3
योहन बपतिस्मा देवइया केर परचार
1 इटा उखने केर काथा हेके, जखन समराट तिबिरियुस केर राइज केर पोन्दरो बछर माहने पुन्तियुस पिलातुस यहूदिया केर राइजपाल रहे, आर हेरोदेस गलील प्रदेस केर राजा रहे, आर उकर भाई फिलिपुस इतुरिया आर त्रखोनितिस माहने आर अबिलेन माहने लिसानियास राजा रहे, 2 आर जखन हन्ना आर कैफा महायाजकa रहे, से खने परमेसर केर संदेस बोन माहने जकरिया केर बेटा योहन पासे पहँचोलक। 3 आर ऊ यरदन नदी केर आस-पास केर सउब जायगाय आय कहन पाप केर छमा खातिर मन बदलेकb बपतिस्माc यानी पानीये डूबकी ले केर परचार करे लागलक।
4 जेसन कि यसायाह भबिस्यबक्ता केर किताब माहने लिखल आहेd कि “बोने एक टा डाकोइया केर आवाज होयला कि परभु केर आयेक तेहें डहर तेयार करा आर उकर तेहें संड़क के ओसार करा। 5 आर पाहाड़ गिला के समतल बनावा, घाट गिला के भोइर देवा, बाँका-ढेंका डहर गिला के सोज करा, आर गाड़हा-ढीपा डहर के समतल करा यानी आपन कठोर मन के तेयार करा। 6 तबे सउब मानुस गिला परमेसर केर पइठाल उध्दारकर्त्ता केर दरसन पाबयँ।”
7 आर लोग भीड़ के भीड़ योहन पासे बपतिस्मा लेक तेहें आत रहयँ। योहन उमन के कहत रहे, “ए साँप केर छुवा गिला,e तोहरे के के टा कइह देलक, कि आयेक बिपइत लेक पारावा। 8 जावा आर पहिले आपन जीबन लेक देखावा कि तोहरे पाप लेक मुँह मोइड़ कहन परमेसर के अपनाय आही, आर मने इटा ना सोंचबा कि अब्राहम केर सन्तान हेकी सेइ तेहें बांइच जाब। परमेसर ई पाखना लेको अब्राहम केर खातिर सान्तान सिरजाय पारी। 9 आर एबार गाछ केर फेड़े टांगा राखल आहे, सेइ तेहें जे -- जे गाछ बढ़ियाँ फर नाइ फरी, सेइ गिला के काइट कहन आइगे जरल जाई।” 10 तखन लोग गिला योहन के पुछे लागलयँ, “तबे हामरे के का करेक चाही?” 11 योहन उमन के कहलक, जदि तोहरेक पासे दुइ टा कुरता आहे होले एक टा कुरता के केकोउ गरीब के दे देवा। आर जदि तोहरेक पासे जउरत लेक बेसी खायेक आहे होले ओसने करा। 12 आर मासूल लेवइयाउ योहन पासे बपतिस्मा लेक तेहें आलयँ। आर उमने पुछलयँ, “ए गुरु हामरे का करब?” 13 योहन जबाब देलक, “जेटा तोहरेक तेहें सरकार बाटे लेक मासूल बांधल जाय आहे, उटा लेक बेसी ना लेबा।” 14 आरो सिपाही गिलाउ पुछलयँ, “कि हामरे के का करेक चाही,” योहन उमन के जबाब देलक, “केकोउ के डाराय-धमकाय कहन पयसा ले कहन अन्याय ना करबा। केकरो ऊपरे झूठ-मूठ केर दोस ना लागावा। आर आपन तानखा माहनेइ सन्तुस्ट रहा।”
15 जखन यहूदी लोग गिला मसीहf केर आयेक आसराय रहयँ, आर सउब आपन-आपन मने योहन केर बारे बिचार करत रहयँ, कि का इहे तो मसीह नाइ लागे। 16 तखन योहन उमने के कहलक, मोयँ तो तोहरे के केबल पानी लेक बपतिस्मा देवंला, किन्तु ऊ आवइया आहे जे मोर लेक बेसी सक्तिमान आहे। मोयँ तो उकर जुता केर बान्धल फीता के खोलोइया धांगर बनेक रकमो नेखों। ऊ तोहरे के पबित्र आत्मा आर आइग लेक बपतिस्मा देई। 17 उकर सूप उकर हाँथेइ आहे, आर आपन खरिहन के बेस निहार साफा करी। आर गहम के आपन खांचा माहने जामा करी। लेकिन भूंसा के आइगे जरी।
18 योहन बहुत रकम केर सिच्छा दे दे कहन लोग गिला के सुसामाचार सुनात रहे। 19 लेकिन जखन गलील प्रदेस केर राजा हेरोदेस आपन भाई केर घरइया के राखलक। तो योहन उकर ई काम के, आर आरो दोसर खाराब काम केर बारे निन्दा करलक। 20 सेइ तेहें हेरोदेस राजा योहन के जेहेल माहने बन्द करुवालक। हेरोदेस, ई सउब लेक बेसी खाराब काम करलक।
ईसु केर बपतिस्मा
21 जेहेल माहने जायेक लेक पहिल जखन योहन सउब लोग गिला के बपतिस्मा देत रहे, तखन ईसुओ बपतिस्मा लेयेक तेहें आलक। आर बपतिस्मा ले कहन बिनती करत रहे कि ओहे समय आकास खुइल गेलक। 22 पबित्र आत्मा पेरवाँ केर रुपे उकर माहने उतइर गेलक, आर सरग लेक एक टा आवाज आलक, कि तोयँ मोर दुलार बेटा हेकिस, मोयँ तोर लेक बेजाइन खुस आहों।
ईसु केर बंसावाली
23 जखन ईसु सेबा सुरु करलक, सेखन उकर उमइर करीब एक कुड़ी दस बछर केर रहे। आर (जेसन समझल जात रहे) ईसु युसुफ केर बेटा रहे आर युसुफ एली केर। 24 आर एली मत्तात केर बेटा, आर मत्तात लेवी केर बेटा आर लेवी मलकी केर बेटा आर मलकी यन्ना केर बेटा आर यन्ना युसुफ केर बेटा रहे। 25 आर युसुफ मत्तियाह केर बेटा, मत्तीयाह आमोस केर बेटा, आर आमोस नहुम केर बेटा, नहुम असल्याह केर बेटा, आर असल्याह नोगह केर बेटा रहे। 26 आर नोगह मात केर बेटा, आर मात मत्तीयाह केर बेटा, आर मत्तीयाह सिमी केर बेटा आर सिमी योसेख केर बेटा, योसेख योदाह केर बेटा रहे। 27 आर योदाह योहन केर बेटा, आर योहन रेसा केर बेटा, आर रेसा जरुबाबिल केर बेटा, आर जरुबाबिल सालतिएल केर बेटा, आर सालतिएल नेरी केर बेटा रहे। 28 आर नेरी मलकी केर बेटा, आर मलकी अद्दी केर बेटा, आर अद्दी कोसाम केर बेटा, आर कोसाम इलमोदाम केर बेटा, आर इलमोदाम एर केर बेटा रहे। 29 आर एर येसु केर बेटा, आर येसु इलाजार केर बेटा, आर इलाजार योरीम केर बेटा, आर योरीम मत्तात केर बेटा, आर मत्तात लेवी केर बेटा रहे। 30 आर लेवी समौन केर बेटा, आर समौन यहूदाह केर बेटा, आर यहूदाह युसुफ केर बेटा, आर युसुफ योनान केर, आर योनान इलयाकीम केर बेटा रहे। 31 आर इलयाकीम मलेआह केर बेटा, आर मलेआह मिन्नाह केर बेटा, आर मिन्नाह मत्तता केर बेटा, आर मत्तता नातान केर बेटा, आर नातान दाऊद केर बेटा रहे। 32 आर दाऊद यिसै केर बेटा, आर यिसै ओबेद केर बेटा, आर ओबेद बोअज केर बेटा, आर बोअज सलमोन केर बेटा, आर सलमोन नहसोन केर बेटा रहे। 33 आर नहसोन अम्मीनादाब केर बेटा, आर अम्मीनदाब अदमीन केर बेटा, आर अदमीन अरनी केर बेटा, आर अरनी हिसरोन केर बेटा, आर हिसरोन फिरिस केर बेटा, आर फिरिस यहूदाह केर बेटा रहे। 34 आर यहूदा याकूब केर बेटा, आर याकूब इसहाक केर बेटा, आर इसहाक अब्राहम केर बेटा, आर अब्राहम तिरह केर बेटा, आर तिरह नाहोर केर बेटा रहे। 35 आर नाहोर सरुग केर बेटा, आर सरुग रऊ केर बेटा, आर रऊ फिलिग केर बेटा, आर फिलिग एबिर केर बेटा, आर एबिर सिलह केर बेटा रहे। 36 आर सिलह केनान केर बेटा, आर केनान अरफछद केर बेटा, आर अरफछद सेम केर बेटा, आर सेम नूह केर बेटा, आर नूह लिमिक केर बेटा रहे। 37 आर लिमिक मथूसिलह केर बेटा, आर मथूसिलह हनोक केर बेटा, आर हनोक यिरिद केर बेटा, आर यिरिद महलेल केर बेटा, आर महलेल केनान केर बेटा रहे। 38 आर केनान एनोस केर बेटा, आर एनोस सेत केर बेटा, आर सेत आदम केर बेटा, आर आदम परमेसर केर बेटाg रहे। जेके परमेसर आपन रुपे बनाय रहे।