Kyat ta rut Jou ngósno né, ffaménawé si fafié, bo funé ta récegé né fatuw yama Jou Lahatala ni pari tisé
4
Faftén re farémóné ta kmasié mewé. Iga reni kyat ta rut Jou Lahatala ngósno, mati fbablé fdélé si su na. Mayta, ffaménawé riri dodoto né fafié bo funé, fatuw yama Jou Lahatala ni pari tisé. Sababta nte kyat félé rérésyapé si néli re lima, rfafan méitén ta cogo Jou ni Rohé njé nécego si, momongo rlólé. 2 Bo funé fatuw Jou ni Rohé njé ntolno si, nase rdélé ta Yesus Kristus re ntebé yama soroga lo, se ndadi kyat i, bo nfasalamaté kyaté. 3 Kyat pai ga ndélé Yesus ta dolo né pa, Jou Lahatala ni Rohé njé ntolén po i ni pa. Kyat ta né, rfafan Jou ni méiténé né rfalélólé be kyaté, sababta ta rfasodoto né lima Kyat ta ni Le Kristusé njé ni. Mewé re funé tatubé Jou Yesusé nécegé pote se néli kyat ta dolo né bo rwómé, se nete re si pocé óro.4 Aniké wyói-wyói ta kmasié mewé, mewé wlomi né ga lima Jou Lahatala ni, se kyat ta rut Jou ngósno ta rfalélólé né, mewé re funé si rmalólé se réfené mew pa. Ta mulo réfené mew pa né, sababta Jou ni Roh ta ntolén po wlomi wlólo né ni kawasa pélóyé, nliwe keé riri kawasa ta lima setané riri kolano njé ni né. 5 Kyat ta rut Jou ngósno ta rfalélólé né, wlori né lima kyat ta rmakotalé po Jou Lahatala ni, se ta mulo ta si réféténé né ta délé nfamgo re Jou wlo pa. Kyat ta rmakotalé po Jou ni né ma rlongé si fié. 6 Ité wloré né lima Jou Lahatala ni, se kyat pai ta ndélé Jou Lahatala ta fatuwé, nase nlongé re ndéréré ité. Kyat ta wlori né lima Jou Lahatala ni pa né rlongé it pa. Se necé tfafayalo si fié bo tuné kyat pai ta fatuwé rut Jou ngósno né re kyat pai ta rlólé. Iga ta rlongé ité, né rfasodoto ité né lima Jou ni Rohé njé ni. Ta rlongé it pa né, rlól bóto.
Tfamésié isó re isó, ta dolo Jou Lahatala nmésié ité né
7 Faftén re faremón ta kmasié mewé, kécego mewé bo tfamasié isó re isó, sababta masié njé ndé lima Jou Lahatala ni. Se kyat pai ta nfamasié, ité tuné kyaté ta njé re npo wlo njé po Jou Lahatala ni, se Jou re npo i wlo ta nóbén. Kyat ta njé ma re nuné Jou Lahatala ta fatuw-fatuwé. 8 Kyat pai ta nmasié kyat iglé né pa, nejé nfayal Jou Lahatala ta fatuw pafule, sababta Jou Lahatala masié góo i. 9 Jou Lahatala nfaftulo ni masié né pélóy po it ni né, ta dolo faje: I ntu be isó le ma npo keé ité, ntebo I yama po dunia lo nte, bo nfasalamat ité. Npe ta necé, bo it re I sogado fajé nénéli le. 10 Ité rir masié po Jou Lahatala ni né, fatuw pa. Mayta Jou Lahatala ni masié né ta fatuwé, se npo ntu njé po it ni sogado nmóté. Nmóté né maduga bo nfayangés be rór sélsólé né. Necé masié ta fatuwé.
11 Faftén re farémóné ta kmasié mewé, Jou Lahatala re nfaftulo ni masié ta pélóo i né po it ni, se ité ma mare tfamasié isó re isó. 12 Kyat isó pafule ta re némnaw Jou Lahatala. Mayta, bo ité tfamasié isó re isó, necé I wlo njé rentolén po it ni, se ité re tfamasié fatuw-fatuw ta dolo Jou Lahatala ma nmasié ité.
13 Jou wlo njé rentolén po it ni, ité wloré njé ma rentolén po Jou ni. Ité tuné ta fatuwé, sababta Jou re npo ni Rohé njé po it ni.
14 Amé re kémnaw Jou Lahatala Ntu njé, se kfabingo mew ta fatuwé: Jou Lahatala re ntebo I po dunia, ndadi kolano ta bo nfasalamat kyaté-kyat po dunia. 15 Ta mulo né, kyat pai ta néceg ta Yesusé Jou Lahatala Ntu I, kyat ta njé Jou Lahatala wlo njé ntolén po i ni, i wlo njé ma ntolén po Jou Lahatala ni.
16 Ité re tuné re tdélé ta Jou Lahatala nmasié ité, ta mulo ité ma tmasié isó re isó. Jou Lahatala masié góo i, se kyat pai ta nénmasié, necé nuné ta i wlo njé ntolén be po Jou Lahatala ni, Jou Lahatala wlo njé ma ntolén po i ni.
17 Iga fatuw ta tfadéréré wlor re Jou ta dolo né, rir masié né nase nbóng ma nbóng i sogado tfamasié ta fatuw-fatuwé. Pote se néli dunia njé re nkiamaté, Jou Lahatala nutné rór sélsólé né. Iga re tfamasié ta dolo né, nase témtat pa, sababta ité tfan re ttolén po dunia nje ni né, tdéréré be Jou Lahatala ta dolo Kristusé re npe né. 18 Po masié wlólo né reni ta témtat pa. Iga tmasié Jou Lahatala ta fatuw-fatuwé, rir mamtate né myangésé. Sababta kyat pai ta némtaté, necé re nuné ta i ncólé lesu se Jou bo nfasól i. Kyat pai ta némtaté lesu, necé nmasié Jou ta nfamwómo i pa.
19 Ta mulo ité tfamasié isó re isó, sababta Jou Lahatala re nmasié ité ntubé. 20 Iga kyat faisó nécegé cogo nmasié Jou Lahatala, mayta ni lé kyaté, necé nlóle. Kyat ta némnaw si ma, nmasié si pa, néga bo Jou ta némnaw i pae? Nbóng ta nmasié Jou pa. 21 Se ta Jou Lahatala nané ité né, ta nte: Kyat pai ta nmasié Jou Lahatala, mare nmasié kyaté nóté.