Tdélé Jou Yesus, Jou Lahatala Ntu
5
Kyat pai ta ndélé ta fatuwé Jou Lahatala re ntebo Yesus bo nfasalamat ité, kyat ta njé Jou re npo wlo ta nóbéné. Kyat pai ta fatuwé nmasié Jou Lahatala ta ndadi rir papa njé, i ma mare nmasié kyaté-kyat ta Jou Lahatala nyó si dolo ntu si né. 2 Bo tuné ta fatuwé ité re tmasié si, necé ité mare tmasié Jou Lahatala re tdéréré ta I nané ité né. 3 Sababta iga bo tmasié Jou Lahatala ta fatuwé, necé ité mare tdéréré ta I nané ité né. Ta nané ité né ma nfamétéw it pa, 4 sababta kyat pai ta Jou re npo i wlo ta nóbéné, i re néfené nétóf sói ta lé po dunia wlólo. Ta mulo sogado ta lé né ma néfen it pa, ité tdélé be Yesus, Jou Lahatala ntu njé. 5 Kyat ta réfené rétóf dunia njé ni ta lé né, maduga kyat ta rdélé Yesus, ta I Jou Lahatala Ntu I.6 Yesus Kristus, Jou Lahatala Ntu I. Ntebé po dunia se nut Jou Lahatala ngósno né, faiwóbno ta rbaptis I po wóé lo sogado ta ni léló né megene se nmóté. Nfaftulo ta fatuw ta I Jou Lahatala Ntu I, po wóé lo le pa, mayta sogado po ni léló ta megene se nmóté. Ité tuné né fatuwé sababta Jou ni Rohé njé re néceg ta fatuwé. 7 Reni kawasa abén telé ta rfaftulo ta Yesus Kristus njé fatuw ta I Jou Lahatala Ntu I.
8 Kuasa ta né, esó, Jou ni Rohé njé, esó nóté, wóé ta rbaptis Yesusé né, re Yesus ni léló ta megene né. Abén tel ta né rfaftulo nuéncó le ta fatuwé, Yesus Kristusé Jou Lahatala Ntu I. 9 Né Jou Lahatala ta nfaftulo ité, bo tuné Yesus Kristus I Ntu I óro. Ité re tlongé ta kyaté réfétno ité, se tdélé, mayta nte Jou Lahatala ta nfatuwo ta néi, se ta délé fatuwé. 10 Se kyat ta rdélé Jou Lahatala Ntu njé, kyat ta né re rdélé po wlori wlólo fatuw-fatuw ta Jou Lahatala nécegé né. Kyaté ga rdélé pa, necé re récegé Jou Lahatala nmalólé, sababta Jou Lahatala nfaftulo ta Yesusé njé fatuwé I Ntu I, mayta kyat ta né rétóf I. 11 Jou Lahatala re néceg ta nte: I bo nfayangésé rór sélsólé né, bo it re I sogado fajé nénéli le. Ta mulo bo Npe ta né, ité tdélé Ntu njé. 12 Kyat pai le ta wlo njé ntolén po Jou Lahatala Ntu njé ni, nduk salamaté se i re Jou sogado fajé nénéli le. Kyat pai le ga wlo njé i po Jou Lahatala Ntu njé ni pa, né re nétóf I se nduk i pa, salamaté njé.
Iga tdélé Jou Lahatala Ntu njé, tduk ta fié félé
13 Nik suraté nte farimé re klefo po mew ni, bo mew ta fdélé Jou Lahatala Ntu njé funé ta Jou re nfayangésé nómi sélsólé né, se fatuw-fatuw mew re Jou nte sogado fajé nénéli le. 14-15 Fajé nóté, tégbóno Jou Lahatala né, témtat pa, sababta ité tuné ta I nlongé ité. Sói le ta téroré né, ga nfamgo re I wlo, né re tuné ta téroré né re ndo ité.
Tgali rir délé, bo rpólén si nmulé po Jou ni
16-17 Iga tpe sélsólé, necé ni ngale, tdéréré pa Jou ni méiténé né. Reni sélsól ta iga téyówé Jou nmulé, Jou nase nfayangésé keé. Bo iga kyat faisó npe sélsól ta né, ga témnaw ta npe né, né ité mare téror po Jou Lahatala ni, téceg kyaté njé ngósno, pocé Jou Lahatala nase nfayangésé nó sélsólé né, se i re Jou fié nmulé. Reni sélsól esó nóté ta Jou na nfayangés pa, mayta tcól sogado fajé néli le. Selsól ta téroré Jou nfayangésé né, sélsól ta né pa.
Ité Jou Lahatala ntu ité se tdélé be I le
18 Kyat pai ga re npo wlo njé po Jou Lahatala ni, se Jou re npo i wlo ta nóbéné, né ité tuné, i rentébné nénenpe sélsólé né, sababta Jou Lahatala Ntu njé nfaménawé i fié, se setané riri kolano njé bo npawél i ma néfen i pa.
19 Ité ma tuné, ité wloré njé lima Jou Lahatala ni, se Jou Lahatala ntu ité, mayta farimé kyat nésé po dunia njé ni, setané riri kolano njé ta nkawasa keé si.
20 Ité ma tuné, Jou Lahatala Ntu njé re nwómé, re npe sogado ité tfayal Jou Lahatala ta fatuw-fatuwé. Ité tuné wloré njé rentolén po Jou Lahatala ni né, sababta wloré njé rentolén po Ntu Yesus Kristus ni. Yesus Kristusé I ro Jou Lahatala, isó pana. I ta npe it re Jou Lahatala sogado fajé nénéli le.
21 Nik wyói-wyói ta kmasié mewé, wlomi né ntolén be po Jou ni, mati sogado nésagél i po gewgów-gewgów nésé nóté na.