर्वाद टा तोहरेक ताहाँ घुइर आई। 7 तोहरे उकरे घरे रहबा, एक टा घर लेक दोसर घर ना जाबा। आर जेटा खायेक-पियेक देबयँ उटाइ खाबा-पिबा। काहेकि कामिया गिला के भूती पावायेक चाही। 8 आर जे नगर माहने जाबा, आर हुआँ केर लोग गिला तोहरे के स्वागत करबयँ आर जेटा उमने खायेक तेहें तोहरेक ताहाँ राइख देबयँ उकेइ खाबा। 9 आर हुआँ रोगि गिला के बेस करा, आर लोग गिला के कहा कि ‘परमेसर केर राइज तोहरेक पासे पहँइच जाय आहे।’ 10 लेकिन जे नगरे तोहरे जाबा आर तोहरे के स्वागत नाइ करबयँ, तो उमनेक कुल्ही-कुल्ही जाय कहन कहा कि 11 तोहरेक बिरोध माहने हामरे तोहरेक नगर केर सउब धूरा के जेटा हामरेक गोड़े लटइक आहे उके झाइड़ देइला, काहेकि तोहरे बिसास नाइ करला, तेऊ तोहरे निस्चित जाइन लेवा कि परमेसर केर राइज पहँइच जाय आहे। 12 मोयँ तोहरे के कहँला कि न्याय केर दिने सादोम सहरेक दंड होई, लेकिन उकर लेको बेसी खराब दंड ऊ सहर केर होई।”
नगर केर अबिसासी लोग गिला के चेतौनी
13 फिन ईसु कहे लागलक, “हे खुराजिन आर बेतसदा केर लोग गिला, तोहरेक ऊपरे हाय! मोयँ तोहरेक तेहें एतना चमत्कार केर काम करलँ लेकिन तोहरे बिसास नाइ करला, सेइ तेहें तोहरेक आखरी बिनास आहे। जदि इ चमत्कार काम के अबिसासी सुर आर सैदा सहर केर लोगेक तेहें करतलँ, होले उमने ढेइर पहिलेइ बिसास कइर कहन मन फिरातयँ आर गलत काम के छोइड़ देतयँ।a 14 किन्तु सुर आर सैदा केर लोग गिला के न्याय केर दिने तोहरेक लेक कम साजा पावाई। 15 आर ए कफरनहूम केर लोग गिला, मोयँ तोहरेक खातिर का कहमूँ? का तोहरे सरग तक ऊपर उठाल जाबा? नाहीं कबोउ नाहीं, तोहरे हेंठे नरक माहनेइ जाबा।” 16 आरो ईसु चेला गिला के कहलक, “मोयँ तोहरे के पइठावँला, सेइ तेहें जे तोहरे के अपनाबयँ, इकर मतलब मोके अपनालयँ, आर जे तोहरे के स्वीकार नाइ करबयँ, उमने मोके अस्वीकार करबयँ। आर जे गिला मोके अस्वीकार करयँला, उमने परमेसर के अस्वीकार करबयँ जे मोके पइठाय आहे।”
चेला गिला घुइर आलयँ
17 आर जखन तीन कुड़ी दसटा चेला गिला ईसु ताहाँ घुइर आलयँ तो उमने खुसी से उके बाताय लागलयँ कि “तोर नामे हामरेक काथा के दुस्ट आत्मा गिलाउ मानयँला।” 18 सेखन ईसु उमने के कहलक कि “आकास लेक सैतान के बिजली केर समान गिरत के देइख आहों। 19 आर देखा, मोयँ तोहरे के सैतान केर सउब सक्ति केर ऊपरे अधिकार दे आहों। तोहरे साँप आर बिछु गिला के गोड़ लेक मिसे पारबा, आर केकरो लेक कोनो हानी नाइ होई। 20 होलउ तोहरे इटाय रीझे ना होबा, कि दुस्ट आत्माउ तोहरेक अधीने आहयँ। किन्तु इटाय आनन्दित रहा न तोहरेक नाम सरग माहने लिखल आहे।”
ईसु परमेसर के धन्यबाद देलक
21 आर ओहे खने परभु ईसु, पबित्र आत्माय दोमे रिझे होलक, आर ऊ कहलक, “ए बाप, सरग आर धरती केर मालिक, मोयँ तोके धन्यबाद दे तहँ कि तोयँ ई काथा गिला के संसार केर नजइर माहने बुध्दिमान आर ग्यानी गिला लेक लुकाय कहन राखले, आर तोयँ एसन गिला ताहाँ परगट करले कि जे छोटे छुवा केर समान आहयँ। ए बाप, तोर धन्यबाद होवुक, काहेकि तोके एहे टाइ बढ़ियाँ लागलक।” 22 आरो ईसु कहलक, “मोर बाप मोके सउब टाइ जिमा दे आहे। आर बाप के छोइड़ कहन केउवे नाइ जानोयँला कि बेटा के हेके, केबल बेटा के छोइड़ कहन केउवे नाइ जानोयँला कि बाप के हेके, आर केबल ऊ लोग गिलाइ बाप के जानेक पारबयँ जे गिला पासे बेटा परगट करी।” 23 आर ईसु आपन बारो टा चेला गिला बाटे घुइर कहन उमन केइ कहलक, कि “तोहरे धन्य हेका, कि तोहरे ई सउब के देखो ताहा। 24 काहेकि जे गिला के तोहरे सुनाला आर देखाला, उके पहिलेक भबिस्यबक्ता आर राजा गिला सुनेक आर देखेक चाहत रहयँ, किन्तु एसन नाइ होय पारलक।”
एक टा दयालु सामरिया लोग केर कहबी काथा
25 आर देखा एक झन मूसा केर नियम जानेक वाला उइठ कहन ई कइह के ईसु केर परीक्खा करलक कि “ए गुरु, अनन्त जीबन पायेक तेहें मोयँ का करमूँ?” 26 सेखन ईसु उके कहलक, “पबित्र शास्त्र माहने का लिखल आहे? उके तोयँ का रकम पढ़िसला?” 27 ऊ लोग टा जबाब देलक कि “तोयँ परभु परमेसर लेक आपन सम्पुरन हिरदय लेक, सम्पुरन प्रान लेक आर सम्पुरन बुध्दि केर संगे आपन पड़ोसी गिला के आपन समान प्रेम करिन।” 28 तखन ईसु उके कहलक, “तोयँ ठीक कहतिस, एबार तोयँ एसनेइ करिन, तो तोयँ हामेसाक तेहें जीन्दा रहबे।” 29 किन्तु धरमगुरु आपन के धरमी ठहरायेक बिचारे ईसु के पुछलक, “तो मोर पड़ोसी के गिला हेकयँ?” 30 सेखन ईसु उमने के एक टा उदाहरन केर दाराय जबाब देलक, “एक टा मानुस यरुसालेम लेक यरीहो नगर जात रहे। आर उके चोर-डाकू गिला टाका-पयसा आर लुगा-फाटा के लुइट लेलयँ आर माइर कहन आधमोरा कइर कहन परालयँ। 31 संजोके एक टा याजक ओहे डहरे जात रहे, ऊ उके देखलक तो ऊ धार होय कहन चइल गेलक। 32 आर ओहे रकमइ एक टा लेबीb टाउ हुन्दे लेक बाहरालक आर उकर ताहाँ पहँइच आलोक आर जखन उके देखलक तो ऊ धार होय कहन चइल गेलक। 33 लेकिन एक टा सामरिया लोगc ओहे डहर होय कहन जात रहे, आर उकर ताहाँ पहँचोलक, आर जखन ऊ उके देखलक, तो उके दया आलक। 34 आर ऊ उकर पासे जाय कहन उकर घावे तेल आर दखरस लगाय कहन पाटी बाइन्ध देलक। आर उके आपन गाधा माहने चेढ़ाय कहन एक टा धरमसालाd लेगलक। आर उके सेबा-सुसार करलक। 35 आर ऊ दोसर दिन धरमसाला केर मालिक के चाँदी केर दुई टा सिक्का दे कहन कहलक, न इकर सेबा-सुसार करिन, जे खरचा होइ मोयँ तोके घुरत के दे देमूँ।” 36 ईसु धरमगुरु के कहलक, एबार तोयँ कहिंग, ऊ तीनो मइधे कोन टा उकर पड़ोसी होलक। 37 ऊ ईसु के जबाब देलक, “ओहे, जे उकर ऊपरे दया करलक।” तखन ईसु उके कहलक कि “हों ठीक आहे, एबार जा आर तोयों एसने करिन।”
ईसु मारथा आर मरियम केर घर गेलक
38 जखन ईसु आर उकर चेला गिला यरुसालेम नगर जात रहयँ, तो एक टा गाँवे सामालयँ। हुआँ एक टा मारथा नाम केर बेटी छुवा उमने के आपन घरे रहेक तेहें लेगालक। 39 मारथा केर एक टा बहिन रहे, उकर नाम मरियम रहे। आर मरियम ईसु केर गोड़ ताहाँ बोइस कहन उकर बचन के सुनत रहे। 40 लेकिन मारथा सेबा-सुसार करत-करत के चिन्ता करे लागलक। आर ऊ ईसु पासे आय कहन उके कहलक, “ए परभु, तोके रोचिको चिन्ता नेखें कि मोर बहिन, सेबा सुसार करेक खातिर मोके एकलाई छोइड़ दे आहे, उके मोर साहेता करेक तेहें कहिंग।” 41 लेकिन ईसु उके जबाब देलक, “मारथा, ए मारथा तोयँ ढेइर बात केर चिन्ता करिसला, आर बेयाकुल रहिसला। 42 केबल एक टाइ बात केर जरुरी आहे, आर मरियम ऊ बढ़ियाँ भाग के चुइन आहे। जेके केउ उके कबोउ लुटे नाइ पारबयँ।”