3 Yohanes
Surat Yohanes
ta kétiga né
Salam
1
Ya, Yohanes, ta rkakmé ya kyat tut ya, klefo nik suraté nje po aw ni, Gayuse ta nik dél faljil awé. Awé ya kmasié aw fatuwé. 2-4 Rir dél ta si ma rdélé Jou Yesus Kristusé né re rwóm lima, se re réfétno ya ta awé fatuw-fatuw ta mdélé Jou fié. Farimé ta mpe né nfamgo re Jou ni méiténé né. Klongé fajé né, kséngé! Kséngé né ta délé kséngé, klongé ta nik yomya né rpe né nfamégo re Jou ni méiténé né! Reni pana séngséngé ta dolo fajé. Se, ta wlemé fié po Jou ni né, ya kéror po Jou ni, bo ta mduké né, ta fié bóto, nim badané ma po féyfié wlólo le.Kyat ta rfafan Jou ngósno né, tut si fafié
5-6 Nik dél ta kmasié awé, ité rir dél ta rfafan Jou Yesus ngósno po pnuw re pnuwé né, masike mfayal si pafule ma, awé re myó si, mut si fié, re mfaménawé si. Anim féyfié né, kyaté re réfétno mam jemaate nje. Se kécego awé bo ma mtébné na, mgawéne si le, bo riri yabé po pnuw re pnuwé né ndél fié, re Jou ma wlo ncuka ta mpe né. 7 Kyaté nesté rfafan Jou Yesus ngósno, rut po kyat ta rfayal Jou pafule né, réroro si gélesó pa, maduga ruto si be Jou ngósno. 8 Se it ta tdélé Kristusé né, ta mare tgawene si, bo rfafané riri yabé. Tpe fajé né, necé it re si re tfalgali tut Jou Lahatala ngósno.
9 Ya re kfanaté surat néli po jemaate njé ni, kfabingo si kyat ta bo rwómé rut Jou ngósno nesté, se kané mewé bo fgali si. Nópé ga suraté njé nwóm néli né, Diotrefes wlo pa ndéréré né, sababta néyówé bo i ro ta ndadi kyat tut po jemaate wlólo. 10 Se nomesta ya kwóm néli mew ni, ga nase kfabingé Diotrefes po mew ni, sababta i re nfangósén lé am néli re lima. Taga necé le pa, mayta wlo pa bo kyat ta rut Jou ngósno né rtolén pocé. Kyaté bo rgali si ma, npo fié pa se nfaungé keé si po jemaate njé ni.
11 Nik dél ta kmasié awé, kyat ta rpe ta lé, mati ma mtalko si na. Mtalko be kyat ta rpe ta fié. Sababta kyat pai npe ta fié né, necé ni ngale Jou ta npo i wloné ta nóbéné. Kyat pai ta npe ta lé né necé nfayal Jou pa. 12 Nik dél isó, ngósno Demetrius, iga re nwóm pocé, mfaménawé i fafié re mgali i. Farimé kyaté rfayal i fié. I ni fénfan re téltoléné né ma nfamgo re Jou Lahatala ni méiténé né. Amé kéfétén i ni féyfié né, bo mewé funé ta amé kécegé né fatuw bóto.
Yohanes nfawasé i
13 Klefo suraté nje né, ndé fafié, reni félé lesu ta bo kécego awé, mayta kwóm pote su. 14 Nomesta nganésó péluwé nte, kwóm néli aw ni, ga taga tfaméiténé tfatébono, bo kécego awé. 15 Kéroré né, Jou ni féyfié ta pélóyé né ntébtubo awé sogado wlemé njé nménóné i le. Nim dél pote fajé né rfanaté riri tabea po aw ni. Amé ma kfanaté mam tabea po rir dél ta pocé fajé né, po isó re isó ni.