Yusufé nó gelas salaka njé némyangésé
44
Rémnómé rewóré, bóngo Yusufé nané ni beyak ta nkapala po ni umé njé ni né faje, “Méfray gandum po kyaté nesté róri karongé wlólo né, mésut ta ruté réfené, rewóré ga riri pipis ta rpólso gandumé né, méfray nópé nmulé po isó-isó nó karongé lo né. 2 Ya nak gelas salaka njé ga méyó i bo méfray i nóp po ta téwyóy i njé nó karongé lo né, re ni pipis ta npólso gandumé né ma méfray nóp pocé.” Pua ta Yusufé nané né, ni béyaké njé npe ndimé.3 Tómémóné ta mélówé re nfaysayné i né, rpo fié Yusufé fténo nesté réléyé ro se rtuda riri keledai né ta rfan si. 4 Reé pnuwé njé dolo lów pafule, bóngo Yusufé nané ni béyaké njé, “Famla mfajalé kyaté nesté. Mdótél si, mécegé si faje, ‘Amé re kpe mew fié ta né, ga fbalso am re ta lé né! Pe sói se ga flewés wakilé njé nó gelas salaka njé né? 5 Gelas ta njé i, légaé njé néninmo i, népóéné né ma npaké i! Necé, mewé re fpe sól ta pélóy tuwé!’ ”
6 Yusufé nfaftóto i rewóré, bóngo béyaké njé ma nfané nfajalé si. Néli ndótél si bóngo néceg ta dolo Yusufé nécegé né. 7 Pocé bóngo Yusufé fténo nesté rcónglo i, “Fawa ta mécegé né, légaé, dolo ksaé pa. Amé kyó i pa se. Ta mnuwo re lóo i nje, kpe ta dolo né kuné pa! 8 Taga awé ma re muné, pipis ta nuéncó réfray po mam gandumé lo né ma, amé re kfamul po aw ni. Nópé ga bo klewés guraci pari salaka po légaé njé ni umé wlólo né, fanfawa? 9 Mayta wóré, méyówé ro po isó-isó nó karongé lo nte. Iga mduk po pai nó karongé lo, kyat ta njé i, mpuné keé i ro. Am ta iglé né ga fpeé nimi beyak amé.”
10 Yusufé ni béyaké njé ncónglo si, “Iya. Mayta faje: iga kduk po pai ta nó karongé lo, maduga i le ta kéyó i bo kpeé mam beyak i. Ta iglé né ga masike ffan mewé ro.”
11 Rlongé ta né, bóngo isó-isó ntebo nó karongé né nópé se résólé. 12 Bóngo kyaté njé nfaléyówé po isó-isó nó karongé lo né, faiwóbno ta ténlóyé njé nó, nfawluwo i sogado po ta téwyóy i njé nó lo né, ga nduk gelas salaka njé po Benyaminé nó karongé wlólo. 13 Rémnaw ta né, bóngo wlori né kangelangé se rfawgawsé keé riri kabaya né. Rewóré, rcaplé riri gina né néya keledai lo né, se rpólén si néli nmulé.
14 Yehuda i re fténo nesté rwóm néli Yusufé ni umé lo né, Yusufé i pocé lesu, bóngo ta délé réspók nóp usno lo né se rcuba i. 15 Bóngo Yusufé nécegé si, “Mewé fpe sói né? Mewé funé pa-ó? Ta ya nak urémé né, kuné ndimé, pai le ta npe ta lé né.”
16 Yehuda ncónglo Yusufé, “Légaé ta awé, amé nte bo kéceg sói nóté? Bo kétóf fawa? Jou Lahatala re nfaftulo mam sélsólé né po aw ni. Se nte farimé amé, mpeé nim beyak amé. Mati maduga ta fduk gelas po nó karongé lo njé le na.”
17 Yusufé ga ncónglo si, “Tisé! Masolo i le ta bo kpeé nik beyak i né. Ta iglé né kpo mew fié, bo féléy néli po nimi papa ni.”
Yehuda néroré bo Benyamin mati rfasól i na
18 Yehuda nlongé ta né ta nyóg nétó Yusuf usno lo né, bóngo néceg faje, “Légaé ta awé, ma msawan ya na, mpo ya fié bo kméitén kdé aw facuci. Awé nim kawasa né pélóyé, dolo kolano Mesiré njé le. 19 Nuéncó né re mutné amé, ‘Mewé renimi papa lesu re fténomi ta nésé nóté pari tisé?’ 20 Pocé amé ksóngélé, ‘Mam papa njé i pocé lesu mayta re nlégaé. Re fténomam isó nóté, ta ntubé né mam papa re nlégaé. Fténo isó ta si dórén luwé riri mama re papa be isó le né, re nmóté, se nte góli be i. Se mam papa ta délé ngogoru i.’ 21 Nópé awé mané amé kut i lima bo mémnaw i. 22 Mayta amé ksónglo awé, ‘Yomya ta njé, i re mam papa bisa rfaeé pa; bo neé i facuci le ma, mam papa nase nmóté.’ 23 Pocé ga awé msónglo amé, ‘Iga futé fténomi ta téwyóyé njé pa, masike fwómé bo fégbono ya ma, nase ksópno mew pa.’ 24 Ta amé re kéléy néli né, bóngo kéfétno mam papa sói ta awé mécego amé né. 25 Se ta mamé mnómé né re tiso né, mam papa nané amé kfan lima nóté bo kgoné mnómé. 26 Mayta amé ksónglo i faje, ‘É, nase kfan pafule. Mare mpo amé fténomam ta téwyóyé njé su bo ndé amé. Necé ga nase amé kfané. Sababta ta bo kégbono légaé njé né fawa, iga kut i pa né.’ 27 Rewóré ta né, mam papa néceg faje, ‘Mewé re funé, ya kéfsóo Rahelé né, ntig masolo séluwé. 28 Ta ténlóyé njé re nfatopo keé ya. Haiwan ta pélóyé renó nó i se sogado nte re kémnaw i pana. 29 Se iga bo fyó keé isó njé nóté, ga npe fagélesó, necé su ga, mewé ffawóm métmóté njé lima ya ni, sababta ya nte re klégaé.’”
30-31 Pocé, Yehuda nbóngé ni méitén po Yusuf ni nóté, “Ta mulo sogado kéfétén ta né, bo muné, légaé: Iga amé kéléyé ga kuté fténomamé njé néli mam papa ni pa, mam papa njé nase nmóté. Sababta wlo njé masolo i po ta téwyóyé njé ni. Fajé nóté mam papa re nlégaé. Iga wlo njé ga nkangelangé le, nase sogado nfauto i po métmóté lo. 32 Ta ga ya re kéjaji i, se yomya ta njéi né nuné masolo ya ta bo kfaménawé i né. Iga kéléyé ga kut i pa, ya ta kpó ni sélsólé né sogado fajé néli le. 33 Ta mulo né, ya kéror po aw ni bo ya ro ta ktolén pote kiwéné fténomamé njé bo mpeé nim beyak ya. Fajé, bo i ta néléyé ndé fténomam ta iglé né. 34 Sababta ya bo kéléy néli mam papa ni fanfawa?, bo fténomam ta téwyóyé njé ga ndé pa né. Ya kéfen pa bo kémnawé mam papa njé nduk kangelang fagélesó né.”