Kristusé ta nfaféyfié it po Jou Lahatala ni
2
Nike wyói-wyói ta kmasié mewé. Ta mulo klefo suraté nte po mew ni, bo mati fpe sélsól na. Mayta bo reni ta tpe sélsólé, né rerir Yesus Kristus ta bo nut ité se nfawómo po rir Papa Jou Lahatala ni, bo mati nfasólo it na. Yesus Kristusé, I ta renó sélsól pa. 2 Yesus Kristusé ro ta re npo ni diri sogado nmóté né, nfauto keé ité rór sélsólé né ndimé bo it re Jou Lahatala tdadi fié nmulé. Nfauto né ité rór sélsólé le pa. Maytabóngo farimé kyat po dunia pópo lo nte, I ta nfayangésé keé róri sélsólé né.3 Iga ta Jou Lahatala nané ité né tdéréré, necé ité tuné ta fatuwé ité tfayal Jou Lahatala. 4 Kyat pai ta nécegé cogo nfayal Jou Lahatala, mayta iga ndéréré pa ta I nané né, kyat ta njéi nlóle, nfayal Jou Lahatala pa, re Jou Lahatala ni méitén né ma reni ngale pa po i ni. 5 Fajé nóté, kyat pai ta ndéréré Jou Lahatala ni méiténé né, necé ga taga nmasié Jou Lahatala ta fatuw-fatuwé, ta dolo Jou Lahatala ma nmasié ité né. Pocé bóngo tuné ta fatuwé wlo njé ntengen po Jou Lahatala ni. 6 Kyat pai ta nécegé, “Ya wlegé njé ntengen po Jou Lahatala ni,” kyat ta njéi, nfan re ntoléné né mare ndéréré ndimé ta dolo Jou Yesus npe né.
7 Faftén re farémóné ta kmasié mewé, faftóté ta kfawómo mewé nte, ffamasié isó re isó. Faftóté njé faftóté wóbno i pa. Tatubé lima lesu, ta taga fdélé Jou Yesusé né, kyaté re rfawómo mewé. 8 Masike faftóté njé re némnuwé, mayta dolo nóbéné lesu, sababta Jou re npo ni masié po it ni né pélóyé, fajé nóté re mewé ffamasié isó re isó. Se Ménano ta fatuwé njé rentolén po wlomi wlólo sogado refee keé dérorémé njé.
9 Kyat pai ta nécegé wlo njé i po manano wlólo, mayta ni lé kyaté lesu, necé wlo njé i po manano lo pafule, mayta sogado nte, i po dérorémé lo lesu. 10 Mayta kyat pai ta reni masié, se npe ta fié po kyaté, necé ga taga fatuwé wlo njé i be po manano wlólo. Ta lé sói le, bo nbaja i ma, wlo pa ndimé. Se ta mulo né, ité mare tfamasié isó re isó. 11 Pai ga ni lé kyaté, né wlo njé ndérorémé, se farimé ta npe né ma lé ndimé. Kfatailo i dolo kyat ta rébyafé se némnaw gélesó pa, wlo njé ndérorémé se re ndéréré ni yéfén ta nut i po ta lé lo, ma nuné pa.
12 Anik wyói-wyói ta kmasié mewé, ya klefo suraté nte po farimé mew po jemaat-jemaate né, sababta Jou Lahatala re nfayangésé nómi sélsólé né, i mdio né ta Yesus Kristus npo ni diri sogado nmóté. 13 Ya klefo suraté nje po mew ni, délut-délut ta refémnuwé fdéréré Jou Yesus, sababta mewé re fayal Jou Yesus fié. Yesusé ro ta faiwóbno fafié dunia njé ndadi i pafule, I re i pocé.
Ya kfawómo nóté po yomya-yomya wóbno mewé, sababta mewé re fétóf ta lé ta setané nané mewé né.
Anik wyói-wyói ta kmasié mew, klefo suraté nje po mew ni, sababta mewé re ffayalé rir Papa Jou Lahatala. 14 Klefo suraté nje po mew ni, délut-délut ta fdéréré Jou né remnuwé, sababta mewé re ffayal Kristus fié. I ro ta faiwóbno fafié re i pocé.
Ya kfawómo po mew ni nóté, yomya-yomya wóbno, sababta mewé re fdélé Jou fatuw-fatuwé. Jou Lahatala ni méiténé né re po min wlomi wlólo, mewé ma re fétóf ta lé ta setané nané mewé né.
Mati flolém ta dunia ni né na
15-16 Mati flolém ta dunia njé ni né na, mayta flolém be Jou Lahatala. Sababta bo flolém ta dunia njé ni né, nase fdéréré be nimi nafsu ta lé, re farimé ta fémnawé né ma, féyówé bo ménimi ndimé, re ffasenge mewé bo kyaté rtail mewé. Farimé ta necé i, lima Jou Lahatala ni pa, mayta lima kyat ta rmakotalé po Jou ni né. Farimé ta po dunia wlólo ma mati flolémé le na. Bo flolém be dunia njé ni né, necé fmasié Jou Lahatala pa. 17 Dunia njé re ni wlólo farimé ta kyaté rlolémé né nase bo myangésé ndimé. Mayta kyaté-kyat ta rdéréré Jou Lahatala, si re Jou nase sogado fajé nénéli le.
Tfaménawé it fafié, kyat ta ni lé Jou Yesusé njé bo nwómé
18 Anik wyói-wyói ta kmasié mewé, dunia nje re bo nkiamat óro. Mewé re funé Jou Yesus nécegé, iga dunia njé re bo nkiamaté, Kyat Isó ta ni lé Jou Yesusé nase nwómé, bo nfalélólé kyaté, nut si po ta lé lo. Né fatuwé, nte ma reni kyat félé ro ta riri lé Jou Yesus Kristusé re rwómé, se necé re funé ta kiamate njé re nérakén. 19 Kyat ta riri lé Jou Yesus Kristusé nesté, re rcópén si po rir jemaate njé ni. Bo si fatuwé rdéréré Jou ta dolo ité, nase reé it pa. Mayta fajé ro bo tuné si, si rdélé Jou né dolo it pa.
20 Mewé Jou Yesus Kristusé re ntebo Jou Lahatala ni Rohé njé po wlomi wlólo. Roh ta njé i ta nfaftulo mewé, se iga kyaté bo ruto mew méitén ta cogo Jou ni méiténé, mewé re funé méitén ta né fatuw pari tisé. 21 Ya klefo ta né po mew ni, mati fécogoma ya kécegé mewé funé pa méitén ta fatuwé né. Mayta klefo né sababta mewé re funé ro. Mewé ma re funé ro kyat ta rut dodoto ta sól né, necé rduk lima Jou ni méiténé lo pa.
22-23 Kyat ta récegé cogo Yesus maduga kyat biasa ta dolo ité le, kyat ta né ta délé rmalólé. Rdélé pa ta I ntebé yama soroga lo bo nfasalamat ité. Si ro kyat ta riri lé Kristusé. Pana fajé, rir Papa Jou Lahatala ma rdélé I pa. Sababta kyat pai ta néceg Jou Yesusé Jou Lahatala Ntu I pa, nejé Jou Lahatala wlo njé i po I ni pa. Pai ga nécegé ndélé Yesusé Jou Lahatala Ntu I, né wlo njé ma i po Jou ni.
24 Faiwóbno ta mewé tagare fdélé Jou Yesusé né, pocé mewé re flongé Jou Lahatala ni méitén. Se kécego mewé, fenfatélolmo mewé fafié méitén ta né. Iga fdélé be ta né le, nase mewé wlomi né be po Jou Lahatala re Ntu njé ni. 25 I óro ta re néjaji ité bo it re I sogado fajé nénéli le.
26 Ta mulo ya klefo ta né po mew ni né, kfatélolmo mewé bo kyaté-kyat ta réyówé bo rfalélólé mewé né, mati fdéréré si na. 27 Sababta mewé wlomi wlólo né Yesus Kristusé re nfapelo Jou Lahatala ni Rohé njé bo nfaftulo mew méitén tai pua ta fatuw, tai pua ta fatuw pa. Nfaftulo mewé né, ta métegélé ndimé, nlól pa. Se mewé nte fperlu pa na bo kyaté rfasodoto mewé. Fdéréré be ta Jou Lahatala ni Rohé njé re nfaftulo mewé né bo wlomi be po Jou ni.
28 Anik wyói-wyói ta kmasié mewé, kécego mewé, ffan re ftoléné né, wlomi be po Kristus ni, bo néli-néli dunia njé nkiamaté se Kristusé nwómé nmulé, ité tuné ta réror sélsól gélesó pana, se nase tégbóno I né, témtat I pa, re tmóé it pa.
29 Mewé re funé Jou Lahatala wlo njé nmétegélé. Se mewé ma mare funé ta farimé kyat ta rpe be ta métegélé né, si re rduké wlori ta nóbén lima Jou Lahatala ni.