9
ईसु बारो टा चेला गिला के परचार करे पइठालक
1 एक दिन ईसु आपन बारो टा चेला गिला के डाकलक। आर उमने के रोगी गिला के बेस करेक तेहें आर सउब दुस्ट आत्मा गिला के बाहरायेक तेहें सक्ति आर अधिकार देलक। 2 आर उमने के परमेसर केर राइज केर सुसामाचार सुनायेक तेहें आर रोगी गिला के बेस करेक तेहें पइठालक। 3 ईसु चेला गिला के सिखालक कि “डहर चलेक तेहें तोहरे कोनो ना लेबा, ना तो ठेंगा, ना तो थोइला, ना खायेक तेहें रोटी-पिठा, ना पयसा आर ना तो पिन्धेक तेहें दुई जोड़ा लुगा। 4 आर गाँवे जेकर घरे तोहरे के रहेक जायगा देबयँ हुँआई रहबा, जखन तक दोसर गाँव जायेक तेहें बिदाई नाइ लेबा। 5 किन्तु जदि हुँआ केर लोग गिला तोहरेक काथा के नाइ सुनबयँ, तो हुँआ लेक निकोइल जाबा, आर निकलोत के तोहरे आपन गोड़ेक धूरा के झाइड़ देबा, ताकि ऊ गाँव केर लोग गिला जानून कि एहे निहारे एक दिन परमेसर उकर बचन के नाइ सुनइया गिला के खिसाई आर झाइड़ कहन भिनु कइर देई।” 6 तेकर बादे चेला गिला गाँव-गाँव जाय कहन सुसामाचार परचार करे लागलयँ। आर सउब ताहाँ रोगी गिला के बेस करते गेलयँ।
राजा हेरोदेस केर बेयाकुल होयेक
7 जखन राजा हेरोदेस, ईसु केर काम केर बारे सुनलक आरो लोगेक मुँहे सुनलक कि योहन बपतिस्मादाता फिन बाँइच उइठ आहे, तखन ऊ ईसु के हेके? सोंइच कहन बेयाकुल होय गेलक। 8 किन्तु दोसर लोग गिला कहत रहयँ कि ऊ एलियाह हेके, चाहे दोसर पुरखा केर भबिस्यबक्ता लेक केउ बाँइच उइठ आहे। 9 किन्तु हेरोदेस कहलक “मोयँ तो योहन केर मुड़ काटुवाय आहों, एबार ई, के हेके? जेकर बारे मोयँ एसन काथा के सुनो तहँ।” आर ऊ ईसु के देखेक हिंछा राखलक।
ईसु पाँच टा रोटी आर दुई टा माछ लेलक
10 ईसु केर बारो टा प्रेरित गिलाa घुइर आय कहन जेटा उमनेक दाराय जोतना काम होय रहे, उके कइह देलयँ। तेकर बादे ईसु चेला गिला संगे भिनुवे समय बितायेक तेहें बैतसदा नगर जाय लागलक। 11 लेकिन लोग गिला जानलयँ आर उकर पेछु-पेछु गुड़ियाय लागलयँ, तो ईसु रिझे उमनेक संगे भेंट करलक, b आर उमने के परमेसर केर राइज केर बारे बतायेक लागलक, आर ऊ रोगी गिला कोउ बेस करलक। 12 सांझ केर समये उकर बारो टा चेला गिला ईसु के बिनती करलयँ कि, “ई सुनसान जायगाय कोनो खायेक-पियेक नाइ पावाई, सेइ तेहें ऊ लोग गिला के आस-पासेक गाँवे पइठाय देहिन। ताकि उमने जाय कहन आपन खायेक आर रहेक तेहें कोनो उपाय करुन।” 13 किन्तु ईसु उमन के कहलक, “तोहरेइ उमने के खायेक तेहें देवा।” तखन चेला गिला कहलयँ, “इटा तो असम्भव आहे! काहेकि हामरेक पासे केबल पाँच टा रोटी आर दुई टा माछ आहे। जदि हामरे जाय कहन सउब लोगेक तेहें किनब होले तो होय पारे।” 14 आर लोग गिला लगभग पाँच हाजार बेटा छुवा गिलाइ रहयँ। तखन ऊ चेला गिला के कहलक, “उमने के तोहरे पाचास टा कइर कहन पांइते-पांइते बोइसाय देवा।” 15 सेखन चेला गिला ओसने करलयँ, उमने सउब के बोइसाय देलयँ। 16 ईसु ओहे रोटी आर माछ के हाँथे लेलक, आर ऊपर सरग बाटे देइक कहन परमेसर के धन्यवाद देलक, आर ऊ ई रोटी के खेंचा कइर-कइर कहन चेला गिला के देते गेलक, आर उमने लोग गिला के देलयँ। 17 आर देखा, एसन चमत्कार होलक कि सउब लोग गिला पेट भोइर खालयँ, तेऊ रोटी बांचलक आर बारो खाँची होय गेलक।
पतरस ईसु के मसीह परगट करलक
18 फिन ईसु जखन एकलाई बिनती करत रहे, आर चेला गिला उकर संगे रहयँ तो ऊ उमने के पुछलक, कि “मोयँ के हेकँ, मोर बारे लोग गिला का कहयँला?” 19 तखन उमने ईसु के कहलयँ कि, “केउ तो बपतिस्मा देवइया योहन हेके, आर थोड़ेक लोग गिला एलियाह हेके कहयँला, आर दोसर लोग गिला केर कहेक मोताबिक पुरखा केर भबिस्यबक्ता गिला लेक केउ बाँइच उइठ आहे।” 20 सेखन ईसु उमने के पुछलक, “किन्तु तोहरे मोके का कहताहा?” तखन पतरस कहलक, तोयँ परमेसर केर मसीह हेकिस, यानि परमेसर केर पइठाल राजा जे लोग गिला केर उद्धार करइया। 21 किन्तु ईसु उमने के माना करलक कि इके केकरो पासे नाइ कहबा।
ईसु केर भबिस्यबानी
22 आरो कहलक, “ई आबइसो आहे कि मानुस केर बेटा दोमे दुःख उठाई, आर नेताc आर प्रधान याजक गिलाd आर शास्त्र-ग्यानी गिलाe उके तुछ समइझ कहन माइर मोराबयँ आर ऊ तीसर दिन माहने फिन बाँइच उठी।”
दुःख उठायेक
23 तेकर बादे ऊ सउब लोग गिला के कहलक, “जदि केउ मोर चेला बने खोजयँला तो उके आपन हिंछा आर सुविधा के छोड़ेक होई, आर उके रोज दिन आपन कुरुसf उठाय कहन मोर पेछुवे चले होई।” 24 काहेकि जे गिला आपन प्रान के बांचाय चाहयँला तो ऊ आपन प्रान के गावाँय देई। लेकिन जे गिला मोर खातिर आपन प्रान के गावायँला तो ओहे आपन प्रान के बांचायँला। 25 आर जदि मानुस गोटा संसार के हाँथियाय लेइ आर आपन प्रान के गावाँय देई तो उके का फयदा होई? 26 आर जे गिला मोर लेक आर मोर काथा टाय लाजायँला, तो मोयँ मानुस केर बेटा, जखन आपन बाप आर पबित्र सरग दूत केर महिमा संगे आमूँ सेखन उमनेक संगे लजामूँ। 27 इटा सत हेके, कि हियाँ जोतना लोग आहयँ उमनेक मइधे थोड़ेक लोग गिला तबले नाइ मोरबयँ जबले परमेसर केर राइज के नाइ देइख लेबयँ।
ईसु केर रुप बदलेक
28 आठ दिनेक बादे ईसु आपन संगे पतरस, याकूब आर योहन के ले कहन प्राथना करेक तेहें पाहाड़ गेलयँ। 29 जखन ऊ प्राथना करत के उकर चेहरा केर रुप बदइल गेलक। आर उकर लुगा चारका होलक आर चमके लागलक। 30 आर देखा दुइटा अदमी आलयँ मूसा आर एलियाह भबिस्यबक्ता, जे ढेइर पहिले मोइर चुइक रहयँ उकर संगे गोल्फो करत रहयँ। 31 उमनेक रुप चमकीला आर देखेक माहने सुन्दर रहे। उमने ईसु केर मिरतु केर बारे गोल्फो करत रहयँ जेटा यरुसालेम माहने होयेक वाला रहे। 32 पतरस आर उकर संगी भरखर नींदे रहयँ। जखन उमने जागलयँ तो ईसु केर महिमा के आर उकर संगे ऊ दुइयो अदमी के ठाड़ होल देखलयँ। 33 जखन उमने उकर ताहाँ लेक जाय लागलयँ, तो पतरस अकबोकाय कहन बिना सोचे-बुझे कहे लागलक “ए मालिक, हामरे हियाँ रहतोली होले बढ़ियाँ होतलक, आर हामरे तीनटा मंड़पg बनाब, एक टा तोर तेहें, दोसरा मूसाक तेहें आर तीसरा एलियाक तेहें।” 34 पतरस एसन कहत रहे सेखन ऊपर लेक बादेइर आय कहन उमने के ढाँइप देलक। तो चेला गिला दोम डारालयँ। 35 आर ऊ बादेइर लेक एक टा आवाज आलक कि, “इटा मोर बेटा हेके, आर मोर चुनल हेके, तोहरे इकर सुना।” 36 आर जखन आवाज बन्द होलक तो ईसु हुआँ एकलाई रहे, आर चेला गिला देखल घटना के ढेइर दिन तक केकोउ नाइ बतालयँ।
भूंत धरल छुवा के बेस करेक
37 आर दोसर दिन एसन होलक कि जखन ईसु, आपन चेला पतरस, योहन आर याकुब संगे हेंठे नाभलक, तो एक टा बेजाइन लोगेक भीड़ उकर संगे भेंट करलयँ। 38 आर देखा, ऊ भीड़ माहान लेक एक टा मानुस दोमे आंटे कहलक, “ए गुरु मोयँ बिनती करँला कि मोर एक टा बेटा आहे, 39 उके एक टा भूंत धोरेला, सेखन ऊ आचकाय चमइक उठेला आर ऊ उके एसन मोचड़ेला न उकर मुँह लेक फेन बाहरायला, आर उके झिक-झोड़ाय कहन दुःख देला आर ढेइर देरी बादे छोइड़ देला सेइ तेहें उकर ऊपरे दया करिन। 40 मोयँ तोर चेला गिला के कोतना गोड़ लागलँ कि ऊ भूंत टाके बाहराउन, किन्तु बाहराय नाइ पारलयँ।” 41 सेखन ईसु खिसाय कहन कहलक, “ए सउब अबिसासी आर ढीठ लोग गिला मोयँ तोहरेक संगे कोतना दिन तक रहमूँ? आपन छुवा टाके हियाँ आना।” 42 उमने छुवा टाके आनत रहयँ सेहे खने भूंत टा उके पटइक कहन गिरालक। लेकिन ईसु ऊ भूंत टाके धमकाय कहन बाहरालक आर ऊ छुवा टाके बेस कइर कहन उकर बाप के जिमा देलक। 43 तखन सउब लोग गिला परमेसर केर ई बोड़े काम के देइख कहन चकित होलयँ।
ईसु आपन मिरतु केर भबिस्यबानी
जखन सउब लोग उकर काम लेक जेटा ऊ करत रहे अचम्भित रहयँ। सेखन ईसु आपन चेला गिला के कहलक, 44 “सुना! मोयँ जे तोहरेक मांझे मानुस केर रुपे आय आहों, मोके लोगेक हाँथे धोरुवाल जाई, सेइ तेहें मोर काथा के सुना आर उके इयाद राखा।” 45 किन्तु उकर चेला गिला ई काथा टाके नाइ बुझलयँ, काहेकि इटा उमनेक तेहें छिपल रहे ताकि जाने नाइ पारुनका आर उमने ई काथा टाकेर बारे उके पुछेक तेहोंउ डरात रहयँ।
सउब लेक बोड़े के हेके?
46 एक दिन चेला गिला आपस माहने विवाद करे लागलयँ कि हामरेक मइधे के बोड़े हेकी? 47 तो ईसु उमन केर मनेक बिचार के जाइन कहन एक टा छुवा के आपन पासे ठाड़ करलक, 48 आर उमने के कहलक, जे गिला मोर नामे ई छुवा के अपनायला, ऊ मोके अपनायला, आर जे गिला मोके अपनायला ऊ परमेसर के अपनायला। तोहरे दोसर केर संगे का निहार नम्र बेबहार कराला? ओहे टाइ तोहरेक बोड़े होयेक नापी हेके।
ईसु केर नामे दुष्ट आत्मा के निकलायेक
49 ईसु केर एक टा चेला योहन उकर पासे आय कहन कहलक, “ए गुरु, हामरे एक टा अदमी के तोर नामे दुस्ट आत्मा के बहरात के देखली। हामरे उके माना करली, काहेकि ऊ हामरेक संगे तो नी चलेला।” 50 ईसु उमन के कहलक, “उके काहे माना करला, माना नाइ करेक चाही, काहेकि जे तोहरेक बिरोध माहने नेखे, ऊ तोहरेक बाटेइ आहे।”
ईसु केर बिरोध
51 जखन ईसु केर सरग जायेक केर दिन पूरा होयेक वाला रहे, तो ऊ यरुसालेम जायेक ठाइन लेलक। 52 आर आपन दूत के आघुवे पइठलक कि उमने सामरी लोग गिला केर एक टा गाँवे जाय कहन उकर रहेक तेहें उपाय करुन। 53 किन्तु गाँवेक लोग उके उमनेक ताहाँ रहेक तेहें माना करलयँ काहेकि ईसु यरुसालेम जावइया रहे।h 54 ई काथा टाके सुनलयँ तो उकर चेला याकूब आर योहन ईसु के कहलयँ “हे परभु, का हामरे उमने के भसम करेक तेहें सरग लेक आइग गिरायेक आग्यां देब?” 55 किन्तु ईसु उमने के देइख कहन रगड़ोलक, [आर कहलक तोहरे केसन धाराक लोग हेका? 56 काहेकि मोयँ लोग केर प्रान के नास करेक तेहें नाहीं बरन्चो बांचायेक तेहें आय आहों।i] तेकर बादे उमने दोसर गाँव बाटे चइल गेलयँ।
ईसु केर चेला बनेक किमत
57 जखन उमने डहरे जात रहयँ तो एक झन ईसु के कहलक, जोन्दे-जोन्दे तोयँ जाबे मोयँ तोर पेछुवे-पेछुवे जामूँ। 58 ईसु उके कहलक, “सियार केर रहेक तेहें लाता रहेला आर चरइ केर तेहें रहेक ठायँ, लेकिन मोर खातिर ई संसारे मुड़ राखेक तेहोंउ जायगा नेखे।” 59 ईसु दोसर लोग टाके कहलक, मोर संगे चल तो ऊ कहलक, ए गुरु, मोयँ जामूँ लेकिन मोर बाप केर मोरेक बादे। 60 ईसु उके कहलक, जे गिला अनन्त जीबन नाइ पाय होयँ उमने के मुरदा गाड़ेक तेहें चिन्ता करे दे। लेकिन तोयँ संसार माहने परमेसर केर राइज केर बारे सुसामाचार सुनाव। 61 आरो एक झन कहलक, ए परभु, मोयँ जामूँ लेकिन पहिल मोके घरेक लोग संगे बिदाई ले लेमूँ। 62 ईसु उके कहलक, जे गिला हारे हाँथ राइख कहन पेछु बाटे देखयँला उमने परमेसर केर राइज लाइख निखयँ।