Yehuda i re Tamar
38
Yusufé fténo né rwagé keé i rewóré, Yehuda ma nfané nfatolén keé fténo né se ntolén i po kyat Adulam isó ni ngósno Hira. 2 Yehuda ntolén pocé né, nfanuné ndé mépiné mya Kanaan isó, Syua ntu i, se réfsówé. 3 Fajé-fajé, mépiné njé npe lapo. Se nmawyóyé né, ntu njé món i, nfangósno i Er. 4 Rduké nturi ta njé rewóré, sogado rduké nturi nóté, njé ma món i nóté. Nfangósno i Onan. 5 Rduké nturi Onane rewóré, rduké nturi món isó nóté. Nfangósno i Syela. Syela ntubé né, Yehuda re i po pnuw Kezib.6 Pocé se néli sogado ntu ta ntélóyé njé Eré re npélóyé bóngo Yehuda néror mépin isó ngósno Tamaré, se nfafsów si. 7 Mayta Eré npe be ta lé, bóngo Jou ncawané se nfamóté keé i.
8 Eré sogado nmóté né nduké ntu pa bóngo Yehuda nécego ntu Onan faje, “Awé mare méfsóo fténomé ni balo bo ntimé né ta rdadi i ntu, bo ngósno né ma myangés na.”a
9 Onané nlongé ta né, ta ie ga i ntu né nase rdadi i ntu pa, tabóngo néyówé yéféné bo nduké ntu na. Se étné nyénéfé ndé balo njé, ni bibité né nwóté keé po géwgów nésé. Onané npe fajé né, bo mépiné njé ma npe lapo na, bo fténo njé ma re ntu na. 10 Mayta Jou néngóto ta Onane npe né ma lé, se i ma Jou nfamóté keé.
11 Rewóré ta né Yehuda nénuta, “Nte bo ntig Syela ma kané i néfsóo mépin ta nje nóté, ma ga i ma nase nmót dolo fténo nesté.” Bóngo nécego Tamar faje, “Antig Syela yomya i lesu. Ta fié né méléy po nim délut si ni su, bo mtolné nim balo né pocé. Sogado Syela npélóyé ga taga kfafsóo aw re i nóté.” Bóngo Tamaré ma néléy po ni papa ni umé lo se ntolné ni balo né pocé.
12 Né rewóré se télapés taun nuén fis néli, Yehuda ni pégelé nmóté. Nmóté bóngo rfakéwelo ni ngénngané né sogado rewóré ndimé, Yehuda nfan po pnuw Timna po géwgów ta nén-guntingé ni domba-domba plu lo né. Ta rfané né, i re ni faljil Hira, kyat Adulamé njé.
13-14 Tamaré nlongé habar ta kmo njé nfan Timna bo n-guntingé ni domba-domba né pluri, tabóngo nésólé keé ni kabaya balo né, ga nisno ni kabaya ta nésé, taga usno né nfura keé re ulété, se nfan néli ga ntolén i po pnuw Enaimé ni ngówéné gbono, po yéfén ta ntélmé néli Timna njé lapo lo. Tamaré npe fanfajé né, sababta wlo piso Yehuda ta Syela re npélóyé ga nfafsów si pafule se.
15 Yehuda némnaw Tamaré né, nfayal i pa, nfura keé usno né se nécogoma mépin léo né. 16 Pocé bóngo Yehuda nfarakné i néli mépiné njé ni po yéfén lapo lo né, nfayal i pa ta i ni mélófé njé né, bóngo nécego i, “Aw lima, bo it i dórén luwé se.”
Tamaré ga ncónglo i, “Ié ga bo wlem lima ya ni, né bo mpólso ya sói?”
17 Yehuda ncónglo i, “Wóré ga kané kyaté rfatebé nim kabén ta i wóbno faisó.”
Tamaré ncónglo i, “Iya, wlegé. Mayta ta kabéné njé tiso i lesu nte, mare mfatoléné nim wódól fagélesó su po ya ni. Sogado kabéné njé re i pote, ga taga kfamulé nim wódól ta mfatoléné né.”
18 Pocé bóngo Yehuda nutné i, “Wódól sói ta mare kfatolno awé né?”
Mépiné njé ncónglo i, “Nim ngóséné ni cap re nim témóné né re nim tétoné njé.”
Tabóngo Yehuda npo i ndimé, se mépiné njé ma npo ni diri néli Yehuda ni se nyénéfé ndé i. Sogado Tamaré npe lapo né ta, i re Yehuda. 19 Mépiné njé néléy po ni umé lo, se nésólé keé ulét ta nfura usno né, taga nisno ni kabaya balo né nmulé.
20 Yehuda néléy se re nwóm po ni umé lo, bóngo n-nyó kabén ta i wóbno né isó, se nané ni faljil Hira nfatebé i néli mépiné njé ni, bo n-nyó nmulé Yehuda ni wódól ta nfatolno i né. Hira nfan néli ga nfakduké ndé mépiné njé pa. 21 Se nutné kyaté-kyat ta pocé né, “Fémnaw mépin ta góo be po yéfén lapo lo njé pa ó?”
Kyaté né ga rcónglo i, “Kémnaw i pa, taga pote faje reni pa, mépin ta dolo fajé né.”
22 Hira nduk mépiné njé pa bóngo néléyé se nfabingo Yehuda, “Kduk i pa, mépiné njé. Kutné kyaté-kyat ta pocé né ma, récegé cogo, pote faje reni pa mépin yéféné né.”
23 Yehuda nlongé ta né, tabóngo néceg faje, “Ya re kfatuwo nik janji po mépiné njé ni, se re kané awé mfatebé kabéné njé mayta mduk i pa se wóré. Wódól ta kfatolno i, fajé bo nyó ni ro. Mati mutné kyat nóté na, bo mati rfakcegé it re rfamlifo it na.”
24 Né rewóré, se télapés néli halé sni sételé, Yehuda nlongé habaré, ni mélófé njé Tamaré nfapéypeé i se npe lapo. Bóngo Yehuda nané ryó i bo réslay i sogado nmóté.
25 Pocé bóngo kyaté né ryó i se rfané bo rtapén i, mayta Tamaré nané kyaté rfabingo kmo njé faje, “Ta sogado kpe lapogé nte, kyat ta ni wódól né nfatolno ya nte. Se kéroré bo mfayal su. Pai ta ni cap, témón re tétoné nte?”
26 Pocé bóngo Yehuda nlengné wódólé né, ga nfayalé wódól ta né i ni, bóngo néceg faje, “Mépiné njé ncól pa, Ya ta ksólé. Tatubé re kéjaji i, iga ntig Syela re npélóyé bo kfafsów si, né ga sogado nte kfafsów si pa.” Yehuda nuné ta Tamaré npe lapo né i ntu i bóngo wlo pa bo nnyénéfé ndé i nóté.
27 Tamaré ni ngénngan ta bo nmawyóyé né re nwómo i, ga taga nuné wyóy fasosora si ntu né. 28 Se ta nmawyóyé né, wyóy isó nfasópén fao faspal nétó, bóngo biangé njé nétané yomya njé fao né se npitno re lawé mékote, bóngo néceg faje, “Wyóy ta nje ta ténlóy i.”
29 Né ga wyóyé njé nétóbé keé fao né néminé nmulé, se i pa ta ni mama nmawyóé i ntubé, mayta ta isó njé. Biangé njé némnaw ta né bóngo néceg faje, “Beé, wyóy ta awé, se mtubé né ta dolo fajé ó?” Bóngo yomya ta njé, rfangósno i Peres, ta ni ngale “nérub nétó”. 30 Rewóré ga taga ta téwyóyé njé ntubé. Po fao lo né, reni lawe mékót ta mépiné njé npitno i né. Wyóy ta njé rfangósno i Zera, ta ni ngale “mékót tuwé” pari “sélétémé”.