Yakob ecé rlué si po bótén Mesir
46
Yakobé i re ntu re gbu né rfané rlué si po Mesiré, sói néli ta si riri né rfauto ndimé. Rwóm po pnuw ta ngósno Bersyeba, bóngo Yakobé nfapélóy Jou Lahatala ngósno, Jou ta ni papa Ishaké ma nfapélóy I njé. Nfapélóy I né, néwetés haiwané se ntapéné npeé ni sadaka, ta dolo Jou Lahatala nané né.2 Dorém ta néi, nlongé Jou Lahatala nkakém i, “Yakobé! Yakobé!”
Bóngo Yakobé ncóngélé, “Ya I ta nte, Jou!”
3-4 Pocé bóngo Jou Lahatala nécego i, “Ya nte Jou Lahatala, Jou ta nim papa Ishaké ma nfapélóy Ya. Mfan néli Mesiré nte, ma mémtat na, sababta ntéli Mesiré ma anik jaji njé kfadadi i sogado ntim re gbimé né ndadi bangsa isó ta npélóyé. Ya nase ktébtubo re kdéréré mew néli Mesiré. Ya ma nase kelee ntim re gbimé né pote Kanaané nmulé. Pote se néli ta bo mmóté né, nase Yusuf i po lapomé lo.”
5 Yakobé bo neé Bersyeba né, ntu nesté rcaplé i re riri pégelé re nturi né po bendi ta kolano Mesiré njé nfanaté né. 6-7 Bóngo rfan néli Mesiré, ruté riri haiwan re riri haréta ta rduk po Kanaané né. I ntu re gbu né ma nuté keé ndimé.
Yakobé ntu re gbu ta rdéréré i néli Mesiré
8 Yakobéa ntu re gbu né, farimé rfan néli Mesiré. Bo tétén si né, ta dolo faje:
Yakobé ntu ta i re Lea né, ta ténlóyé njé Rubené, taga ntebé nópé né, Simeoné, Lewi, Yehuda, Isakhare, Zeblum re mépiné njé ngósno Dina. 9 Rubené ntu né, Henoké, Palu, Hezroné, re Karmi. 10 Simeon ntu né, Yemuel, Yamin, Ohad, Yakhin, Zahar, re Saulé. (Saulé ni mama njé mépin Kanaan i.) 11 Lewi ntu né, Gerson, Kehat, re Merari. 12 Yehuda ntu né, Er, Onan, Syela, Peres, re Zera. Mayta Er i re Onané rmót po Kanaané. Perese ntu né Hezron i re Hamulé. 13 Isakharé ntu né, Tola, Pua, Ayub, re Simroné. 14 Zeblumé ntu né, Sered, Elon, re Yahleel. 15 Ta nesté si Lea i re Yakobé nturi re gburi né, rtub po Mesopotamia ndimé. Farimé si dórén yófétel re sételé.
16 Yakobé i re Zilpa nturi né, Gad i re Asyeré.
Gadé ntu né Zifyon, Hagi, Syuni, Ezbon, Eri, Arodi, re Areli. 17 Asyeré ntu móné né, Yimna, Yiswa, Yiswi re Beria re mépin isó ngósno Sera. Beria ntu né, isó ngósno Heber, isó ngósno Malkiel. 18 Yakob i re Zilpa nturi re gburi si, ngósnori né ta né. (Zilpa njé, Lea ni papa npo i se npeé ni beyak i.) Farimé si dórén yófésó re séwonémé.
19 Yakobé i re ni pégelé Rahelé njé, ga nturi maduga séluwé. Isó ngósno Yusufé, isó njé ga Benyaminé. 20 Yusufé ni pégelé njé ngósno Asnat, Potifera imam ta po pnuw Oné njé ntu i. Si nturi né séluwé, Manase i re Efraimé. Si dórén luwé né rtub po Mesiré. 21 Benyaminé ntu né Bela, Bekher, Asybel, Gera, Naaman, Ehi, Rosy, Mupim, Hupim re Ared. 22 Yakob i re Rahelé nturi re gburi né ta nesté, farimé si dórén yófésó re séfóté.
23 Yakobé i re Bilha, nturi né Dan i re Naftali. Dané ntu be isó ngósno Husimé. 24 Naftali ntu né, Yahzeel, Guni, Yezer, re Syilemé. 25 Yakob i re Bilha nturi re gburi né ta nesté, farimé si dórén fité. Mépin ta njé, Rahelé ni beyak ta ni papa Labané npo i.
26-27 Yakobé ntu re gbu ta rdéréré i po Kanaané sogado Mesiré né, kyat yóféwoném re séwonémé. Necé tfaétno ni ménóy re mélófé né pa. Mayta bo tbóngé tfaétno Yusuf re ni pégelé re ntu séluw ta rtub po Mesiré né, ntu farimé né kyat yóféfité.
Yakobé i re ntu re gbu né rfapdipén re kolano Mesir
28 Ta re bo rwóm néli Mesiré né, Yakobé nané Yehuda ntubé néli nkakém Yusuf lima bo rfakduk po Gosyene. Si rwóm néli Gosyene né, 29 Yusufé ncaplo ni bendi njé se nfan lima, bo nfakduké ndé ni papa pocé fajé. Nwóm po Gosyene, némnawé ni papa né, ta délé ncéngé, néli ta négbi i se ntangésé né ta délé mnuwé. 30 Pocé bóngo Yakobé nécegé Yusufé, “Antig ta awé, alli, kécogoma re mmóté, momongo tisé. Kémnaw aw re mtag péluwé nte, ta délé kséngé. Se masike kmót ya ro ma gélesó pa.”
31 Rewóré ta né, Yusufé nécegé fténo re ni dél farimé ta taga rwómé né, “Nte ya bo kfané kfabingo kolano njé, ta fténog re farimé nik dél po nik papa ni umé lo re rwóm lima Kanaané. 32 Ya bo kécego i ta mewé nimi yabé né fpiara domba re sapi, se haiwan ta fpiara né, re nimi haréta sói néli né ma re futé ndimé. 33 Nganesó pa luwé nte, kolano njé nase nkakémé mewé se nutné mewé, ‘Nimi yabé ta fénpe ngénngan néya né sói?’ 34 Pocé, fécego i, ta mewé fémyaku lesu sogado nte né, nimi yabé né fpiara haiwan ta dolo nimi gélé re gaé nesté riri yabé né. Ta mulo kané mew féceg fajé né, kyat Mesiré né rmégisné kyat ta rpiara haiwané, se nase kolano njé nané mewé bo ftolén pote Gosyene nte ro, bo ffalówé pnuw ta npélóyé njé.”