28
माल्टा टापू मेहेन पौलुस
1 जखन हामरे बाँइच कहन धारे बाहराली, तो हामरे के पाता चललोक कि इ टापू टाकेर नाम माल्टा हेके। 2 हुँआ केर बासिन्दा गिला हामरेक उपरे बेजाइन किरपा करलयँ। आर पानी गिरात रहे सेकर चलते जाड़ लागत रहे, सेतेहें उमन आइग डुँड़काय कहन हामरे सउब के तापेक तेहें बोइसालयँ। आर हामरेक माइन-गाइन करलयँ। 3 जखन पौलुस काठी के जामा कइर कहन आइग मेहेन राखलक तखन आगेक आंचे काठी लेक एकटा साँप बाहारालक आर पौलुस केर हाथे लेपटाय होलक। 4 हुँआ केर लोग गिला उकर हाथे साँप के लेपटाल देइख कहन कहे लागलयँ, "ई लोग टा पाक्का लोग काटा हेके, समुन्दर लेक बाँइच के तो बाहरलक, तेउ फयसला करइया ईस्वर इके जिन्दा नाई रहे देई।" 5 किन्तु पौलुस साँप के झाइड़ कहन आइगे फेंइक देलक आर उके कोनो नाई होलक। 6 उ लोग गिला आसरा देखत रहयँ कि इ लोग टाकेर गोटा गात टा फुइल जाइ चाहे आचकाय धड़ाम ले गिर कहन मोइर जाइ। किन्तु ढेइर देरी तक उके कोनो नाई होतेहे, तखन लोग गिला दोसर बिचारे कहलयँ, “इ तो कोनो देवँता हेके।”
7 टापू केर मुखिया पुबलियुस केर उ जायगाक आसे-पासे जमीन रहे। ऊ हामरे के आपन घर लेगाय कहन तीन दिन तक गोतिया भाबे माइन-गाइन करलक। 8 पुबलियुस केर बाप जोर आर झाड़ा लेक काहिल होय जाय रहे। पौलुस उके देखेक तेहें उकर ताहाँ गेलक, आर उकर उपरे हाथ राइख कहन प्राथना करलक आर ऊ बेस होय गेलक। 9 जखन उ बेस होलक तखन टापू केर आरो रोगी गिला उकर पासे आलयँ आर उमनोउ बेस होय गेलयँ। 10 उमन हामरे के बेजाइन माइन करलयँ। आर जखन हामरे जायेक तेहें जाहाज मेहेन चापे लागली तो उमन हामरेक दोरकारेक जिनिस गिला के जाहाज मेहेन राइख देलयँ।
पौलुस केर माल्टा टापू लेक रोम जायेक
11 तीन महीना बितल बादे हामरे सिकन्दरिया केर एकटा जाहाज मेहेन निकलोली, जेटा गोटा जाड़ मास माल्टा टापू माहने रहले रहे। जाहाज केर आघु मेहेन ‘जुड़ुवा देवँता’a केर चिन्हा रहे। 12 हामरे सरकुस सहरे जहाज के ठाड़ कइर कहन हुँआ तीन दिन तक रहली। 13 हुँआ लेक हामरे जाहाज लेक रेगियुस सहर पहँचोली आर फिन दोसर दिन दखिन बाटेक हवा बोहेक चलते हामरे पुतियुली सहर मेहेन आली। 14 हुँआ हामरे थोड़ेक बिसासी भाइ गिला संग भेंट होली, उमन हामरे के रहेक तेहें कहलयँ तखन हुँआ हामरे सात दिन तक रहली, इ रकम हामरे रोम सहर पहँचोली। 15 जखन रोम सहर केर बिसासी भाइ गिला के हामरेक आयेक खबर मिललोक तखन उमन हामरेक संगे भेंट करेक तेहें रोम लेक अप्पियुस नामेक चौक आर तीन डेरा तक हामरेक संग भेंट करेक तेहें आलयँ। इमन के देइख कहन पौलुस परमेसर के धन्यबाद देलक आर सांहास करलक। 16 जखन हामरे रोम सहर पहँचोली, तो पौलुस के एकटा पालटन केर पाहरा मेहेन एकलाइ रहेक हुकूम पावालोक।
रोम माहने पौलुस
17 तीन दिनेक बादे पौलुस रोम केर यहूदी नेता गिला के डाकलक। जखन उमन जामा होलयँ, तखन उमने के कहलक, “ए भाइ सउब, मोयँ निजेक यहूदी जाइत भाइ गिला केर चाहे हामरे पुरखा गिलाक नियम केर बिरोध मेहेन कोनो काम नाई कइर रहँ, तेउ मोके यरुसलेम लेक कैदी बनाय कहन रोमी गिलाक हाथेक जिमा देल गेलँ। 18 रोमी साहेब गिला मोर छान-बीन कइर कहन मोके छोड़े खोजलयँ, काहेकि मोयँ एसन कोनो कामे नाई कइर आहँ कि मोके मिरतु दण्ड देल जाई। 19 किन्तु जखन यहूदी गिला मोर बिरोध मेहेन कहे लागलयँ तो मोके समराट केर दोहाई देक होलक। एसन काथा ना लागे कि मोयँ निजेक जाइत-भाइ केर उपरे कोनो दोस लागायेक चाहेला। 20 सेतेहें मोयँ तोहरे के सउब के डाइक आहँ कि तोहरेक संग भेंट कइर कहन काथा करमूँ। काहेकि हामरे सउब यहूदी गिला आसरा राखिला कि अभिसेक करल लोग आई, सेकर चलते मोयँ बेड़िये बान्धल आहँ।" 21 उमन उके कहलयँ, “ना तो हामरे तोर बारे यहूदिया लेक कोनो चिट्ठी पाय आही, आर ना भाइ गिलाक मइधे केउ तोर बारे कोनो कइह दे आहयँ आर ना तो केउ कोनो खाराब कइह आहयँ। 22 किन्तु तोर मने का बिचार आहे? ओहे टाइ हामरे तोर लेक सुनेक चा हिला काहेकि हामरे जानिला कि ईसु केर डहर केर बिरोध माहने सउब जायगाय लोग गिला काथा कहोतयँ।" 23 तखन उमने उकर खातिर एकटा दिन धोइर कहन बेजाइन लोग गिला उकर ताहाँ जामा होलयँ। आर पौलुस परमेसर केर राइज केर गोवाही दे-दे कहन आर मूसा केर नियम आर भबिस्बक्ता केर किताब गिला लेक ईसु केर बारे समझाय कहन बिहान लेक साँझ तक कहते रहलक। 24 थोड़ेक लोग गिला उकर काथा के माइन कहन बिसास करलयँ, किन्तु आरो लोग गिला उकर काथा के बिसास नाई करलयँ। 25 जखन सुनइया गिला एक दोसर केर काथा के माना मानी नाई होलयँ, तखन आखरी मेहेन पौलुस केर एकटा काथा कहल बादे चइल गेलयँ, “पबित्र आत्मा केर दाराए यसायाह भबिस्यबक्ता केर दाराए तोहरेक पुरखा गिला लेक ठीके कइह आहे। 26 ‘जाय कहन इ लोग गिला के कइह देहिन,
“तोहरे सुनते तो रहबा किन्तु नाई समझोबा,
आर देखते तो रहबा किन्तु नाई बुझबा,
27 काहेकि इ लोग गिला केर मन टा मोटा होय गेलक,
उमनेक कान टा ढीठ बहिरा होय गेलक।
इमन आँइख के लुइम्ब आहयँ, काहाँउ एसन ना होउक कि उमन आँइख लेक देखून आर कान लेक सुनून
आर आपन मन लेक समझून आर मोर बाटे घुइर आउन आर मोयँ उमन के बेस करमूँ।” '
28 "सेतेहें तोहरे जाइन लेवा, कि परमेसर इ छुटकारा केर काथा टाके अनजाइत गिलाक ताहाँ पइठाय आहे, आर उमन सुनबयँ।” 29 [आर जखन पौलुस एसन कहलक तो यहूदी गिला आपस मेहेन बाद-बिबाद करे लागलयँ आर हुँआ लेक चइल गेलयँ।]b