5
ईसु पहिला चेला गिला के चुनलक
1 एक दिन ईसु गन्नेसरत केर झीलa धारे ठाड़ होय रहे। सेखन भीड़ परमेसर केर बचन के सुनेक तेहें उकर ऊपरे गिर पड़त रहयँ, तो एसन होलक। 2 कि ईसु झील केर धारे दुइटा नाउका लागल देखलक, जे माछुवा गिला उकर लेक उतेइर कहन जाल धोत रहयँ। 3 ऊ नाउका गिला लेक एक टाय जे सिमौन केर रहे, ईसु चेढ़लक। आर उके अरजी करलक “नाउका के धार लेक रोचिक भीतर बाटे लेगाइन।” तखन ईसु बइस कहन नाउका ऊपर लेक लोग गिला के उपदेस दे लागलक। 4 उपदेस देल बादे ईसु सिमौन के कहलक, “नाउका के गाड़हा बाटे लेगाव, आर माछ धरेक तेहें आपन जाल फेकिन।” 5 सिमौन उके जबाब देलक “ए मालिक, हामरे गोटा राइत कोस्टो करली किन्तु एकोटा धरे नाइ पारली, तेऊ तोर कहल टाय मोयँ जाल फेकम।” 6 जखन ऊ जाल फेंकलक तो एतना बेसी माछ बाइझ गेलयँ कि जाल फाटे लागलक। 7 तखन आपन संगी गिला के जे दोसर नाउकाय रहयँ, उमन के साहेता करेक तेहें इसारा करलक आर उमन आय कहन दुइयो नाउकाय एतना बेसी माछ भरालयँ कि नाउका डुबे लागलक। 8 ई देइख कहन सिमौन पतरस ईसु केर गोड़े गिर कहन बिनती कइर के कहलक, “ए परभु मोर पास लेक चइल जा, काहेकि मोयँ पापी मानुस हेकँ।” 9 एतिक बेसी माछ धरल लेक सिमौन आर उकर संगी गिलाउ ताजुब होलयँ। 10 आर ओसने जबदीक बेटा याकुब आर योहन कोउ जे सिमौन केर संगिया रहयँ, ताजुब होलक। तखन ईसु सिमौन के कहलक, “ना डाराबे! एबार लेक तोयँ लोग गिला के धरबे, सुसामाचार सुनाय कहन परमेसर ताहाँ ले आनबे।” 11 आर उमने नाउका गिला के धार बाटे आनलयँ। आर समुचा के छोइड़ कहन ईसु के गुड़ियालयँ।
ईसु कोढ़ रोगी गिला के बेस करलक
12 एक धंव ईसु जखन एक टा नगरे रहे। तखन हुआँ एक टा कोढ़ बिमारी लोग संग भेंटालक, तो ऊ ईसु के देइख कहन उकर गोड़े गिरलक आर बिनती करलक, “ए परभु जदि तोयँ चाहबे होले मोके सुध्द करे पारबे।” 13 ईसु आपन हाँथ बढ़ाय कहन उके छुलक आर कहलक, “मोयँ चाहोंला कि तोयँ सुध्द होय जा।” आर उकर कोढ़ बिमारी टा तुरते चइल गेलक। 14 तखन ईसु उके माना करलक, “इटा केकरो संगे ना कहबे, बरन्चो जाय कहन आपन के जे भेंट चाहे बलिदान चेढ़ायन्ला सेइ याजक गिला के देखाइन। आर कोढ़ लेक सुध्द होयेक बारे जेटा मुसा भबिस्यबक्ता भेंट चेढ़ायेक नियमb बनाय आहे उके चेढ़ाव कि उमनेक तेहें गोवाही होवुक।” 15 किन्तु ईसु केर चरचा आउरे गोटाय फइलोलक। आर भीड़ के भीड़ उकर बचन के सुनेक तेहें आर आपन रोग लेक बेस होयेक तेहें जामा होलयँ। 16 आर ईसु सुनसान जायगाय जाय कहन बिनती प्राथना करत रहे।
ईसु लाकवा रोगी के बेस करलक
17 एक दिन एसन होलक, जखन ईसु उपदेस देत रहे। तो हुँआ फरीसी दल केर धरम-सिच्छक गिला आर धरम-सास्त्र ग्यानी गिला हुआँ बइसल रहयँ। उमने गलील आर यहूदिया केर हरेक गाँव लेक आर यरुसालेम लेक आय रहयँ। आर रोगी गिला के बेस करेक तेहें परमेसर केर सक्ति ईसु केर संगे रहे। 18 ओहे खने एक टा रोगी के जेके लाकवा माइर रहे, उके लोग गिला खाइटे उठाय कहन आनलयँ आर उमने घर भीतर ईसु ताहाँ लेगायेक कोसिस करलयँ। 19 किन्तु उमने भीड़ केर चलते भीतर ढुकाय नाइ पारलयँ। तखन उमने छाइने चेड़लयँ आर खापरा के गुचाय कहन खाइट मेसा भीड़ मांझे ईसु ताहाँइ उतराय देलयँ। 20 ईसु उमनेक बिसास के देइख कहन लाकवा मारल रोगी टाके कहलक, “ए मानुस तोर पाप छमा होलक।” 21 तखन धरम शास्त्र ग्यानीc आर फरीसी दल केर धरम सिच्छक गिला फुसुटुरु करे लागलयँ, “ई के हेके, जे परमेसर केर निन्दा करेला? परमेसर के छोइड़ कहन आरो के पाप टाके छमा करेला?” 22 ईसु उमन केर मनेक काथा के जानलक आर उमने के कहलक, “तोहरे आपन मने का बिचार कर ताहा? 23 का ई कहना सहज हेके कि तोर पाप छमा होलक फिन ई कहना कि उठ आर चला-बुला करिन। 24 किन्तु तोहरे ई काथा के जाना कि मोयँ मानुस केर बेटा के धरतीये पाप छमा करेक अधिकार आहेd।” ईसु ऊ लाकवा मारल रोगी टाके कहलक, “मोयँ तोके कहतँ, उठ आर आपन खाइट के बोइह कहन आपन घर चइल जा।” 25 आर ऊ तुरते उमनेक देइख नजइरे उठलक आर खाइट के बोइह कहन परमेसर केर बड़ाई करते के आपन घर चइल गेलक। 26 तखन सउब भकुवाय गेलयँ आर परमेसर केर बड़ाई करे लागलयँ। आर डरे कहे लागलयँ “आइज हामरे अजीब घटना के देइख आही।”
मासुलदार टा ईसु के गुड़ियालक
27 ई सउब होल बादे ईसु घर लेक बाहिर गेलक, तो लेवी नामेक एक टा मासूलदार के मासुल लेक चौकी टाय बइसल देखलक। आर ईसु उके कहलक, “मोके गुड़ियाव।” 28 तखन मासुलदार टा सउब के छोइड़ कहन उठलक आर ईसु के गुड़ियालक।
उपास केर बारे सवाल-जबाब
29 आर लेवी ईसु के आपन घरे एक टा बोड़े भोज देलक। आर ऊ भोज माहने मासूल लेवइया गिला केर आर अइनो दोसर लोग गिला केर दोमे भीड़ रहे। जे ईसु संगे खात रहयँ। 30 ई देइख कहन फरीसी दल केर धरम-सिच्छक गिला आर शास्त्र ग्यानी गिला ईसु केर चेला गिला के कुरकुराय कहन कहे लागलयँ, “तोहरे मासूल लेवइया गिला आर पापी गिला संगे काहे खावाला-पियाला?” 31 तखन ईसु उमने के उतर देलक, “बोइध बेस लोगेक तेहें ना लागे, किन्तु रोगी गिलाक तेहें जड़ूर आहे। 32 मोयँ पापी गिला के डाके आय आहों ताकि उमन आपन पाप लेक मन बदलून, धरमी गिला के नाइ जे इटा के जउरत नाइ बुझयँला।”
33 फिन उमने ईसु केर ऊपरे दोस लगालयँ, उमन केर कहना रहे कि “बपतिस्मा देवाइया योहना केर चेला तो उपास राइख कहन बिनती-प्राथना करत रहयँला, आर ओसने धरम-सिच्छक फरीसी दल केर चेलाउ करयँला, किन्तु तोर चेला काहे खात-पियोत रहयँला?” 34 तखन ईसु उमन के कहलक, का तोहरे दुल्हा संगे गेल बाराती गिला के उपास राखुवाय पारबा? 35 किन्तु ऊ दिन आई, जखन दुल्हा के उमन लेक भिनु करल जाई, सेखन उमन उपास राखबयँ।
36 ईसु उमन के एक टा कहबी काथा कहलक, “केउ अदमी पुरना लुगा माहने तावन लगायेक तेहें नावाँ लुगा के नाइ काटोयँला जदि एसन करबयँ तो नावा लुगा फाइट जाई आर पुरना लुगा माहने नावाँ लुगा केर तावन बेस नाइ देखाई। 37 केउवे नावाँ दाखरस टाके पुरना मासकायe नाइ रखोयँला काहेकि नावाँ दाखरसे पुरना मासका फाइट जायला, आर दखरसf नास होय जाई। 38 नावाँ दाखरस टाके नावाँ मासकाय भोइर कहन राखेक चाही। 39 केउवे अदमी पुरना दाखरस टाके पी कहन नावाँ दाखरस के पीयेक नाइ चाहोयँला, काहेकि ऊ पुरना दाखरस टाके जानोयँला, आर उमन कहयँला कि पुरना दाखरस टाइ बढ़ियाँ आहे।”