लूका 7

एक टा सेनापति केर बिसास

¹ जखन ईसु लोग गिला के उपदेस देलक, तेकर बादे ऊ कफरनहूम नगर चइल गेलक। ² तो हुआँ एक टा रोमी सेनापति केर धांगर बीमार रहे। ऊ मोरेक दासा माहने रहे। सेनापति उकर संगे बेजाइन प्रेम राखत रहे। ³ आर जखन सेनापति ईसु केर बारे सुनलक, तो यहूदी धरम केर नेता गिला के ई बिनती करेक तेहें ईसु ताहाँ पइठालक कि ईसु आउक आर उकर धांगर के बेस करुक। ⁴ तखन उमने ईसु ताहाँ आय कहन उके बिनती कइर कहन कहे लागलयँ, “रोमी सेनापति बढ़ियाँ लोग हेके, तोयँ उकर ऊपरे दया करिन। ⁵ काहेकि ऊ हामरेक जाइत गिला केर संगे प्रेम करेला। आर उहे हामरेक ई आराधनालय टाके बनुवाय आहे।” ⁶ ईसु उमनेक संगे-संगे चललक, जखन ऊ उकर घर पहँचा-पहँची रहे। तो सेनापति टा आपन संगी गिला के ई कहेक तेहें पइठालक कि “ए परभु, तोयँ कोस्‍टो ना करबे, काहेकि मोयँ ई लाइख नेखँ कि मोर घरे आबे। ⁷ एहे चलते मोयँ आपन के ई लाइख नाइ बुझलँ कि तोर ताहाँ आमूँ। केबल तोयँ हियाँ लेकेइ कइह देहिन तो मोर धांगर टा बेस होय जाइ। ⁸ मोयों एक टा परेक अधीने आहों। आर सिपाही गिला मोर अधीने आहयँ। जखन मोयँ एक टाके कहँला जा तो ऊ जायला, आर दोसर के कहँला आव तो ऊ आयला। जखन आपन धांगर के कहँला इके करिन चाहे उके करिन तो ऊ उके करेला। सेइ तेहें केबल तोयँ एतना टाइ कहइ देहिन कि ‘ठीक होय जा’ आर मोर धांगर टा ठीक होय जाइ।” ⁹ ईसु सुइन कहन अचम्‍भित होलक। आर भिड़ केर लोग गिला के देइख कहन कहलक, “इसराइल देस केर सउब यहूदी गिला लेक मोयँ आइज तक एक टाउ एसन लोग नाइ देइख रहों। जेकर माहने ई रकम केर बिसास होइ।” ¹⁰ आर सेनापति केर संगी गिला ईसु ताहाँ लेक घर घुइर आलयँ तो देखलयँ कि धांगर टा बेस होय जाय आहे।

राँड़ी बेटी छुवा केर बेटा के जीबन दान

¹¹ ई घटना केर थोड़ेक दिन केर बादे आपन चेला गिला संगे ईसु नाइन नगर गेलक। आर उकर संगे लोग गिला केर बोड़े भीड़ जात रहे। ¹² आर जखन ऊ नगर केर फाटक केर पास पहँचोलक तो देखलक कि लोग गिला एक टा मुरदार टाके बाहरात रहयँ, जे राँड़ी बेटी छुवा केर आपन एके टा बेटा रहे। आर उकर संगे दोमे भीड़ केर लोग गिला काँदले-काँदले जात रहयँ। ¹³ तखन ईसु राँड़ी बेटी छुवा टाके देइख कहन उके दया आलक आर उमने के कहलक ना काँदबा। ¹⁴ आर ईसु पास आय कहन मुरदा बोहल खाइट के छुलक, तो बोहइया गिला ठाड़ होय गेलयँ। तखन ईसु मुरदार टाके कहलक “ए जवान, मोयँ तोके कहतँ उठ।” ¹⁵ आर मुरदा टा तुरते उइठ कहन बोइसलक, आर काथा करे लागलक। आर ईसु उकर माय के जिमा देलक। ¹⁶ एसन देइख कहन लोग गिलाये डर सामाय गेलक। आर उमने परमेसर केर महिमा कइर के कहलयँ कि, “हामरेक मांझे एक टा बोड़े भबिस्‍यबक्‍ता उइठ आहे, आर परमेसर आपन लोग गिला के इयाद कइर के किरपा कइर आहे।” ¹⁷ उकर ई काम केर सामाचार गोटा यहूदिया आर आस पास केर सउब देस माहने फइल गेलक।

योहन बपतिस्‍मा देवइया केर सवाल

¹⁸ आर योहन के उकर चेला गिला ई सउब घटना केर खबर सुनाय देलयँ। ¹⁹ सेखन योहन आपन चेला मइधे दुई झन के डाकलक, आर परभु ताहाँ पुछेक तेहें पइठालक कि “जे मसीह आवइया रहे का ऊ तोहें हेकिस, न हामरे आरो दोसर केर आसरा देखब?” ²⁰ आर उमने ईसु ताहाँ आय कहन कहलयँ कि “योहन बपतिस्‍मा देवइया हामरे के तोर ताहाँ पुछेक तेहें पइठाय आहे कि जे मसीह आवइया रहे का ऊ तोहें हेकिस न आरो दोसर केर आसरा देखब?” ²¹ आर ओहे समय ऊ ढेइर लोग गिला केर रोग दुःख आर दुस्‍ट आत्‍मा धरल गिला के बेस करलक, आर जे गिला आँधरा रहयँ उमने के देखेक सक्‍ति देलक। ²² तखन ईसु योहन केर चेला गिला के कहलक “जे कोनो तोहरे देखाला आर सुइन आहा, उके जाय कहन योहन के कइह देवा कि आँधरा गिला देखयँला, लंगड़ा गिला चलयँला, कोढ़ रोग लेक बेस होयँला, बहिरा गिला सुनयँला, मुरदा गिला के जिन्‍दा करल जायला आर गरीब गिला के सुसामाचार सुनाल जायला। ²³ धन्‍य ऊ आहे जे मोर चलते ठोकर नाइ खायला।”

²⁴ आर जखन योहन केर पइठाल चेला गिला उकर ताहाँ लेक चइल गेलयँ, तखन ईसु योहन केर बारे लोग गिला के कहे लागलक कि “तोहरे बोन माहने का के देखे जाय रहा? का हवा लेक हिलोत-डोलत झुंड़-झाड़ टाके? ²⁵ तो फिन तोहरे का देखे जाय रहा? का बेस-बेस लुगा-फाटा पिंधोल लोग टाके? देखा, जे बेस-बेस लुगा पिन्धयँला उमन सूख-बिलास माहने रहयँला, आर उमने राज महल माहने रहयँला। ²⁶ तो फिन का के देखे जाय रहा? का भबिस्‍यबक्‍ता के? हों मोयँ तोहरे के कइह दे तहँ कि केबल भबिस्‍यबक्ता के नाइ, बरन्चो उकर लेक बोड़े लोग टाके।

²⁷ एहे लोग केर बारे पबित्र सास्त्र माहने लिखल आहे, देख मोयँ आपन दूत के तोर लेक पहिल पइठावँला ताकि तोर तेहें आघु-आघु डहर तेयार करुक।

²⁸ मानुस जाइत माहने केउवे लोग योहन लेक बोड़े निखयँ। किन्‍तु परमेसर केर राइज केर छोटे लेक छोटे लोग टाउ योहन लेक बोड़े आहे। ²⁹ आर सउब साधारन लोग गिला आर मासूल लेवइया गिलाउ योहन लेक बपतिस्मा ले कहन परमेसर के सत परमेसर माइन लेलयँ। ³⁰ लेकिन फरीसी गिला आर मूसा केर नियम सिखाइया गिला बपतिस्मा नाइ लेलयँ। उमन परमेसर केर जोजना के अस्‍वीकार करलयँ।

³¹ तखन ईसु सवाल करलक, मोयँ ई जुगेक लोग केर तेहें का कहे पारम? मोयँ उमने के केकोर संगे जोखा करमूँ। ³² उमने ऊ छुवा गिला केर समान आहयँ। जे बाजार माहने बइस कहन आपस माहने एक-दोसर के डाइक कहन कहयँला हामरे तोहरेक तेहें बाँसी बाजाली आर तोहरे नाइ नाचला। हामरे दुःख मनाली लेकिन तोहरे नाइ काँदला। ³³ काहेकि योहन बपतिस्‍मा देवइया ना तो रोटी खाते आलक आर ना तो दाखरस पीते आलक। लेकिन तोहरे कहाला कि उकर माहने दुस्‍ट आत्मा आहे। ³⁴ मानुस केर बेटा खाते-पीते आय आहे। आर तोहरे कहाला देखा, पेटू आर पियंकड़ लोग आर मासूल लेवइया आर पापी गिला केर दोस्ती हेके। ³⁵ किन्तु जे परमेसर केर ग्‍यान केर पेछुवे चलयँला, उमनेक जीबन लेक ग्‍यान सच्‍चा ठहराल जायला।”

फरीसी केर घरे एक टा बेटी छुवा के छमा

³⁶ फिन एक टा फरीसी उके बिनती करलक कि हामरेक घर माहने तोयँ भात खाय लेहिन। सेखन ईसु धरम-सिच्‍छक फरीसी केर घर माहने जाय कहन भात खायेक तेहें बोइसलक। ³⁷ आर ओहे खने एक टा रन्‍‍डी बेटी छुवा सुनलक कि ईसु फरीसी केर घरे आहे, तो ऊ संगमरमर केर सुंदर ठायँ माहने दामी आँतर भोइर कहन आनलक। ³⁸ आर भीतर जाय कहन ईसु केर गोड़ ताहाँ हेंठु माइड़ कहन काँदे लागलक। आर उकर आँइख पानी लेक ईसु केर गोड़ भींज गेलक तो ऊ आपन चुइल लेक उके पोंछलक। आर उकर गोड़ टाके साराधांग चुमते रहलक। आर आँतर लागाते रहलक। ³⁹ ऊ फरीसी टा एसन देइख कहन जे ईसु के आपन घरे हाँकाय रहे, ऊ आपन मने सोंचे लागलक कि जदि ई मानुस भबिस्‍यबक्‍ता होतलक तो जाइन जातलक कि ऊ जे उके छुवेला, ऊ के आर केसन बेटी छुवा हेके। काहेकि ऊ तो रन्‍‍डी बेटी छुवा हेके। ⁴⁰ ईसु ऊ फरीसी केर मनेक बिचार के जाइन कहन कहलक, “सिमौन मोके तोर संगे कुछ कहना आहे।” तखन सिमौन कहलक, “ए गुरु कहिंग।” ⁴¹ ईसु उके एक टा कोहनी बतालक, एक टा माहाजन, दुई टा लोग के धार देलक। एक झन के पाँच सौ चाँदी केर सिक्‍का आर दोसर लोगटा के पचास टा चाँदी केर सिक्‍का देलक। ⁴² आर दुइयो झन, केउ धार चुकाय नाइ पारलयँ। सेइ खने माहाजन टा दया कइर कहन दुइयो झन के छमा करलक। आर पयसा आपस नाइ लेलक। एबार कहिंग ऊ दुइयो झन मइधे के टा उकर संगे बेसी प्रेम करी? ⁴³ तखन सिमौन उके जबाब देलक, “मोर बिचारे तो ओहे जेकर सउब लेक बेसी करजा माफ होलक।” सेखन ईसु उके कहलक, “तोयँ ठीक जबाब दे हिस।” ⁴⁴ फिन ऊ बेटी छुवा बाटे पलइट कहन ईसु सिमौन के कहलक, “का तोयँ ई बेटी छुवा के देखिसला मोयँ तोर घर आलँ। लेकिन तोयँ मोके गोड़ धोयेक तेहें पानी तक नाइ देले। किन्‍तु ई बेटी छुवा टा आपन आँइख पानी लेक मोर गोड़ के भींजालक आर आपन मुड़ केर चुइल लेक पोंइछ देलक। ⁴⁵ आर तोयँ मोके नाइ चुमले लेकिन जबे लेक मोयँ आय आहों तखन लेक ई मोर गोड़ के चुमेक नाइ छोड़लक। ⁴⁶ आर तोयँ मोर मुड़े तेल नाइ लागाले लेकिन ई मोर गोड़े आँतर लागाय आहे। ⁴⁷ मोयँ तोहरे कहँला, ई बेटी छुवा केर पाप छमा होलक जे सांगी रहे, सेइ तेहें ऊ मोके डोबल प्रेम करेला। लेकिन जेकर कम छमा करल जाय आहे ऊ कम प्रेम करेला।” ⁴⁸ आर ईसु ऊ बेटी छुवा के कहलक, “तोर पाप छमा करल गेलक।” ⁴⁹ तखन ऊ लोग गिला जे उकर संगे भात खायेक तेहें बइस रहयँ। उमने आपस माहने कहे लागलयँ, “ई मानुस टाके काहाँ लेक पाप छमा करेक अधिकार पावालक? जे पाप के छमा करेला।” ⁵⁰ ईसु बेटी छुवा के कहलक, “तोर बिसास टाइ तोर उध्दार कइर आहे, तोयँ सांति लेक जा।”