2 Yohanes
Surat Yohanes
ta kedua né
Salam
1
Ya, Yohanes, ta rkakmé ya kyat tut ya.Klefo suraté nje po Jou ni jemaate mewé, I ta npili mewé fdéréré I. Kfatailo mew dolo pégelé isó re ntu né. Ya fatuw-fatuw kmasié mewé. Maduga ya le pa, ta kmasié mewé né, mayta kyat ta fatuw-fatuwé re runé Jou Lahatala ni méiténé né ma, farimé si rmasié mewé. 2 Sababta Jou Lahatala ni méiténé né re po wlomamé wlólo, sogado fajé nénéli le.
3 Kéroré né, rir Papa Jou Lahatala, I re Ntu Yesus Kristusé riri masié re féyfié né ndéréré ité, bo wloré né ma ménóné ndimé, sababta rmasié ité, re ité ma tdéréré Jou Lahatala ni méiténé né.
Bo tmasié ta fatuwé mare tdéréré ta Jou nané né
4 Jemaat ta mewé, klongé po mew ni iglé riri fénfan re téltoléné né rdéréré ndimé Jou Lahatala ni méiténé né. Klongé ta né, nik séngséngé isó ta délé npélóyé, sababta fpe né nfamgo re ta rir Papa Jou Lahatala nané ité né. 5 Se nte, jemaat ta kmasié mewé, kécego mewé mare tfamasié isó re isó. Dodoto ta njé, dodoto wóbno i pa, mayta faiwóbno lesu kyat ta ruto it Jou ni méiténé né re récego ité. 6 Iga bo tmasié ta fatuwé né, mare tdéréré keé ta Jou nané né. Jou nané ité mare tfan re ttoléné né masié bóto ité, se tpe be kyaté ni ta fié. Necé re flongé tatubé lima lesu.
7 Sogado klefo suraté nje né, reni kyaté félé ro ta rfasodoto cogo Jou Lahatala ni méitén mayta fatuw pa. Résyapé si néli re lima po dunia wlólo nte. Kyat ta né rdélé pa ta Yesus Kristusé I yama Jou Lahatala ni ndadi kyat i. Kyat ta dolo né riri lé Kristusé re rfasodoto né rfalélólé be kyaté. 8 Se fpe mew fafié bo mati réfené mew na. Amé re keyat amé mnuwé kfasodoto mewé sogado fdélé Jou fié, se Jou re néjaji mewé bo fduké nómi téntén ta fié. Nópé ga bo fdéréré kyat ta rut dodoto ta sólé né, na myangso mewé ndimé. Se fpe mew fafié bo farimé fduké nómi téntén ta Jou re néjaji mewé né, nase reni ta myangés pa.
9 Kristusé ni dodoto né, kyat pai ta nbóng ta nésé néli nóté, se ndélé pana ta fatuwé né, necé ni ngale Jou Lahatala wlo njé ntolén po i ni pana. Mayta pai ga ntébné pa ndélé Kristusé ni dodoto né, wlo njé i be po ni Papa Jou Lahatala re Ntu njé ni. 10 Kyat pai ta nfasodoto mewé ga dodoto ta né Kristusé ni dodoto pa, ma fpo i fié bo ntolno mew na. Sói ta nécegé né ma, mati sogado fakuat i na. 11 Iga félóngé i, necé mewé ma re fdéréré i se re fpe ta sólé.
Yohanes nfawasé i