4
सैतान केर दाराये ईसु केर परीक्खा
1 ईसु पबित्र आत्माय भोइर कहन यरदन नदी लेक घुइर गेलक। आर पबित्र आत्मा उके बन बाटे जायक तेहें हुचकालक। 2 हुआँ ईसु दुइ कुड़ी दिन तक रहलक आर सैतान उके परीक्खा करलक। एतना दिन तक ईसु कोनो नाइ खालक। दुई कुड़ी दिन केर बादे उके दोमे भूख लागलक। 3 तखन सैतान टा उके कहलक, “जदि तोयँ परमेसर केर बेटा हेकिस, होले ई पाखना टाके कहिन कि रोटी बइन जाउक।” 4 ईसु सैतान के जबाब देलक, “पबित्र शास्त्र माहने लिखल आहे कि मानुस केबल रोटीa लेकेइ जिन्दा नाइ रहयँला।” 5 तखन सैतान ऊँचा जायगाय ले खन गेलक, आर हुआँ लेक एक छन माहने संसार केर सउब राइज के देखाय देलक। 6 आर कहलक, “मोयँ ई सउब केर अधिकार आर सम्पति के तोके देमूँ। काहेकि ऊ सउब मोके देल जाय आहे, आर मोयँ जेके चाहोंला उमने के देवंला। 7 सेइ तेहें जदि तोयँ मोके गोड़ लागबे होले ई गिला सउब तोर होय जाई।” 8 ईसु उके जबाब देलक, “पबित्र शास्त्र माहने लिखल आहे कि तोयँ परभु परमेसर के गोड़ लागिन आर केबल परमेसर केरेइ आराधनाb करिन।” 9 तखन सैतान उके यरुसालेम नगर बाटे लेगालक। आर ईसु के मंदिर केर छत माहने ठाड़ कइर कहन कहलक, जदि तोयँ परमेसर केर बेटा हेकिस होले, हियाँ लेक डेगिन। 10 काहेकि लिखल आहे कि तोके बाँचायेक तेहें परमेसर आपन सरग दूत गिला के पइठाई आर तोर रइखा करबयँ। 11 आर उमन तोके हाँथे-पाथे झोंइक लेबयँ, एसन नाइ होइ कि तोके पाखनाय ठेंस लागी। 12 तखन ईसु उके जबाब देलक, कि पबित्र शास्त्र माहने इटाउ लिखल आहे कि तोयँ परभु आपन परमेसर केर परीक्खा ना करबे। 13 जखन सैतान सउब परीक्खा कइर सिरालक तो थोड़ेक समय केर तेहें उकर ताहाँ लेक चइल गेलक।
ईसु सेबा करेक सुरु करलक
14 फिन ईसु पबित्र आत्मा केर सामर्थ माहने भोइर कहन गलील घुइर गेलक। आर उकर चरचा आस-पास केर सउब देस माहने फइल गेलक। 15 जखन ऊ आराधनालयc गिलाय उपदेस देत रहे, तो सउब लोग उकर प्रसंसा करत रहयँ।
16 ईसु नासरत नगर माहने आलक, जहाँ उकर लालन-पालन होय रहे। आर हुआँ आपन रीति-बिधि केर मोताबिक ऊ परमेसर केर पबित्र दिने आराधनालय माहने धरम सास्त्र पढ़ेक तेहें ठाड़ होलक। 17 तो यसायाह भबिस्यबक्ता केर किताब के पढ़ेक तेहें उके देल गेलक, आर ऊ किताब लेक एसन जायगा के निकलालक जहाँ लिखल रहे।
18 कि परभु केर आत्मा मोर माहने आहे। ऊ मोके अभिसेक कइर आहे कि मोयँ गरीब गिला के सुसामाचार सुनाम आर एहे तेहें पइठाय आहे, कि बन्धुवा गिला के छुटकारा करेक आर आन्धरा गिला के देखेक केर सुसामाचार परचार करमूँ आर सउब रकम केर बन्धन लेक छोड़ामूँ। 19 आर परमेसर केर उद्धार पायेक समय आय गेलक।
20 ईसु किताब बन्द कइर कहन सेबक केर हाँथे जिमा देलक आर बइसालक। आराधनालय माहने सउब केर आँइख उकर ऊपरे लागल रहे। 21 तखन ईसु उमन के कहे लागलक, कि आइजे ई धरम शास्त्र केर लिखल बचन टा तोहरेक सामने पूरा होलक। 22 सोभेकाइ उकर बड़ाई करत रहयँ। आर उकर मधुर बचन लेक अचम्भित रहयँ। आर कहे लागलयँ, का ई युसुफ केर बेटा ना लागे? 23 तखन ईसु उमन के कहलक, तोहरे जरुर मोके कहबा, ए बोइध, तोयँ आपन के ठीक करिन आर जेटा हामरे सुइन आही कफरनहूम माहने अचम्भित काम कइर आहिस उके आपन नगर माहनोउ करिन। 24 फिन ईसु कहलक, मोयँ तोहरे के सत कह तहँ कि केउ भबिस्यबक्ता आपन देस माहने मान-सम्मान नाइ पायला। 25 d उदाहरन केर तेहें इयाद करा, एलियाह केर समय माहने जखन साढ़े तीन बछर तक पानी नाइ गिरालक। आर सउब देस माहने भयंकर आकाल होलक, तो इसराइल देस माहने ढेइरे राँड़ी जनी गिला रहयँ। 26 लेकिन एलियाह के उमनेक ताहाँ नाइ पइठाल गेलक, केबल सैदा छेतर केर सारफत नगर केर एक टा राँड़ी बेटी छुवा ताहाँ पइठाल गेलक। 27 चाहे एलीसा भबिस्यबक्ता के इयाद करा, ऊ सुरिया देस केर नामान नामेक लोग के कोढ़ बिमारी लेक बेस करलक। किन्तु आपन देस इसराइल केर केकोउ के कोढ़ बिमारी लेक बेस नाइ करलक।e 28 ईसु केर ई रकम काथा के सुइन कहन जोतना आराधनालय माहने रहयँ, उमने सउब रागे भूत होय गेलयँ। 29 आर ईसु के टाइन कहन नगर लेक बाहिर बाहरालयँ, आर पाहाड़ केर माथाइने लेगालयँ, जेटाय उमनेक नगर बइसल रहे। उमने उके पाहाड़ ऊपर लेक ढेकेइल कहन गिराय चाहोत रहयँ। 30 किन्तु ईसु भीड़ केर मांझ लेक बाहराय कहन चइल गेलक।
ईसु दुस्ट आत्मा धरल लोग टाके बेस करलक
31 इकर बादे ईसु गलील केर कफरनहूम नगर माहने गेलक। आर परमेसर केर पबित्र दिने आराधनालय माहने लोग गिला के उपदेस दे लागलक। 32 आर लोग गिला उकर उपदेस के सुइन कहन अचम्भित हलयँ, काहेकि उकर बचन अधिकार सहित रहे। 33 आराधनालय माहने एक टा लोग रहे, जेकर माहने दुस्ट आत्मा सामाय रहे। 34 ऊ डोबल आंटे चिचयाय कहन कहलक, “ए ईसु नासरीf, हामरेक संगे तोर का काम? तोयँ चइल जा, तोयँ हामरे के नास करे आय हीस। मोयँ तोके जानोंला, तोयँ के हेकिस? तोयँ परमेसर केर पबित्र अदमी हेकिस।” 35 ईसु उके धमकालक, “चुप रह! उकर लेक निकोइल जा,” दुस्ट आत्मा टा भीड़ मांझे ऊ लोग टाके पटइक राखलक, आर उकर लेक निकोइल गेलक। आर उके कोनो हानी नाइ पहँचालक। 36 लोग देइख कहन अचम्भित रइह गेलयँ। आर कहे लागलयँ, इटा केसन बचन हेके? कि ऊ अधिकार आर सामर्थ लेक दुस्ट आत्मा के आग्यां देला, आर उमने निकोइल जायँला। 37 आर आस-पास केर देस माहनोउ सउब ताहाँ उकर चरचा फइलते गेलक।
ईसु पतरस केर साइस आर दोसर लोग गिला के बेस करलक
38 फिन ईसु आराधनालय लेक बाहराय कहन सिमौन केर घर गेलक। तो हुआँ सिमौन केर साइस के दोमे जर आय रहे, सउब लोग ईसु के कहलयँ, “दया कइर कहन उके बेस कइर देहिन।” 39 ईसु उकर डिसना केर पासे ठाड़ होलक आर जर टाके छोड़ेक आग्यां देलक। तो तुरन्त जर छोइड़ देलक, आर ऊ उइठ कहन उमनेक सेबा-सुसार करे लागलक।
40 साँझ पहर, नगर केर लोग गिला सउब रकम केर रोगी गिला के ईसु पासे आनलयँ। ईसु सउब केर ऊपरे हाँथ राइख कहन उमन के बेस करलक। 41 हुआँ दुस्ट आत्मा धरल लोग गिलाउ रहयँ। उमन लेक दुस्ट आत्मा गिलाउ ई कहत के चिचयातके निकलोलयँ, कि तोयँ परमेसर केर बेटा हेकिस, काहेकि उमन जानत रहयँ, “ऊ मसीह हेके”। लेकिन ईसु उमन के धमकालक, आर कहलक, “चुप रहा”।g
आराधनालय माहने परचार करना
42 तेकर दोसर दिन ईसु बिहान होत के एकान्त जायगा माहने चइल गेलक। आर सउब लोग गिला उके खोजे लागलयँ। जखन ईसु के पालयँ तो उके रोके लागलयँ कि हामरेक ताहाँ लेक ना जाहीन। 43 किन्तु ईसु उमन के कहलक, “मोके आरो गिला के दोसर नगर माहनोउ परमेसर केर राइज केर सुसामाचार सुनायेक जरुरी आहे। काहेकि मोके एहे तेहें भेजल जाय आहे।”
44 आर ऊ गलील प्रदेस केर आराधनालय गिलाय परचार करते रहलक।