Yusufé fténo né rut i lé
37
Yakobé ntolén i po bótén Kanaané. Tatubé lima ni papa Ishaké ma ntolén i pocé, masike si riri bótén i pa ma. 2 Yakob i re ntu né, bo téfétén si né, ta dolo faje:Yakobé ntu isó ngósno Yusufé. Ta ni umur taun nuén yófésó re fité né, néndéréré fténo ta riri mama Bilha re Zilpa né, se rfaménawé riri papa ni kabén re domba né. Mayta rpe ta lé se Yusufé nfabingé si po riri papa ni.
3 Yakobé ntu ta féléo i né, ni gogoru góo pélóy be po Yusuf ni, sababta Yusufé ntubé né, Yakobé re nlégaé. Se nganesó, Yakobé néringé ni juba isó nbirahi. 4 Yusufé fténo né rémnaw ta riri papa ni gogoru né pélóy be po Yusufé ni, bóngo wlori piso i se bo rméiténé rdé i ma, rgélao i le.
5 Dorém esó Yusufé nbélisé. Bóngo ni bélisé njé néfétno fténo nesté. Rlongé ta néi, ta délé nbóng be wlori pisé. 6 Ta sogado wlori piso i né, i mdio be nécego si faje, “É, flongé nik bélisé nje su: 7 Cogo farimé it po bété lo, tingét gandumé se nae ta tpiténé róré. Pocé ga anak gandum pitén esó né nwosél néya nmétegélé. Ménómi né ga, rfaljelé anaké né se rcuba.”
8 Yusufé néféténé ni bélisé njé rewóré, bóngo fténo né rfakcegé i, “O, se aw-ó ta bo mdadi mam kolano awé né? Mkuasa amé bo ksuba aw-ó?” Pocé bóngo ta délé wlori piso i, i mdio ni bélisé re ni méiténé né.
9 Rewóré ta néi, Yusufé nbélisé nóté, bóngo néfétno fténo nesté nóté, “Alli, ya nte pa? Kbélisé esó nóté! Cogo ngénngané, sni re ngó yófésó re isó rcuba ya!”
10 Ni bélisé ta njéi néfétno ni papa nóté bóngo ni papa n-ngamo i, “Beé, ga nim bélisé sói ta njéi? Se Ya re nim mama re fténomé né kétig nópé bo ksuba aw-ó?” 11 I fténo nesté rlongé ta néi, ta délé nbóng ta wlori piso i, mayta riri papa nisén be po wlo wlólo, bélisé ta né.
Yusufé fténo né rwagé i
12 Nganesó Yusufé fténo nesté rédirké riri papa ni kabén re domba né po bétbét ta nérakéné pnuw Sikhemé. 13 Pocé bóngo Yakobé nané Yusufé, “Mfané bo méflengéné fténomé nesté. Si ntéli Sikhemé, réjaga rir kabén re domba pocé.”
Yusufé ncónglo ni papa, “Jo, papa. Fajé óro.”
14 Ni papa nané i, “Aw néli, bo mémnaw si re rir haiwané né fanfawa, bo méléy lima méfétno ya.” Pocé Yusufé neé lóté Hebroné, se nfan sogado nwóm po pnuw Sikhem tou.
15 Po Sikhem tou né, bóngo nfaléyówé fténo nesté néli re lima. Légaé isó némnaw i ga nutné i, “É, yomya ta awé, méyówé sói?”
16 Yusufé ncónglo i, “Tua, kéyówé fténogé nesté. Si récegé ruté mam kabén re domba né lima pote. Ma ga muné góori né, Tua?”
17 Bóngo légaé njé ncónglo i faje, “O, re rfan si, ya klongé récegé bo rfan si néli po pnuw Dotane.”
Pocé tabóngo Yusufé ma nfajalé si néli, nduk si po Dotane. 18 Lówi lesu, fténo nesté re rfayal i bóngo rfasogaro si bo rpuné keé i. 19 Rfalécego faje, “Cekede, ta nmabélisé njé ta re njé lima ro! 20 Péséwé nte ga i lima, tpuné keé i pa? Wóré ga twóté keé i nóp sumu ta reni wóé pa njé ni, ga tagare tfabingo rir papa haiwan ta pélóyé né rénó i. Se iga re nmóté, ni bélisé njé bo ndadi, ó? ta cogo bo ndadi rir kolano i né!”
21 Rubené nlongé ta né i, bóngo néyówé yéféné bo nfasalamat Yusufé, se néceg faje, “Ma tpuné keé i na. 22 Ta fié né, tégbi i bo tpawélé keé i nóp sumu lo. Sumu ta njé i nélówo pnuwé, se nase isó ta nuné it pa. Mayta mati tfayóbét i na.” Rubené néceg fajé né, nénuta po wlo wlólo, “Péséwé nte iga si re rfan si, kyó i, ga kelee i néli po mam papa ni.”
23 Se pocé ta Yusufé re nwómo si néli né, tabóngo régbi i se résólé keé ni juba ta nbirahi njé. 24 Bóngo rut i néli sumu ta reni wóé pa lo njé, se rpawélé keé i nóp pocé.
25 Rewóré ga rtoléné se rémnómé róri. Rémnómé rtébén pafule, télél be rémnaw kyat suku Ismael ta rfalwagé né rwetco si né nmawólé i. Kyat ta né rtolén po Midian, si po Gileade se lima, bo rfan néli po bótén Mesiré. Po riri unta lo né, reni gina cuce i pa ta bo rwagé po bótén Mesiré né. Ta ruté né, salo, yégét ta rpeo urémé, re yégét ta pépu mnó re ay liko ta pépu mnó.
26 Pocé bóngo Yehuda nécegé fténo ta iglé né, “Ya kénuta, coba tpuné keé fténoré njé, se tépiné i né, nase bo tduké rir sói? 27 Ta fié né, ma tpun i na, bo twagé keé i po kyat Ismaelé nesté ni. Masike fawa le ma, njé ité fténor i se ma tfapisé i na!” Fténo né rlongé ta nécegé né, rfauto fio.
28 Se ta kyat Ismaelé nesté rwetco né, bóngo fténo nesté rélóngé Yusuf po sumu wlólo né néya, se rwagé keé i po si ni. Yusuf mulo né, pipis salaka yóféluwé. Bóngo kyaté nesté ruté keé Yusuf po Mesiré.
29 Ta rwagé keé Yusufé né, Rubené tiso i se nuné pa. Se ta néléy lima né bóngo nfalów néli sumu njé ni bo néfnin i. Néli ga néngóto, Yusufé re tiso i. Bóngo wlo njé npisé se negawésé keé i ni kabaya njé. 30 Néléy i néli fténo nesté ni, bóngo nécegé si, “Yomya njé re tiso i! Ado, ya nte ga nase bo ksóngél fawa po rir papa ni né?”
31 Pocé rfasogaro si se réwetés kabén isó, bóngo ryó Yusufé ni kabaya njé se rcowlé i nóp léló lo né, sogado kabaya njé léló bóto i. 32 Rewóré bóngo rut i po riri papa ni se rfaftulo i, récego i faje, “Papa, kabaya nje, amé kduk i. Coba mfayal i, maga Yusufé ni?”
33 Yakobé némnaw kabaya njé, ta nuné kabaya ta njéi Yusufé ni. Se néceg faje, “Alli! Fatuwé néga, njé ya ntigé njé ni kabaya i! É, nihalé haiwan ta pélóy re nfabolito keé i se rénó nó i!”
34 Bóngo Yakobé wlo njé npisé i se nfawgawsé keé ni kabaya njé, ga nésnipo i ngalép léo. Ngénngan néya Yakobé néntangés i le, nlolémé ntu njé se. 35 Ntu món re mépiné né rwómé ndimé bo rfamémuf i, mayta ndadi i pa le. Yakobé néceg faje, “Sogado kmóté nase ktangés ya le, klolémé ntigé njé se.” Néntangésé né, nésnipo i ngalép léo fajé ro, nlolém be ntu Yusufé se.
36 Ta Yakobé wlo njé nkangelangé lesu né, Kyat Ismaelé né, si re Yusufé, re rwóm néli bótén Mesiré bóngo rwagé keé i po kolano Mesiré ni kyat isó ngósno Potifaré. Potifaré njé ndadi kapala po farimé kyat ta réjaga kadatongé njé.