Kyat sélsólé né riri bélisé né, Yusufé ntebo ni ngale
40
Kolano Mesiré njé reni kyat isó ta ni yabé né nfaléléy kolano njé nó angguré, isó nóté ta ni yabé né nfaléléy kolano njé nó roti. Nuéncó si rpe sól po kolano njé ni. 2 Bóngo kolano njé ncawan si, 3 se nfasungé keé si po bui lo. Bui ta njé i po kapala jojaga kadatongé njé ni umé lo. Yusufé ma re i po bui ta njé i ni se si re i géwgów be esó. 4 Rfasung si pocé né, kapala jojaga kadatongé njé nané Yusufé bo n-gawene kyat séluwé nesté.Kyat séluwé nesté si pocé bui lo né dolo mnuwé. 5 Dorém esó rbélisé. Riri bélisé ni ngale né nfamgo pa.
6 Ni tómémóné né, Yusufé nwómo si néli, ga némnaw si né, wlori kangelangé. 7 Bóngo nutné si, “Nik dél ta mewé. Fpe sói se ga ngénngan ta nje i, kéngóto mewé nte wlomi né dolo kangelangé?”
8 Si dórén luwé né rcónglo Yusufé, “Dorémé lo amé kbélisé, mayta reni pa kyat ta runé rtebo ni ngale né.”
Pocé Yusufé nécegé si, “Masolo Jou Lahatala le ta nfaftulo kyaté, bo rtebo bélisé né ni ngale. Se féféténé nimi bélisé né bo klongé.”
9 Pocé bóngo ta nénfaléléy kolano njé nó angguré né néféténé ni bélisé njé, “Po nik bélisé wlólo né, ya kémnaw po ta kégbono nétó né, cogo reni anggur aysó. 10 Ay angguré njé nésagél i abén telé, tagare nétubél i, ma ni bunga né re nésaén i. I pyono né ma re nmóré. 11 Po bélisé wlólo né, ya kéyó angguré njé pyono né, bóngo kfo i géo né nóp kolano njé nó gelas ta kétané i njé ni, rewóré ga kpo i se ninémé.”
12 Néféténé rewóré, bóngo Yusufé nécegé i faje, “Nim bélisé njé ni ngale né faje: Ay angguré ni sagél abén telé né, ni ngale ngané telé. 13 Ngané tel ta tégbono néli nte, kolano njé nase bo ncópné awé ro po bui nje ni, bóngo nelee aw po nim yabé tatubé lo né nmulé se ménfapel kolano njé nó gelase njé nmulé. 14 Mayta kéror po aw ni, néli, iga re mduk ta fié, mmasié ya bo mfatéylongo kolano njé ta ya nte ksól gélesó pa, bo nfasópéné keé ya po bui nje ni. 15 Sababta ya nte re nuén luw ya ro. Po nik bóténé lo ta kmaméitén Ibrani né, kpe sól gélesó pa ma, rgó ya se rut ya lima. Po Mesiré nte ma fajé nóté, kpe sól gélesó pa ma, rfasungé keé ya po bui nje ni.”
16 Pocé kyat ta nénfaléléy kolano njé nó roti njé nuné ta ni délé njé ni bélisé njé ni ngale né fié, bóngo i ma néfétno Yusufé, “Ya ma kbélisé. Cogo kétopél roti karanjang pételé. 17 Po karanjang ta nélik po ya njé, wlólo kolano njé nó momami né nae ta usé, mayta mané né rwóm lima ga ró keé ndimé.”
18 Pocé bóngo Yusufé ncónglo i, “Anim bélisé njé ni ngale né faje: Karanjang pételé né, ni ngale ngané telé. 19 Ngané tel ta tégbono néli nte, kolano njé nase nané kyaté bo rcópné aw po bui lo nte, ga résóbéy aw po tébtibé lo, se mané né nase rwóm lima ga ró nim wóngété né.”
20 Riri bélisé né re télapés ngané telé. Po ngénngan ta néi, mgo kolano njé ni hari jadi. Se pocé npe ni rame ta pélóyé, nkakémé ni kyat ta pélóy-pélóyé né, rfajól pocé kolano njé ni kadatongé lo. Pocé bóngo kolano ni kyat séluw ta rénfaléléy roti re angguré nesté, kolano njé nané rcópné si po bui lo, bo rut si néli régbono kyat ta pélóy-pélóyé né. 21 Rwóm néli, bóngo ta nénfaléléy kolano njé nó angguré njé, kolano njé nelee i nmulé po ni yabé tatubé lo né, se nénfapél kolano njé nó gelase njé nmulé. 22 Ta nénfaléléy roti njé ga nfasólé keé i, nésóbéy i po tébtibé lo. Se ta Yusufé ntebo riri bélisé ni ngale né, farimé né reni ta sól pa.
23 Mayta ta nénfaléléy kolano njé nó angguré njé, masike re nduk ta fié, ma nfatélolmo Yusuf pana, se néceg pa Yusufé ni faftóté né.