It ta tdélé Jou né, Jou nyó it dolo I Ntu ité
3
Jou Lahatala ni masié po it ni ta délé pélóyé, sogado it ta tdélé I né, nyó it dolo I ntu tuo Ité! Né fatuwé, ité nte I ntu ité! Mayta kyat ta rdélé Jou pa né, runé pa ta Jou ntu ité né, sababta si rfayalé rir Papa Jou Lahatala pa. 2 Faftén re farémóné ta kmasié mewé. It ta ntei óro, ta re tdadi Jou Lahatala ntu ité. Pote se néli dunia nje re nkiamaté se Kristusé nwómé nmulé, rir us re wlor ta bo niwén i né, tuné pafule nte. Ité tuné be, ité nase dolo Kristus, sababta ité nase témnaw I re mtor peluw, re tuné I ta fatuw-fatuwé sogado po wlo wlólo. 3 Farimé it ta rir ngongano po kiamate né ta dolo né, ité tuté wloré né fafié bo métegélé ndimé, dolo ta métegél po Kristusé wlo wlólo né.4 Kyaté-kyat ta rpe be sélsólé, necé rdéréré pa Jou Lahatala ni méiténé né, sababta, sélsól sói le ta tpe né, ni ngale tcól po Jou Lahatala ni méiténé lo. 5 Mayta mewé re funé ta mulo sogado Kristusé ntebé po dunia wlólo nte, bo nfayangésé keé rór sélsólé né, sababta Kristusé renó sélsól gélesó pa. 6 Se ta mulo né, kyat pai le ta wlo be po Kristus ni le, i re ntébné npe ta sólé né. Kyat pai ta nénpe sélsólé lesu, né nfayalé Kristus ta fatuw pafule, re nuné I facuci le ma tisé.
7 Nik wyói-wyói ta kmasié mewé, fpe mew fafié, bo mati kyaté né ruté mew po sélsólé lo na. Sababta, bo wlomi né métegélé, nase ta fpe né ma métegélé ndimé se re ftubo ta métegél ta po Kristusé wlo wlólo né. 8 Se bo kyat pai ta npe sélsólé lesu, nejé setané riri kolano njé ntu i, sababta ntubo setané riri kolano njé, ta ni yabé né tatubé lima lesu sogado nte npe be sélsólé. Necé ta mulo Jou Lahatala Ntu njé ntebé po dunia ndadi kyat i, bo nfayangésé keé farimé setané riri kolano njé yabé léo né.
9 Kyat pai ta re npo wlo njé néli Jou ni, se Jou re npo i wlo ta nóbéné, bóngo ntébné nénenpe ta sólé né, sababta Jou wlo njé I po i ni. I ntébné nénenpe ta sólé né, sababta renduké wlo ta nóbén lima Jou ni se. 10 Kyat ta rdéréré Jou Lahatala se re rdadi I ntu si né, nfalcól re kyat ta rdéréré setané riri kolano njé se rdadi setané rir kolano njé ntu si né. Tfayal si né fanfaje: I ga ta rpe né métegél pa, nesté Jou Lahatala ntu si pa, mayta setané riri kolano njé ntu si. Fajé nóté, iga re riri masié po isó re isó ni pa, si Jou Lahatala ntu si pa, mayta setané riri kolano njé ntu si.
Tfamésié isó re isó
11 Faiwóbno ta flongé Jou ni méiténé né se fdélé Kristusé né, né flongé Jou ni méitén ta nte: Ité mare tfamasié isó re isó. 12 Mati rir lé kyat na, ma sogado ttalko Kain na. Kainé wlo njé ndé lima setané riri kolano njé ni se npuné keé fténo njé. Kécego mewé, ta mulo Kainé npuné keé fténo njé né, sababta i nénpe be ta lé, se ntelengene fténo njé ta npe be ta métegélé. 13 Faftén re farémóné ta kmasié mewé. Ta dolo Kainé ni lé fténo njé né, fajé nóté ta mewé fpe ta fié né ma, kyaté nase riri lé mewé. Mati ma ftélél na. 14 Ité re tfamasié po isó re isó, se re tuné ta fatuwé, ité wloré njé Jou re niwén i ndadi nóbéné. Mayta farimé kyat ta rfamasié po isó re isó pa, si wlori né ta né óro. 15 Sababta kyat pai ta ni lé kyaté, masike nfapun pa, Jou Lahatala néceg rénfapuné, sababta ni lé kyaté. Kyat pai ta nmafapuné, necé mewé re funé, isó pa ta Jou Lahatala nase nfasalamat i bo i re Jou sogado fajé nénéli le.
16 Masie ta fatuwé né Kristusé re nfaftulo ité. Né, fanfaje: I re npo keé ni diri sogado nmóté bo nfasalamat ité. Se ité ma mare tmasié kyat ta dolo né nóté, tpo rir diri, masike tmóté, bo tpe be kyaté riri ta fié. 17 Kyat pai reni renó, ga nuné ni délé njé reni re nó pa, mayta nfamétuwé wlo njé se n-gali i pa, iga nécegé cogo nmasié Jou Lahatala, necé nlóle! Necé reni masié pa! 18 Nik wyói-wyói ta kmasié mewé, ité mare tfamasié ta fatuw-fatuwé. Mati maduga técegé le na, “ya kmasié si,” mayta mare tfaftulo ta fatuw-fatuw po si ni.
19 Iga ité tfamasié ta fatuwé, necé ité tuné ro ta fatuwé re tdéréré Jou ni méiténé, se bo tégbóno I né, témtat pana, 20 sababta masike po wloré wlólo né tbósémé tcólé lesu, mayta Jou Lahatala nuné ndimé ta po wloré wlólo, ta ité tmasié kyaté.
21 Faftén re farémóné ta kmasié mewé. Iga po wloré wlólo né tuné ta tcól pa, tégbóno Jou Lahatala né, témtat pa. 22 Se bo téror sói néli po I ni né, nase ndo ité, sababta ité tdéréré ta I nané ité, re ité ma tpe ta nfamgo re I wlo njé. 23 Ta Jou Lahatala nané ité tpe né ta nte: Farimé ité mare tdélé I ntu Yesus Kristus re tfamasié isó re isó ta dolo Kristusé nané ité né. 24 Pai re pai ta rdéréré ta Jou Lahatala nané né, wlori né rentolén po I ni, re Jou Lahatala wlo njé ma ntolén po si ni. Ité tuné ta fatuwé I wlo njé ntolén po it ni sababta ni Roh ta npo ité njé ntolén po wloré wlólo.