8
ईसु केर चेला गिला
1 इकर बादे ईसु नगर-नगर आर गाँव-गाँव परचार करत रहे, आर परमेसर केर राइज केर सुसामाचार सुनात रहे। 2 आर उकर संगे बारो झन चेला गिला आर थोड़ेक बेटी छुवा गिलाउ जे दुस्ट आत्मा लेक छुटकारा पाय रहयँ, आर बिमारी लेक बेस होय रहयँ से गिलाउ रहयँ। उमनेक संगे मरियम जे मगदलिनीa कहात रहे, जेकर लेक सात टा दुस्ट आत्मा बाहराय रहयँ, 3 आर हेरोदेस राजा केर खूजा नामेक खजान्ची केर घरइया योअना, आरो सुसन्ना, आर इमन संगे आरो ढेइरे बेटी छुवा गिला जे आपन धन केर दाराय ईसु केर सेबा करत रहयँ।
बिहिन बुनेक वाला कहबी काथा
4 आर जखन संगी भीड़ जामा होलयँ, आर नगर-नगर केर लोग गिला उकर ताहाँ आत रहयँ, तो ऊ उमने के कहबी काथा सुनालक। 5 एक टा किसान बिहिन बुनेक तेहें बाहरालक, तो बुनत के थोड़ेक बिहिन टा डहर धारे गिरलक सेटा खुन्दालक आर चरई गिला उके खाय देलयँ। 6 थोड़ेक बिहिन रुगड़ी भूईंये गिरलक सेटा चाँड़ेइ जनमलक, लेकिन बेस निहार जेइर नाइ धोरेक चलते सुइख कहन मोइर गेलक। 7 आर थोड़ेक बिहिन झूंड़ माहने गिरलक, सेटा जनमलक लेकिन बाढ़त-बाढ़त के झूंड़ टा उके बाढ़े नाइ देलक। 8 आर थोड़ेक बिहिन टा बढ़ियाँ भूईंये गिरलक, सेटा जनमलक आर सौ गुना अन ऊपज होलक। ई कइह कहन ऊ आंटे कहलक जेकर कान आहे उमने सुइन लेवा। 9 उकर चेला गिला उके पुछलयँ, ई कहबी काथा केर अर्थ का हेके? 10 ईसु उमन के जबाब देलक, तोहरे के परमेसर केर राइज केर भेद बाताल जाय आहे। किन्तु आरो गिला के कहबी काथा सुनाल जायला। काहेकि उमने देखत कोउ नाइ देखयँला आर सुनत कोउ नाइ बुझयँला।
कहबी काथा केर अर्थ
11 कहबी काथा केर अर्थ एसन आहे, “बिहिन परमेसर केर बचन हेके। 12 डहर धारेक गिरल बिहिन टा ऊ गुला हेकयँ जे गिला परमेसर केर बचन के सुनयँला, लेकिन सैतान उमनेक मन लेक बचन के चोराय लेला। आर उमने के बिसास करेक आर उद्धार पायेक तेहें रोकेला। 13 आर रुगड़ी भूईंये गिरल बिहिन टा उमन हेकयँ जे परमेसर केर बचन के सुइन कहन तुरंत बेजाइन खुसिये माइन जायँला। लेकिन बेस निहार उमनेक हिरदय माहने जेइर नाइ धोरेक चलते परीक्खा केर समय उमनेक बिसास टा सिराय जायला। 14 आर झूंड़ माहने गिरल बिहिन उमन हेकयँ, जे गिला परमेसर केर बचन के सुइन कहन बिसास करयँला। लेकिन थोड़ेक दिन केर बादे जीबन केर चिन्ता, धन आर रीझ-रंग माहने फांइस कहन उकर बिसास टा सिराय जायला। एसन लोग गिला दोसर के साहेता नाइ करे पारबयँ कि उमने परमेसर केर बचन के सुनाय कहन बिसास कराबयँ। 15 आर उपज वाला भूईं केर मतलब ईमानदार आर बढ़ियाँ हिरदय वाला लोग गिला के दरसायला, जे परमेसर केर बचन के सुनयँला आर पालन करयँला, उमने के देइख कहन दोसर लोग गिलाउ परमेसर केर ऊपरे बिसास करबयँ।”
लोम्फो केर कहबी काथा
16 आर केउ लोम्फो बाइर कहन कोनो चीज टाय नाइ ढापयँला, आर खाइट केर हेंठोउ नाइ राखयँला। किन्तु दिरखा केर ऊपरे राखयँला ताकि सउब बाटे आलो होवुक। 17 आर कोनो छिपल नेखे, जे परगट नाइ होउ, आरो कोनो गुपूत नेखे जे कि परगट नाइ होइ। 18 सेइ तेहें हुँसयारे रहा कि तोहरे का रकम सुनाला? काहेकि जेकर पासे आहे, उके आरो देल जाइ आर जेकर ताहाँ नेखे उके उटा कोउ लेल जाइ, जेके ऊ आपन बुझेला।b
ईसु केर मांय आर भाई
19 आर ईसु केर मांय आर भाई उकर ताहाँ भेंटायेक तेहें आय रहयँ, लेकिन भीड़ केर चलते उकर संगे भेंट करेक नाइ पारलयँ। 20 तखन लोग गिला ईसु के कहलयँ, “तोर मांय आर भाई तोर संगे भेंटायेक तेहें बाहिरे आय आहयँ।” 21 सेखन ईसु उमने के जबाब देलक, कि “मोर मांय आर भाई ई गिला हेकयँ जे परमेसर केर बचन के सुनयँला आर उके मानयँला।”
ईसु झील माहने हावा-बसात के सांत करेला
22 एक दिन ईसु आर उकर चेला गिला नाउका माहने चेढ़लयँ। आर ईसु उमने के कहलक, कि “आवा हामरे झील केर ऊ पार जाबिक” आर उमने चइल गेलयँ। 23 आर जखन नाउका चलत रहे, तो ईसु निंदाय गेलक, आर झील माहने आचकाय भयंकर हावा-बसात आर तूफान आलक। तखन नाउकाय पानी भोरे लागलक, उमने बेजाइन खातराय पइड़ गेलयँ। 24 तखन उमने ईसु ताहाँ आय कहन उके जागालयँ आर कहलयँ, मालिक, मालिक, हामरे डुबे लाइगाही। सेखन ईसु उठलक आर हावा-बसात आर तूफान के आंटे कहलक “थइम जा आर सांत होय जा” आर तुरते हावा-बसात आर तूफान सांत होय गेलक, आर उमने संकट लेक बांइच गेलयँ। 25 आर ईसु चेला गिला के पुछलक तोहरेक बिसास काहाँ आहे? तखन चेला गिला भकुवाय गेलयँ, आर उमने डाराय गेलयँ आर आपस माहने कहा-कही होय लागलयँ। ई के हेके? जे हावा-बसात आर तूफान टाउ इकर काथा के मानेला।
दुस्ट आत्मा धोरल लोग टाके बेस करेक
26 फिन उमने गिरासेनिया प्रदेस माहने पहँइच गेलयँ, जे गलील केर सामने आहे। 27 आर जखन ईसु नाउका लेक नाभलक। तो ऊ नगर केर एक टा लोग भेंटालक, जेके ढेइरे दुस्ट आत्मा धोइर रहयँ। ऊ लुगा फाटा नाइ पिन्धत रहे, आर घरे नाइ बल्कि मुरदार घाटे रहत रहे। 28 आर जखन ऊ ईसु के देखलक, तो चिचयाय कहन उकर सामने भूईंये गिरलक आर उके कहलक, “ए महान परमेसर केर बेटा ईसु, मोके तोर संगे का काम? मोयँ तोके बिनती करँला कि तोयँ दया कइर कहन मोके कोस्टो ना देहिन।” 29 काहेकि ईसु दुस्ट आत्मा के आग्यां देत रहे कि उके छोइड़ देउक। दुस्ट आत्मा उके सउब समय आपन अधीन माहने राखत रहे, जेकर चलते ऊ बाँधल सिकड़ी गिला कोउ भांइग कहन बोने पारात रहे। ऊ दुस्ट आत्मा केर अधीन माहने रहे। 30 ईसु दुस्ट आत्मा के पुछलक कि “तोयँ के हेकिस, तोर का नाम हेके?” तखन ऊ जबाब देलक “सेना” काहेकि ऊ लोग टाके हजार लेक बेसी दुस्ट आत्मा धोइर रहयँ। 31 आर ऊ ईसु के कहलक, कि मोके सोंग-सोंगों गाड़हा माहने जायेक तेहें ना कहबे। 32 हुँआ पाहाड़े ढेइरे सुवइर गिला चरत रहयँ। दुस्ट आत्मा टा बिनती करलक,, कि मोके ऊ सुवइर गिलाय पइठाय देहिन, तखन ईसु उके सुवइर केर गोठे जायेक आग्यां देलक। 33 तखन ऊ दुस्ट आत्मा गिला ऊ लोग लेक बाहराय कहन सुवइरे सामालयँ, आर सुवइर गिला पाहाड़ लेक हेंठे समुन्दरे गिर कहन डुइब मरलयँ।
34 ई देइख कहन सुवइर चारवहा गिला दोमे डारालयँ आर उठिन लेक पारालयँ। उमने नगरे आर गाँवे जाय कहन खबर देलयँ। 35 सेखन लोग गिला केर भीड़ तुरंत ई घटना के देखेक तेहें आलयँ। तो उमने देखलयँ कि ऊ लोग टाके जेके पहिले दुस्ट आत्मा धोइर रहयँ, उके लुगा फाटा पिन्धल आर बेस होय कहन सान्त मने ईसु केर गोड़ पासे बइसल पालयँ, एसन देइख कहन सउब अचम्भित होय गेलयँ। 36 ई घटना के जे गिला आपन आँइखे देइख रहयँ, उमने दोसर गिला के बताय लागलयँ कि दुस्ट आत्मा लेक धोरल लोग टा का रकम बेस होलक। 37 तखन सउब लोग गिला ईसु के बिनती करलयँ, कि हामरेक ताहाँ चइल जा। काहेकि उमने के बेजाइन डर सामाय गेलक। सेइ तेहें ईसु नाउकाय चेइढ़ कहन झील केर दोसर बाटे लेक जाय लागलक। 38 सेखन जे मानुस लेक दुस्ट आत्मा गिला बाहराय रहयँ, ऊ ईसु के बिनती करे लागलक कि मोकोउ तोर संगे-संगे रहे देहिन। किन्तु ईसु उके माना कइर देलक। 39 आर कहलक, कि “तोयँ आपन घर घुइर जाहिन, हुँआ जाय कहन लोग गिला के बाताइन, परमेसर तोर तेहें कतना बोड़े काम कइर आहे।” तखन ऊ घुइर कहन गोटा नगर माहने परचार करे लागलक, कि ईसु मोर तेहें कतना बोड़े काम कइर आहे।
याईर केर मरल बेटी आर एक टा रोगी बेटी छुवा
40 जखन ईसु घुरत रहे, तो लोग उकर संगे भेंटाय कहन बेजाइन खुसी होलयँ। काहेकि उमने सउब उकर आसरा देखत रहयँ। 41 हुँआ याईर नामेक एक टा अदमी रहे, जे आराधनालय केर सरदार रहे। ऊ आलक आर ईसु केर गोड़े गिर कहन बिनती करे लागलक कि मोर घर चल। 42 काहेकि उकर बारो बच्छर केर एके टा दुलार बेटी रहे, ऊ मरइया रहे। जखन ईसु जात रहे, तखन लोग केर भीड़ उकर ऊपरे गिर पड़त रहयँ।
43 हुँआ एक टा बेटी छुवा रहे, जेकर बारो बच्छर लेक लोहू गिरेक रोग रहे। ऊ सउब आपन धन-सम्पति के बेस होयेक तेहें बोइध बनिया गिला केर पिछु खरचा कइर सिरालक। तेऊ ऊ केकरो हाँथ लेक बेस नाइ होलक। 44 ऊ पेछु बाटे लेक आय कहन ईसु केर पिन्धल लुगा के छूलक, तो तुरते उकर लोहु गिरेक टा बन्द होय गेलक। 45 तखन ईसु पुछलक, कि “मोके के टा छुलक?” सउब गिला दोदाय लागलयँ, तखन पतरस उके कहलक “ए गुरु, तोके तो चाइरो बाटे लेक भीड़ केर लोग गिला जातयँला।” 46 लेकिन ईसु कहलक, केउ मोके जड़ूर छूई आहे। काहेकि मोयँ जाइन लेलों मोर लेक सक्ति निकोइल आहे। 47 आर जखन ऊ बेटी छुवा टा देखलक कि मोयँ लुके नाइ पारमूँ, तखन डरे काँपत के आलक आर ईसु केर गोड़े गिर गेलक। आर सउब लोग गिला केर सामने कइह देलक कि मोयँ का चलते ईसु के छूई रहे, आर एबार का रकम तुरंत बेस होलक। 48 तखन ईसु उके कहलक, “बेटी तोर बिसास टाइ तोके बेस कइर आहे, तोयँ खुसी लेक चइल जा।”
49 आर जखन ईसु ऊ बेटी छुवा संगे बात करत रहे, सेहे खने याईर केर घर लेक एक टा अदमी आय कहन कहलक, “तोर बेटी मोइर गेलक, गुरु के कोस्टो ना देहिन।” 50 तखन ईसु सुइन कहन उके कहलक, “ना डाराबे, केबल बिसास राख, तोर बेटी बांइच जाई।” 51 जखन उमने घर पहँचोलयँ, तो ईसु बेटी छुवा केर मांय-बाप के आर पतरस, याकूब, आर यूहन्ना के छोइड़ कहन केकोउ घर भीतर ढुके नाइ देलक। 52 सउब लोग गिला उकर तेहें काँदत रहयँ, किन्तु ईसु उमन के कहलक, “ना काँदबा, ऊ मोइर निखे बल्कि निंदा तेहे।” 53 ई सुइन कहन सउब लोग गिला ईसु केर माजाक उड़ालयँ, काहेकि सउब जानत रहयँ कि ऊ मोइर चुइक आहे। 54 तखन ईसु बेटी छुवा केर हाँथ के धोरलक आर उके हाँकालक, “ए बेटी उठ!” 55 ओहे खने उकर जीव टा घुइर आलक, आर ऊ उइठ कहन बोइसलक। ईसु उमन के कहलक, कि “उके कोनो खायक तेहें देवा।” 56 उकर मांय-बाप बेजाइन खुसी होलयँ। लेकिन ईसु उमन के कहलक, “ई घटना केर चरचा केकरो संग ना करबा।”