2
ईसु केर जनम
1 ओहे दिन मेहेन रोम केर समराटa अगुस्तुस आग्यां देलक, कि उकर सउब राइज माहने जनगनना करल जाउक का। 2 जखन क्विरिनियुस सुरिया देस केर राइजपाल रहे, सेखन ई पहिला जनगनना होलक। 3 आर सउब लोग नाम लिखवायेक तेहें आपन-आपन पुरखा केर नगर गेलयँ। 4 तो युसुफो गलील केर नासरत नगर लेक दाऊद राजा केर नगर यहूदिया देस केर बैतुलहम गाँव गेलक। काहेकि युसुफ दाऊद राजा केर खानदान लेक रहे। 5 आर ऊ मरियम कोउ संगे लेले गेलक, जेकर संगे उकर मंगनी होय रहे। सेखन मरियम भारी गाते रहे। 6 जखन उमने बैतुलहम माहने रहयँ तखन मरियम केर छुवा जनमायेक दिन पूरा होलक। 7 मरियम आपन पहिला बेटा के गोहाइल घरे जनम देलक आर छुवा टाके लुगाय गुलपुटी कइर कहन गोरु, काड़ा के चारा देक बाहनी माहने सुतालक, काहेकि उमनेक तेहें धरमसाला माहने जायगा नाइ रहे।
चारवाहा गिला के सरग दूत दाराय सुसामाचार
8 ओहे राइते थोड़ेक चारवाहा गिला केर दल बैतुलहम नगर केर बाहिर टांइड़े आपन भेड़ी गिला के अगरत रहयँ। 9 आचकाय एक टा सरग दूतb उमनेक मांझे आलक आर परभु केर आलो ऊ आस-पासे गोटाय चमकोलक, सेखन चारवाहा गिला पूरा डारालयँ। 10 सरग दूत उमने के कहलक “ना डाराबा, मोयँ तोहरे के एक टा खुस खबरी सुनायक तेहें आय आहों जे सभेक तेहें हेके। 11 आइज राइते बैतुलहम दाऊद केर नगरे मुक्तिदाताc जनइम आहे एहे मसीह परभु हेके। 12 तोहरेक तेहें उकर ई चिन्हा आहे कि तोहरे एक टा बालक छुवा के लुगाय गुलपुटी होल चारा देन्ला सेइ बाहनी माहने सुतल पाबा।” 13 तखन आचकाय सरग दूत केर संगे ढेइरे सरग दूत केर गोठ देखार होलयँ, उमने ई रकम भजन-किरतन कइर कहन परमेसर केर इस्तुति करत रहयँ।
14 “सरग माहने परमेसर केर महिमा होवुक आर धरती माहने ऊ मानुस गिला के सान्ति होवुक जे गिला संगे परमेसर खुस रहेला।”
15 जखन सरग दूत गिला केर गोठ सरग घुइर गेलयँ तो चारवाहा गिला आपस माहने कहलयँ, “चला, हामरे बैतुलहम जाय कहन ई घटना के जे हामरे के परभु कइह देलक, देखब।” 16 उमने चाँड़े-चुड़ू कूदते के बैतुलहम गेलयँ तो मरियम के आर युसुफ के आर छुवा टाके गोहाइल केर बाहनी माहने सुतल देखलयँ। 17 चारवाहा गिला उके देखलयँ तो ई छुवा टा केर बारे सउब के कइह देलयँ जे सरग दूत गिला उमन के कइह दे रहे। 18 जोतना चारवाहा गिला केर काथा के सुनलयँ सउब ताजुब करे लागलयँ। 19 किन्तु मरियम ऊ सउब काथा गिला के आपन मने जोगालक आर उकर ऊपरे बिचार करे लागलक। 20 काहेकि चारवाहा गिला के सरग दूत जेसने कइह रहे ओसनेइ छुवा के देखलयँ, सेइ तेहें परमेसर केर इस्तुति करत के आपन भेड़ी गिला ताहाँ घुरलयँ।
ईसु केर नामकरन आर अरपन
21 आठ दिन केर बादे छुवा केर खातना होलक आर छुवा केर नाम ईसु राखल गेलक। इटा ओहे नाम हेके जे कि मरियम के भारी गात होयेक लेक पहिले सरग दूत मरियम के कइह रहे। 22 आर जखन मूसा भबिस्यबक्ता दाराय परमेसर केर देल नियम केर मोताबिक छुवा जनम केर बारे मंदिरd माहने सुध्द होएक तेहें भेंट चेढ़ायक दिन आलक। तो उमने ईसु के ले कहन परमेसर केर हाँथे जिमा करेक तेहें यरुसालेम गेलयँ। 23 काहेकि परमेसर केर नियमe माहने लिखल आहे कि केकरो, जदि पहिल छुवा, बेटा होइ तो उके परमेसर के जिमा करल जाउक। 24 ओहे खने ईसु केर मांय-बाप परमेसर केर नियम केर मोताबिक एक जोड़ा पेंरवाँ छुवा के बलिदान चेढ़ायक तेहें लेगलयँ।f
सिमोन केर गीत
25 ऊ दिन यरुसालेम मंदिर माहने सिमोन नाम केर एक टा लोग रहे ऊ धरमी आर भक्त रहे। ऊ पबित्र आत्माय भोइर रहे। ऊ मसीह केर आयेक आसरा देखत रहे। 26 काहेकि पबित्र आत्मा लेक चेतावनी पाय रहे कि जखन तक तोयँ परभु केर मसीह के नाइ देखबे तखन तक नाइ मरबे। 27 पबित्र आत्मा टा उके ऊ दिन मंदिर माहने जायक तेहें उसकालक। जखन मरियम आर युसुफ आपन छुवा के नियम केर मोताबिक परमेसर के जिमा करेक तेहें हुआँ पहँचोलयँ, 28 तखन सिमोन मंदिर माहने रहे। ऊ ईसु के आपन कोरा माहने लेलक आर परमेसर के धन्यबाद दे लागलक, 29 ऊ कहलक, ए परमेसर एबार तोयँ आपन धांगर के आपन कहल मोताबिक सांति से बिदाई करिन। 30 काहेकि मोयँ तोर उद्धारकर्त्ता के देइख लेलों। 31 जेके तोयँ संसार केर सउब लोगेक तेहें तेयार कइर आहिस। 32 कि ऊ दोसर जाइत केर तेहें आलो आर तोर आपन लोग इसराइली केर तेहें महिमा होई। 33 युसुफ आर मरियम ईसु केर बारे ई काथा के सुइन कहन बहुत अचम्भित होलयँ। 34 सिमोन उमन के आसिर्वाद देलक, आर उकर मांय मरियम के कहलक, देख ऊ तो इसराइल माहने बेजाइन लोगेक तेहें गिरेक आर उठेक केर एक टा एसन चिन्हा बनाय आहे, जेकर बिरोध माहने काथा-बातरा करल जाई। 35 बरन तोर प्रान टाउ तालवाइरे छेंदा करल निहार आर-पार छेंदा होय जाई एसन टाय ढेइर लोगेक छिपल काथा टा परगट होई।
हन्ना केर गवाही
36 आसेर केर गोत्र लेक हन्ना नामेक फनुएल केर बेटी भबिष्यबक्ताइन रहे। जे ढेइरे बुढ़ी होय रहे। ऊ मोटे सात बछर आपन अदमी संगे रहे पाइर रहे। 37 ऊ चाइर कुड़ी चाइर बछर लेक राँड़ी रहे। ऊ मंदिरे रहत रहे, आर मंदिर केर आस-पास लेक काहाँऊ नाइ जात रहे। किन्तु उपास आर बिनती-प्राथना कइर के दिन-राइत उपासना करत रहे। 38 जखन सिमौन, मरियम आर युसुफ गोल्फो करत रहयँ सेखन ऊ हुआँ आलक। आर उहो परमेसर के धन्यबाद देलक। ऊ यरुसालेम माहने उद्धारकर्त्ता केर आयेक आसरा देखइया सउब के ई बाताय लागलक कि मसीह आय गेलक।
39 आर उमने परमेसर केर नियम के पूरा करल बादे ईसु केर मांय-बाप गलील देस माहने आपन नगर नासरत घुइर गेलयँ। 40 आर ईसु बाढ़े लागलक आर बलवान होते गेलक, आर बुध्दि माहनोउ बाढ़े लागलक। आर परमेसर केर किरपा उकर ऊपरे रहे।
ईसु धर्म-सिच्छक गिला संगे मंदिर माहने सवाल-जबाब करत रहे
41 ईसु केर मांय-बाप हर बछर फसह परब मानेक तेहें यरुसालेम जात रहयँ। 42 जखन ईसु बारो बछर केर होलक, तो आपन मांय-बाप केर संगे फसह परबg मानायक तेहें यरुसालेम गेलक। 43 परब सिराल बादे उमने घर बाटे घुरे लागलयँ, तो ईसु यरुसालेम माहनेइ रइह गेलक। मांय-बाप के इकर पता नाइ चललक। 44 उमने सोंचलयँ कि ईसु संगी गिला संगे दोसर लोग गिलाक मांझे आहे। किन्तु जखन उके सांझ तक देखे नाइ पालयँ। तखन उमने ईसु के आपन संगी आर कुटुम्ब गिलाक मांझे खोजे लागलयँ। 45 जखन उमने ईसु के नाइ पालयँ तखन उके खोजत-खोजत के आरो यरुसालेम पहँचोलयँ। 46 आर तीन दिन केर बादे उमने उके धरम-गुरु केर मांझे सवाल जबाब करत के पालयँ। 47 जोतना लोग गिला सुनत रहयँ, उमने सउब उकर सवाल-जबाब के सुइन कहन अचम्भित होलयँ। 48 उकर मांय-बापो अचम्भित होलयँ। उकर मांय उके कहलक, “बेटा, तोयँ हामरेक संगे एसन बेबहार काहे करले? देख, तोर बाप आर मोयँ तोके खोजत के बहुत चिन्ता माहने रही।” 49 ईसु पुछलक, “तोहरे मोके काहे खोजत रहा? का तोहरे नाइ जानत रहा कि मोके आपन बाप परमेसर केर घरे रहना जरुरी आहे?” 50 लेकिन उमने ईसु केर कहेक मतलब टाके नाइ बुझलयँ। 51 तखन ईसु उमनेक संगे नासरत नगर घुइर गेलक। आर हुआँ आपन मांय-बाप केर अधीन माहने रहलक, उकर मांय टा ई सउब बात के आपन मने राखलक।
52 ईसु बुध्दि आर सरीर माहने आर परमेसर आर मानुस केर अनुग्रह माहने बाढ़ते गेलक।