Potifaré ni pégelé wlo lé po Yusuf ni
39
Yusufé, kyat Ismaelé né re ruté keé i po bótén Mesiré se re rwagé i po kyat Mesir isó ngósno Potifaré. Potifaré, Kolano njé ni kyat isó ta ni kawasa pélóyé. I ndadi kapala po farimé kyat ta réjaga kadatongé njé. Yusufé, Potifaré npeé ni beyak i, 2 se ntolén po Potifaré ni umé lo. Jou Lahatala ntébtubo re ndéréré i, se yabé sói le ta i npe né, fié ndimé. 3 Potifaré ma néngóto yabé ta Yusufé npe né fié ndimé, bóngo néceg faje, “Alli, Jou Lahatala fatuwé ndéréré Yusufé!” 4 Pocé bóngo légaé njé wlo ncuka Yusufé, se npo i kawasa bo nfaménawé farimé po ni umé wlólo né. Sói le ta i ni né, Yusufé nkawasa keé ndimé. 5 I mdio be Potifaré npo kawasa ta né po Yusuf ni bóngo ngénngan ta né ro Jou Lahatala npo barakat po Potifaré ni umé wlólo, re ni wódól ta pocé né ndimé, sogado po nó bété lo, sababta Yusufé ntolén pocé. 6 Se légaé njé ni sói néli ta pocé né Yusufé nfaménawé fié ndimé, se i re nuné pana. Masolo nuné be némnóm re ninémé.Yusufé nte móné mya isó ta délé nfié mya. 7 Ntolén pocé mnuw tuw pafule, néga Potifaré ni pégelé mgo wlo i. Wlo njé nlé néli Yusuf ni, se ncogaro i, “Péséwé nte aw lima, bo myénéfé mdé ya é?”
8 Yusufé wlo pa se nécegé i faje, “Matiné, ta riri pégelé awé ga? Mémnaw pa? Nim légaé re ndélé ya se i ni wódól sói néli né re npo ya kkuasa keé ndimé, se i re nuné gélesó pana po umé wlólo nte. 9 Pote faje ya nik kawasa né re nfamgo re nim légaé ni kawasa né. Farimé né re npo ya! Maduga ni pégelé awé nte ga tisé. Né ga bo kpe wleg ta nlé njé fawa? Bo sogado ya kpe fajé, ya re kpe sól ta pélóy po Jou Lahatala ni.” 10 Masike étné ngénngané Potifaré ni pégelé nbaja Yusufé ma, Yusufé ta délé wlo pa nnyénéfé ndé i né, se nsomaya ni diri pa bo nérakén i né.
11 Nganesó Yusufé ncung némin umé wlólo né bo npe yabé. Ngénngan ta néi, reni kyat faisó ma tisé po umé wlólo né, masolo Potifaré ni pégelé nkumél i. 12 Pocé ga ncélok Yusufé ni kabaya, bóngo nécego Yusuf faje, “Aw lima ro, bo tyénéfé se!” Mayta Yusufé nfakuat i se ncéreré i nétó néliké, ga ni juba njé ntéfsalé se pégelé njé nétané keé i.
13 Potifaré ni pégelé némnaw ta Yusufé nfatoléné keé ni kabaya njé, 14-15 bóngo nkakémé ni béyaké né lima se néfétno si, “Lima bo fémnawé nte! Kyat Ibrania njé pa? Ncung némin góoge lo, bóngo négbi ya, ga wleg pa se kgélayé. Nlongé ta kgélayé né, tabóngo ncéreré i nétó néliké, ni kabaya njé ga nfatoléné keé i! Éé, ga nik légaé nut i lima maduga bo nfaméymóy ité né!”
16 Pocé pégelé njé nfapél Yusufé ni kabaya njé po lapo lo sogado ni légaé néléyé. 17-19 Ni légaé néléyé, tabóngo néfétno i, “Légaé, nim beyak kyat Ibrani ta mut i lima njé pa? Ncungo ya némin góogé lo bo nfaméymóy ya né! Ga ya kgélayé, se ncéreré i nétó néliké, ni kabaya njé ga nfatolén i. Nim béyaké njé ga bo nfaméymóy ya né!”
Légaé njé nlongé ta néi, bóngo ta délé ncawané, 20 se nané ni kyaté né rgó Yusufé rfasung i po bui lo. Bui ta njé, mare kyat ta rpe sélsól po kolano njé ni, ga taga rfasung si pocé.
21 Masike Yusuf i po bui lo ma Jou Lahatala ntéptubo re ndéréré i, sogado kapala bui njé ma ni fié i. 22 Bóngo npo Yusuf kawasa bo nfarén farimé yabé ta pocé bui wlólo né, re nfaménawé farimé kyat sélsól ta pocé né. 23 Npo Yusuf kawasa ta né rewóré, bóngo i rencapu néli pana, sababta Jou re ndéréré Yusufé, se yabé sói le ta i npe né, fié ndimé.