6
आराम करेक दिन केरोउ परभु
1 फिन परमेसर केर पबित्र दिने ईसु खेत बाटे लेक जात रहे, तो उकर चेला गिला गहम केर बाइल के तोइर कहन हाँथे मोइल-मोइल कहन खाते जात रहयँ। 2 तखन फरीसी गिला कहे लागलयँ, तोहरे एसन काम काहे कोराला जे परमेसर केर पबित्र दिने ई काम करेक उचित नेखे।a 3 ईसु उमने के उत्तर देलक, का तोहरे पबितर सास्तर माहने नाइ पढ़ाला? का तोहरे इटा कबोउ नाइ पइढ़ आहा? कि राजा दाऊद आर उकर संगी गिला भूखे रहयँ, सेखन का करलयँ? 4 ऊ परमेसर केर मंदिर माहने गेलक आर भेंट चेढ़ालb रोटी खालक, आर आपन संगी गिला कोउ देलक। जेके याजक के छोइड़ कहन केकोउ खायेक नाइ भोल रहे। ई काम टाउ तो नियम केर बिरुध्द रहे। 5 फिन ईसु उमने के कहलक, मोयँ आराम करेक दिन केरोउ मालिक हेकँ।c
सुखल हाँथ वाला केर बेस होयेक
6 एक धंव ईसु परमेसर केर पबित्र दिने आराधनालय माहने सिच्छा देत रहे। हुआँ एक टा अदमी रहे जेकर दहिना हाँथ सुइख जाय रहे, 7 फरीसी केर दल आर धरम-सिच्छक उकर ऊपरे दोस लगायेक मोका केर ताक माहने रहयँ, कि देखी आइज उके परमेसर केर पबित्र दिने बेस करेला न नाइ करेला। 8 लेकिन ईसु उमनेक बिचार के जानोत रहे। सेइ तेहें ऊ सुखल हाँथ वाला लोग टाके कहलक, उठ आर भीड़ मांझे ठाड़ होइन। आर ऊ उइठ कहन ठाड़ होलक। 9 तखन ईसु फरीसी केर दल आर धरम-सिच्छक गिला के कहलक, मयँ तोहरे के एक टा सवाल पुछोंला। परमेसर केर पबित्र दिने भालाई करेक उचित आहे न बुराई करेक? प्रान के बांचायेक न नास करेक? 10 ईसु आपन चाइरो बाटे सउब लोग गिला के देखलक आर ऊ लोग टाके कहलक, “आपन हाँथ के लाम्बा करिन।” जेसने ऊ लोग टा आपन हाँथ टाके लाम्बा करलक, आर उकर हाँथ एकदम ठीक होय गेलक। 11 लेकिन उमने सउब बाहिर बाहराय कहन आपस माहने बिचार करे लागयँ कि हामरे ईसु संगे का करब?
ईसु बारो टा चेला गिला के चुनलक
12 ई घटना केर बादे एक दिन ईसु प्राथना करेक तेहें पाहाड़ गेलक। आर गोटा राइत प्राथना करलक। 13 बिहान होत के ईसु आपन चेला गिला के डाकलक आर उमनेक लेक बारो झन के आपन संगे रहेक तेहें चुनलक। उमने के प्रेरित कहलक। 14 उमनेक नाम ई रकम आहे-सिमौन जेकर नाम पतरसd राखलक, आर उकर भाई अन्द्रियास, आर याकूब, आर योहन, आर फिलिप्पुस, आर बरतुलमै। 15 आर मत्ती, आर थोमा, आर हलफई केर बेटा याकूब, आर सिमौन जे जेलोतेसe केर सदस्य रहे। 16 आर याकूब केर बेटा यहूदा आर यहूदा इस्करियोती, जे बाद माहने ईसु के धोखा देलक।
लोग गिला के सिच्छा देयेक आर बेस करेक
17 जखन उमने पाहाड़ लेक हेंट उतरोलयँ। तो ईसु समतल जायगा माहने ठाड़ होलक। तो उकर चेला गिला केर दोमे भीड़, आर गोटा यहूदिया, यरुसालेम, सूर आर सैदा केर समुन्दर केर आस-पास लेक बेजाइन लोग आय रहयँ, उमन सउब हुआँ रहयँ। 18 उमन उकर बचन के सुनेक, आर बिमारी लेक बेस होयेक तेहें आय रहयँ, आर ईसु उमनेक मइधे ढेइर लोग गिला लेक दुस्ट आत्मा के बाहरालक 19 सउब लोग गिला ईसु के छुयेक चाहोत रहयँ, काहेकि उके छुलेइ ईसु लेक सक्ति निकलत रहे, आर जे गिला उके छुवत रहयँ उमने सउब बेस होय जात रहयँ।
आसिर्वाद आर सराप केर बचन
20 ईसु चेला गिला बाटे देइख कहन कहलक, गरीब लोग गिला, तोहरे धन्य हेका, काहेकि परमेसर केर राइज तोहरेक हेके।
21 भुखल लोग गिला तोहरे धन्य हेका, काहेकि तोहरेक भुख मेटाल जाई। आर जे गिला एखन काँदो ताहा तोहरे धन्य हेका, काहेकि समय आई तखन तोहरे हाँसबा।
22 तोहरे धन्य हेका, कि तोहरे मोर चेला हेका, मोर कारने लोग तोहरेक संगे घिरना करबयँ, तोहरे के समाज लेक बाहराय देबयँ, तोहरेक अपमान करबयँ। तोहरेक नाम खराब समयझ कहन काइट देबयँ।
23 जखन एसन होइ, तो आनन्दित होबा आर रिझे नाचा-डेगा, काहेकि तोहरेक तेहें सरग माहने बोड़े ईनाम राखल आहे। काहेकि उमनेक आजा-दादाउ पहिल केर भबिस्यबक्ता गिला संगे एसनेइ बेबहार कइर रहयँ।
24 किन्तु हाय! जे धनिमान आहा, तोहरे दुःखी होबा, काहेकि तोहरे हियाँ ढेइरे सुख भोगला।
25 आर हाय! तोहरे जे एखन पेट भोइर खावाला काहेकि तोहरे उखने भुखे रोहबा। आर हाय तोहरे जे एखन हाँसाला, काहेकि उखने तोहरे दुःखी होय कहन कान्दबा।
26 आर हाय! तोहरे जे एखन लोग गिला केर मान-सम्मान आर इज्जत पावाला, काहेकि उमनेक पुरखाउ झुठा भबिस्यबक्ता केर संगे एसनेइ बेबहार कइर रहयँ।
दुसमन संगे प्रेम करना
27 तोहरे सउब धेयान दे कहन सुना, आपन दुसमन केर संगे प्रेम राखा, जे तोहरेक संगे घिरना करोयंला उमनेक भालाई करा। 28 आर जे तोहरे के सारपायला उमने के आसिर्वाद देवा। आर जे तोहरे के अपमान करेला, उकर तेहें बिनती करा। 29 जदि केउ तोहरे के एक टा गाले थापड़ मारेला, तो दोसर गाल माहनोउ मारेक तेहें देवा। जे तोहरे केर कोट लुइट लेबयँ, तो उमने के झुला कोउ खुसीये दे देवा। 30 आर तोहरेक पासे जेटा आहे, आर जदि केउ तोहरे के माँगोंयला तो उके दे देवा। आर तोहरे के जेटा लेलयँ उके माँगेक कोसिस ना करबा। 31 तोहरे दोसर केर संगे ओसने बेबहार करा, जेसन तोहरे निजे चाहाला कि लोग तोहरेक संगे करुन। 32 जदि तोहरे आपन प्रेम राखइया संगेइ प्रेम करबा तो इकर माहने तोहरेक का बड़ाई? एसन तो अधरमी गिलाउ करयँला। 33 आर जदि तोहरे भालाई करइया गिला केर संगेइ भालाई करबा, तो इकर माहने तोहरेक का बड़ाई? काहेकि पापी लोग गिलाउ एसने करयँला। 34 जदि तोयँ उकेइ पोंइचा देइसला जे घुराय दे पारी, तो का बढ़ियाँ काम करले? एसन तो पापी गिलाउ पापी गिला के आपस पायेक मतलबे पोंइचा देन्ला। 35 आपन दुसमन गिला केर संगे प्रेम राखा। उमनेक भालाई करा, उमने के पोंइचा देवा, आर इकर चिन्ता नाइ करा कि उमने आपस घुराय देबयँ। तबे सरग माहने तोहरे के बोड़े ईनाम पावाई। आर तोहरेक बेबहार महान परमेसर केर सान्तान निहार होइ, काहेकि परमेसर जे धन्यबाद नाइ करयँला उमनेक ऊपरे आर दुस्ट गिलाक ऊपरोउ दया करेला। 36 आर जेसन परमेसर दयालु आहे ओसने तोहरोउ दयालु बना।
दोस ना लागाबा
37 केकरो ऊपरे दोस ना लागावा, नितोर तोहरेक ऊपरोउ दोस लागाल जाई। दोसर गिला संगे दया केर बेबहार करा, तो परमेसर तोहरेक संगोउ दया केर बेबहार करी। आर दोसर गिला के छमा करा, तो परमेसर तोहरे कोउ छमा करी। 38 आर जदि तोहरे दान देबा तो तोहरे कोउ देल जाई। जे निहार लोग नापेक टाय जाइंत-जाइंत कहन, आर हिलाय-हिलाय कहन, गिरत के नापोयँला ओहे रकमे तोहरे कोउ देल जाई। जोन नापुवा टाय तोहरे नापाला ओहे टाय तोहरेक खातिरो नापोल जाई। 39 फिन ईसु उमन के उपदेस देत खने ढेइरे उदाहरन दे कहन कहलक, का एक टा आंधरा दोसर आंधरा टाके डहर देखाय पारी? का उमने दुइयो झन गढ़ाय नाइ गिरबयँ? 40 आर का एक टा चेला केर ग्यान उकर गुरु लेक बेसी होय पारेला? नाहीं, किन्तु जदि ऊ ग्यान माहने सिध्द होई तो आपन गुरु केर बराबइर होय पारी। 41 तोयँ आपन भाई केर आँइखेक छोटे-मोटे लळाf के काहे देखिसला? का आपन आँइखेक बोड़े लळा टा नाइ सुझेला? 42 जखन तोयँ आपन आँइख केर बोड़े लळा के नाइ देखे पारीसला, तो का रकम आपन भाई के कहबे कि आव तोर आँइख लेक लळा टाके निकलाय देमूँ। हे ढोंगी, पोहिल तोयँ आपन आँइख केर बोड़े लळा के निकलाय लेहिन, तबेइ तोयँ आपन भाई केर लळा टाके देइख कहन निकलाय पारबे। तोयँ आपन के देइख कहन सुधार कइरले तबेइ दोसर केर सुधार करे पारबे।
जेसन गाछ तेसन फर
43 बढ़ियाँ गाछ माहने खाराब फर नाइ फरी आर खाराब गाछे बढ़ियाँ फर नाइ फरेला। 44 सउब गाछ केर पहचान उकर फर लेकेइ होयला। आर काँटा-झाँटा झूँड़ माहने आंजीर नाइ फरेला, आर झाड़बेरी लेक आँगूर नाइ फरेला। 45 बढ़ियाँ लोग आपन बढ़ियाँ हिरदय लेक बेस बिचार बाहरायला। आर खराब लोग आपन खराब हिरदय लेक खराब बिचार बाहरायला। जेटा मन माहने भरल रहेला ओहे बिचार टाइ मुँह लेक बाहरायला।
बुध्दिमान आर मुरख केर घर
46 जखन तोहरे मोर कहल नाइ मानाला तो तोहरे मोके हे परभु, हे परभु, काहे कहाला? 47 जोतना लोग गिला मोर ताहाँ आयेन्ला आर मोर आग्यां के सुइन कहन मानयँला, 48 उमने ऊ मानुस केर समान हेकयँ, जे एक टा घर बनालक, ऊ चटाइन माहने नेव गाड़हा खोइन कहन घर बनालक। जखन बाढ़ केर पानी ऊ घर माहने टकरालक, तो कोनो नाइ होलक। काहेकि घरटा चटाइन माहने मजबूत बनल रहे। 49 आर जोतना लोग गिला मोर काथा के सुइन कहन नाइ मानयँला। उमने ऊ लोग केर समान होबयँ, जे भूईंये बिना नेव कोड़लेइ घर बनालक। आर जखन बाढ़ केर लहर ऊ घर टाय टकरालक, तो घर गिर कहन नास होय गेलक।