Esau Ntu Re Gbu
36
Bo kéfétén Esau ni pégelé re ntu nte. (Esau ma rkakmé i Edom).a 2-3 Esau ni pégelé né sételé, mépin Kanaan si: Isó ngósno Ada. (Ada ni papa ngósno Elon, kyat Het i.) Isó ngósno Oholibama. (Oholibama, Ana ntu i. Ana ni papa ngósno Zibeon, kyat Hewi i.) Esau ni pégelé ta isó njé ga, ngósno Basmat. (Ismaelé ntu i, Nebayoté fténo i.)4 Esau i re ni pégelé Ada, nturi njé Elifas. Esau i re ni pégelé Basmaté, nturi njé Rehuel. 5 Esau i re ni pégelé Oholibama ga nturi sételé: Yeus, Yaelam re Kora. Yomya-yomya ta né, Esau ntu si, farimé rtub po bótén Kanaan.
6-8 Esau i re Yakobé rtolén po Kanaané né, rduké riri haréta cuce i pa. Riri haiwané né nbóng ma nbóng i, sogado mnóm ta po bótén ta rtolno i lo njé ma nfamwómo si pana, si re riri haiwané né. Se Yakobé i re Esau bo rfatolné si lesu ma bisa pana. Esau némnaw ta né, tabóngo nlué i po bótén Seir, po bétbét ta nmamététi lo. Nlué i né, nuté ni pégelé nesté re ntu né sogado farimé kyat ta po ni umé wlólo. Ni haiwan re sói néli ta nduk po Kanaané né nfauto keé ndimé. (Esau njé ta Edomé ro.)
9 Esau nluwé i po bótén Seiré né, bóngo i re ntu re gbu né rkakmé si kyat Edomé. Bo kéfétén si né ta dolo faje: 10-13 Esau i re ni pégelé Ada nturi njé Elifas. Elifasé ntu món sélimé, ngósnori né ta nte: Teman, Omar, Zefo, Gaetam re Kenas. Elifasé ma reni pégelé piara isó ngósno Timna. I re mépin ta njé rduké nturi isó ngósno Amalek. Yomya ta nesté si Ada gbu si.
Esau i re ni pégelé Basmaté nturi njé ngósno Rehuelé. Rehuelé ntu món séfóté, ngósnori né ta nte: Nahat, Zera, Syama re Miza. Yomya ta nesté, Basmaté gbu si.
14 Esau i re ni pégelé Oholibama, nturi món sételé: Yeus, Yaelam re Kora. Oholibama, Ana ntu i, Zibeone gbu i.
15-16 Esau ntu re gbu né rdadi suku ta félé. Ntu ta ténlóyé njé Elifas, ntu né nae ta re riri suku. Ta rdadi délut po riri suku lo né ta nte: Teman, Omar, Zefo, Kenas, Kora, Gaetam re Amalek. Si ngósnori né rfangósno keé riri suku né ngósno. Si riri gele, Esau ni pégelé ta ngósno Ada njé.
17 Esau ntu ta ngósno Rehuelé njé, i ntu né ma rdadi délut po nae ta riri suku lo. Ngósnori né ta nte: Nahat, Zera, Syama re Miza. Si ngósnori né ma rfangósno keé riri suku né ngósno. Si riri gele, Esau ni pégelé ta ngósno Basmaté njé.
18-19 Esau i re ni pégelé Oholibama nturi né ma nae ta re riri suku. Ta rdadi délut po riri suku lo ma si ro. Ngósnori né ta nte: Yeus, Yaelam re Kora. Si ngósnori né rfangósno keé riri suku né ngósno. Si riri gae Ana, Oholibama ni papa.
Seiré ntu re gbu
20-21 Bótén Edom ta Esau nlué i se ntolno né, tatubé lima lesu kyat Hori né riri bótén i. Si riri gae ngósno Seir. Seiré ntu sogado gbu né, nae ta re riri suku. Ta rdadi délut po riri suku lo ma si ro. Ngósnori né ta nte: Lotan, Syobal, Zibeon, Ana, Disyon, Ezer re Disyan. Si ngósnori né rfangósno keé riri suku né ngósno.
22 Lotané ntu né Hori i re Heman. Lotané ma re rémó isó, ngósno Timna.
23 Syobalé ntu né Alwan, Manahat, Ebal, Syefo re Onam.
24 Zibeoné ntu né món séluwé, Aya i re Ana. Ana ta njé ta nuéncó nuté ni papa ni keledai nélówé pnuwé bo néfay si, ga nduk wóé méfyanés ta nfateploro i lima bétbété lo né.
25-26 Ana ntu né, Disyon re mépin isó ngósno Oholibama. Disyone ntu né Hemdan, Esyban, Yitran, re Keran. 27 Ezeré ntu né, Bilhan, Zaawan re Akan. 28 Disyane ntu né Us i re Aran. 29-30 Se kyaté-kyat ta nte ta rdadi délut po suku-suku Hori po bótén Edomé né: Lotan, Syobal, Zibeon, Ana, Disyon, Ezer re Disyan. Kéfétén kyat Hori ta rtolén po Seiré né lóo né.
Kolano-kolano Edom
31-32 Ta kyat Israelé né re riri kolano pafule, po bótén Edomé reni kolano ro. Kolano ta faywóbno njé ngósno Bela, Beore ntu i. I lima pnuw Dinhaba.
33 Kolano Bela nmóté, Yobabé niwén i. Yobabé njé, Zera kyat i lima Bozra ntu i.
34 Kolano Yobabé nmóté, Husyam kyat i lima bótén Temané niwén i.
35 Kolano Husyamé nmóté, Hadadé niwén i. Hadadé njé, Bedad kyat i lima pnuw Awité ntu i. I ta nfaparangé ndé kyat Midiané né po bótén Moab, se npawél si né.
36 Kolano Hadadé nmóté, Samla kyat i lima pnuw Masreka niwén i ndadi kolano.
37 Kolano Samla nmóté, Saul kyat i lima pnuw Rehobot ta ntolén po wóé lapo lo, niwén i.
38 Kolano Saulé nmóté, Baal-Hanan, Akboré ntu i, niwén Saulé.
39 Kolano Baal-Hanané nmóté, Hadar kyat i lima pnuw Pahu niwén i ndadi kolano. Hadaré ni pégelé ngósno Mehetabeel, Matredé ntu i, Mezahabé gbu i.
40-43 Esau ntu re gbu ta rdadi délut po isó-isó ni suku lo né ta nesté: Timna, Alwa, Yetet, Oholibama, Ela, Pinon, Kenas, Teman, Mibzar, Magdiel, re Iram. Si riri géwgów ta rtolno re riri suku né ngósno, rfangósno keé si ngósnori né ro. Ta rkakmé i Edomé njé, Esau ro. Se kyaté-kyat Edomé né, farimé riri délut i.