Yusufé ntebo kolano Mesiré njé ni bélisé ni ngale
41
Pocé se néli i mnuwo taun nuén luwé, kolano Mesiré njé nbélisé. Po ni bélisé wlólo né nénwosél po wóé Nil bobo. 2 Néga némnaw sapi séfité si póp wóé lo se rawét néya méltepé lo. Rbékboké, pluri né ma ménénésé. Si néya, ga ró gémuné ta po wóé bobo lo né. 3 Mnuw pa, sapi séfité nóté si póp wóé lo se rawét néya. Haiwané nesté rgégisé, ta délé liké natéf momé. Si néya bóngo rwosél po sapi ta rbékboké né lapori lo. 4 Nópé ga rtolmé keé róri sapi ta rbékboké né. Rewóré ta néi, kolano njé tésib i.5 Mnuw pa, némtol i nmulé, bóngo nbélisé nóté. Po bélisé wlólo né, némnaw gandum jóbé esó ni gégé né abén fité, ni ngai né pékpokém re wóngtori fié. 6 Rewóré ta né, némnaw gandumé ni jóbé esó nóté, ni gégé né ma abén fité. Ni ngai né myaku ga mlayé ndimé, moré timélé wlólo se. 7 Pocé ga gandum ta ni ngai mlayé né, rtiglé keé ta wóngtori fié né. Rewóré bóngo kolano njé tésib i po yényénéfé lo né se npangéné, ga tagare nuné ta péséwé né nbélisé.
8 Ni tómémóné né kolano njé wlo kangelangé. Bóngo nané rkakémé farimé kyat Mesir ta runé répóéné né, re kyat tut ta runé róri cuce ngasné i né. Rwóm lima bóngo re néfétno si ni bélisé né. Mayta kyat isó ma tisé ta nuné ntebo bélisé né ni ngale.
9 Pocé ga kyat ta nénfaléléy kolano njé nó angguré njé nfatélolmo Yusufé ni faftóté né se nécego kolano njé faje, “Alli, Jou Kolano, ya nte re ksólé, taga kfatélolmo ya se. 10 Nuéncó awé msawan ya re nik dél ta nénfaléléy nam roti njé, se mfasung am po bui ta i po kapala jojaga kadatongé njé ni umé lo né. 11-12 Pocé fajé am re móné mya isó, kyat Ibrani i, ngósno Yusufé. I ndadi beyak po kapala jojaga kadatongé njé ni. Dorém esó ya re nik délé njé kbélisé. Mam bélisé ni ngale né nfamgo pa. Pocé amé kéfétno i, se ntebo ni ngale né esó-esó. 13 Ntebo ni ngale nópé né, reni ta sól pa. Né, Jou Kolano awé re myó ya nmulé se kpe nik yabé dolo tatubé né nmulé, mayta nik dél ta nénfaléléy nam roti njé ga mésóbéyé keé i.”
14 Kolano njé nlongé ta né, bóngo nané ni kyaté né rfasópén Yusuf po bui lo, bo rut i néli i ni. Nécegé ntébén, ta si néli se rcópné i. Yusufé nkótélé keé ni uté né, néngalén i fafié, ta nfané négbono kolano njé.
15 Néli, bóngo kolano njé nécegé i, “Ya nte kbélisé, mayta kyat faisó ma tisé ta nuné ntebo ni ngale né. Ya klongé cogo awé muné mtebo bélisé ni ngale né se ta mulo kkakém awé bo kéfétno awé nik bélisé né.”
16 Yusufé ncónglo kolano njé faje, “Jou Kolano, né ya pa, mayta Jou Lahatala ta nase ntebo nim bélisé né ni ngale ta mgo.”
17 Pocé bóngo kolano njé néféténé ni bélisé né: “Ya kbélisé cogo kénwosél po wóé Nil bobo. 18 Bóngo kémnaw sapi séfité, rbékboké, pluri né ma ménénésé, si póp wóé lo se rawét néya méltepé lo, bóngo ró gémuné ta po wóé bobo lo né. 19 Mnuw pa, kémnaw sapi séfité nóté rgégisé, si póp wóé lo se rawét néya, ta délé liké natéf momé. Ta mnuwo re lówo i po Mesiré nte, ya kémnaw pafule, sapi ta gégisé ta dolo necé i né! 20 Pocé ga rtolmé keé sapi ta rbékboké nesté. 21 Mayta, masike rtolmé si ma, rmesé facuce le ma tisé, rgégisé si fajé le. Kbélisé ta né rewóré, bóngo tésib ya.
22 Mnuw pa, kémtolé nmulé, ga kbélisé nóté, kémnaw gandum jóbé esó ta ni gégé né abén fité, ni ngai né ma pékpokém re wóngtori né fié. 23 Rewóré, kémnaw gandum jóbé esó nóté, ni gégé né abén fité, ni ngai né myaku-myaku re mlayé ndimé, moré timélé wlólo se. 24 Télél be gandum ta ni ngai mlay re rgégisé né rtiglé keé gandum ta ni ngai né pékpokém re wóngtori fié né. Nik bélisé né ta lóo né. Re kéfétno kyat ta runé répóéné né, mayta rtebo ni ngale né runé pa.”
25 Kolano njé néféténé rewóré, bóngo Yusufé néceg faje, “Jou Kolano, bélisé abén luw ta né, ni ngale né nfamgo le. Po bélisé ta né, Jou Lahatala re nfabingo awé ro, sói ta I nase bo npe ta tégbóno néli nte. 26 Sapi séfit ta rbékboké né ni ngale taun nuén fité. Gandum gégé fit ta wóngtori fié né ma, ni ngale taun nuén fité. Bélisé abén luwé né, ni ngale be esó le. 27 Sapi séfit ta rgégisé, re gandum gégé fit ta gégisé né, ni ngale po taun nuén fité wlólo téntónémé né nfatmóto i se kyaté né nase nfatélóto i.
28 Se Jou Kolano, necé ta dolo ya re kéceg péséwé né, ta Jou Lahatala re nfaftulo sói ta nase I bo npe. 29 Né, po taun nuén fit wlólo ta tégbono néli nte, nase reni mnóm félé tuwé po bótén Mesiré nte. 30-31 Rewóré ta né, ga taun nuén fité wlólo nóté, téntónémé né nmót i ndimé se kyaté né nase nfatélóto i. Nfatélóto i né ta délé météwé se sogado rfatélolmo si pana po taun-taun ta re télapas ta róri mnóm félé lesu né. Télóté njé nase ta délé météwé.
32 Nim bélisé gandum re sapi né ni ngale be esó le. Ta mulo Jou Lahatala npo aw bélisé sogado abén luw ta né, bo muné ta fatuw-fatuwé Jou Lahatala re nfaréné rewóré se nte re bo nwómo i ro.
33 Se ta fié né, Jou Kolano, méyówé kyat faisó ta bo néngóto nim bala re kawasa po taun-taun ta tégbono néli nte. I mare nuné fié nfaréné kyat ta félé po féyfié re po kangelangé wlólo né. 34-35 Bóngo mélóngé kyat ta pélóy faséfis néli nóté bo rbóngé kyat ta njéi. Kyaté nesté rkuasa bóténé njé ndimé, bo isó-isó nae ta re róri téntén yabé, bo rané kyaté né, rut Kolano awé ngósnomé. Se po taun-taun ta mnóm félé, si ta bo rané kyaté rfajólo gandum faiglé. Pua ta kyaté né rfalingété, rpe téntén faabén limé, rané si bo rpo faabén có, bo risén po pnuw re pnuwé. 36 Gandum ta riséné né, rfaléléy nópé, bo taun nuén fité wlólo ta kyat po Mesiré nte réroré mnóm pana, nase tó ta néi. Iga mpe fajé, nim bala re kawasa né nase rmóté mnóm pa.”
Kolano Mesiré npo kawasa po Yusuf ni
37 Rlongé Yusufé ni méitén ta né, kolano Mesiré njé i re ni kyaté-kyat ta pélóyé né rfauto fio. 38 Bóngo kolano njé nécego si faje, “Alli, ga kyat ta dolo Yusufé nte ténduk pa! I ta délé Jou Lahatalaa ni Rohé njé ntolno i.”
39 Bóngo kolano njé nécego Yusufé, “Jou Lahatala re nfaftulo keé awé ndimé, se isó pana ta nuné fié ta dolo awé. 40 Se nte ya kélóngé awé bo mkawasa keé bótén Mesiré nje. Farimé nik bala re kawasa né nase rlongé be awé. Masolo ya le ta nik kawasa né npélóy po aw ni.”
41-42 Nécegé rewóré, kolano njé nésólé ni yaliyali ta reni fafayalo kolano ni kawasa njé, se nfaisno i, bóngo néceg faje, “Ngénngan ta nje, ya kélóngé awé bo mkawasa keé bótén Mesiré nje ndimé.” Rewóré, nfaisno Yusuf kabaya isó ta ni ngalépé né mulo pélóyé, bóngo nduwo i rante guraci esó nóp koko lo né.
43-44 Pocé kolano ni bendi né séluwé, se npo Yusuf isó bo ncaplo i, bóngo nané ni kyaté né rfané réntubé bo rén-gagélayé, “Ffamówé yéféné, kyat ta nkawasa njé nwómé! Ma ffaket na, ffamówé yéfén!”
Pocé bóngo kolano njé nécegé Yusufé, “Ya ta kkolano se kécego awé. Farimé kyat ta po Mesiré nte, iga awé mpo fié pa, isó bisa npe gélesó esó pa.” Se ta kolano njé nélóngé Yusufé ndadi ni wakilé njé ni fénfané né ta dolo né.
45-46 Pocé bóngo kolano njé niwéné keé Yusuf ngósno né, nfangósno i, ‘Zafnat-Paaneah’. Rewóré ta né, kolano njé nfafsóo i re mépin isó ngósno Asnaté. Asnaté ni papa ngósno Potifera, imamb i po pnuw Oné.
Ta Yusufé ndadi kolano ni wakil po bótén Mesiré né, ni umur taun nuén yófételé. Kolano njé nélóngé i rewóré, Yusufé ncópén po ni kadatongé lo né, bóngo nfan po pnuw re pnuwé, néjelé keé bótén Mesiré njé.
47 Pocé, po taun nuén fité wlólo né, gandum ta ringét po Mesiré né, re néntofu i néya. 48 Bóngo Yusufé nfajólo gandumé né, nisén po pnuw re pnuwé. Gandum po bétbét ta rakén pnuw ta njé i ni né, nisén po pnuw ta njéi ni ro. 49 Gandum ta Yusufé nfajólo né, cuce i pa, i féléo né dolo sésé ta po wolét lapo lo né, sogado résuté ma réfen pa se rétén pana.
50 Po taun nuén fité wlólo ta mnóm félé lesu né, Yusufé i re ni pégelé Asnaté re rduké nturi món séluwé ro.c 51 Ta ténlóyé njé nfangósno i Manasé, ta ni ngale né “fatélolmo pana”. Néceg faje, “Kfangósno i Manasé, sababta Jou Lahatala re n-gali ya sogado kfatélolmo ya pana kangelang ta re télapésé né re farimé kyat ta po nik papa ni umé lo né.” 52 Ntu ta isó i njé ga nfangósno i Efraimé, ta ni ngale né “re ntig séluwé”. Bóngo néceg ta, “Kfangósno i Efraimé sababta masike rwagé keé ya pote bótén Mesir, mayta Jou Lahatala nmasié ya sogado npo ya kduké ntig séluwé.”
53 Pocé sogado taun nuén fité wlólo ta mnóm félé po Mesiré né re télapésé. 54 Bóngo taun nuén fit ta reni mnóm pana né re nwómo i ro, ta dolo Yusufé re nécegé né. Se farimé bóténé ni kyat ta pocé né re nfatélóto i, mayta po bótén Mesiré ga re rfaléléy róri gandumé. 55 Sogado kyat po Mesiré né ma nfatélóto i, bóngo rfan po kolano njé ni, réroré róri gandumé. Kolano njé ga nané kyaté né, “Ffan néli po Yusuf ni, bo sói le ta Yusufé nané mewé né, mare flongé i bo fduké nómi gandumé.”