Yakobé i re ni pégelé re ntu nesté wlori rtolno Laban pa na se rówés si
31
Labané ntu nesté rfalécego, “Yakobé nte, ta mulo nkayangé né, béréga rir papa. I re nyó ndimé rir papa ni haiwané né.” Nuéncó, Yakobé nlongé ta récegé né. 2 I ma néngóto ta Laban usno né reni ta fié pa, dolo ta ngané fisé né pana.3 Pocé bóngo Jou Lahatala nécego Yakobé, “Méléy néli nim gélé re gae riri bóténé lo, po nim délut, fténom re rémamé né ni. Po nim fénfané lo né, ya nase kdéréré awé.”a
4 Jou nfabingo i ta né rewóré, bóngo Yakobé nfaftóto ni pégelé Rahel i re Lea bo rfan néli i ni, po géwgów ta néjaga kabén re domba lo né. 5 Re rwóm lima bóngo nécego si faje, “Nete kécego mew dórén luwé. Nimi papa néngóto ya né, usno né dolo ta ngané fisé né pana. Mayta gélesó pa, sababta Jou Lahatala ta ya nik papa nfapélóy I njé, néngóto ya ngénngan néya se. 6 Mewé ma fémnaw re funé ta ya kpe yabé né ta délé bo klé nak fafié po nimi papa ni. 7 Mayta nimi papa wlo njé nmétegél po ya ni pana. Pélpólés ta nécegé bo npo ya né ma, re niwén nuén yófésó. Mayta, gélesó pa, Jou Lahatala nfamól i pa bo nfasusa ya né. 8 Ta i nécegé nik pélpólésé né haiwan ta rpalangi né, pocé kabén re domba ta féléo né nturi nópé né ma rpalangi. Ta i nécegé nik pélpólésé né ta rtigiri né, nturi nópé né ma farimé rtigiri. 9 Necé ta mulo ga ya kduk kabén re domba félé lima nimi papa ni né, necé Jou Lahatala ta nfarén. 10 Nuéncó, mgo po ngénngan ta kabén re domba né réfsówé, pocé ya kbélisé. Kbélisé kéngóto kabén món ta réfsówé né rpalangi re rtigiri. 11 Bóngo Jou ni nénan ta i yama soroga njé nkakém ya, ‘Yakobé’. Ya ksóngélé, ‘Jo, ya i ta nte.’ 12 Bóngo néceg ta, ‘Ya re kuné ndimé, ta Labané nut aw lé né. Se nte ya bo kgali awé. Méngóto néli, kabén món ta réfsówé né, farimé rpalangi re rtigiri se nturi nópé né nase palangi re rtigiri ndimé. 13 Ya nte Jou Lahatala, ta kwómo aw ngané fis lima po Betelé né, géwgów ta mfawoslé lóy pusó njé, mpeé i palé ménfatélolmo aw ta Ya kgali awé né. Awé ma re mpe jaji po Ya ni po géwgów ta njéi. Se nte kané awé, msópén óro po bótén ta njéi ni, bo méléy po nim wóé re bétbété lo.’”
14-15 Yakobé néfétno Rahel i re Lea rewóré, bóngo si rcónglo i faje, “Awé re mpe yabé, mpólés ndimé mam kaymulo po mam papa ni, se i néngóto amé ma dolo kyat nésé amé ro. Amam kaymulo né ma renfadimé keé. Se i nase ndo am gélesó pana, sogado nmóté ma amé nase kduk téntén gélesó esó pa lima i ni. 16 Masike fajé ma, ta mpe yabé po mam papa ni né, Jou re nfaréné se mam papa ni haréta félé ta re ndadi it re nturé nesté riré. Se tfané ro, téléy po nim bóténé lo, ta dolo nim Jou Lahatala re nécego awé né.”
17 Pocé Yakobé nfapaké ntu re ni pégelé né po unta lo, 18 bóngo rfané, ruté ndimé riri kabén, domba, re sapi ta Labané npolso i né, re riri gina né ndimé ta rduk po bótén Mesopotamia né. Rfané réléy po bótén Kanaan, po ni papa Ishak ni.
19 Ta si rfané né, Labané tiso i, nfané nkótélé ni domba né pluri, se Rahelé nlewésé keé ni papa ni tófél ta nencuba si né. 20 Rfané né, Yakobé népino Labané, rówés si le. 21 Rówésé né, ruté riri wódólé né ndimé, rwetés néli wóé Efrata, rtélmé néli bótén ta nmamétét i ta ngósno Gileade.
Labané nfajalé Yakob ecé
22 Rfan re ngané telé ga taga kyaté né rfabingo Labané, “Yakob ecé re rówés si!” 23 Pocé Laban i re ni délé né rfajalé si ngané fité wlólo, se re bo rdótél si po Gilead, se réntéptubo si. 24 Dorém ta njéi, Jou Lahatala nwómo Laban po bélisé wlólo se nécegé i faje, “Mejaga aw fafié. Bo mfapdipén mdé Yakobé, mati mfasópno i méitén ta lé na, masike faesó le ma matiné.”
25 Labané ndótlé Yakob ecé po bótén ta nmamétét i njé ni né, re rfawoslé riri tenda. Bóngo Labané i re ni délé né ma rfawoslé riri tenda pocé fajé. 26-28 Pocé bóngo Labané nécegé Yakob faje, “Beé, ngénngan ta bo ffané né ga mpeé pénpiné se mécego ya pa né! Se mton ya re kfané, ga mówés awé! Taga mówsé keé ntigé né dolo kyat sélsól si se ga ntig re gbigé né ma kdótlé kfótén si pa né! Bo mfabingo ya, ya nase kpo mew fié se ffané né, tfaléewno it fafié, tnyanyi riré, ttoké rir rébana re kecapi. Awé ga mpe fajé né, awé fatuw-fatuw ta délé muné nim gélesó pa! 29 Péséw ta kdótlé mewé né, bisa kpuné keé mewé ndimé. Ronta Jou Lahatala, ta nim papa nfapélóyé I njé, nméiténé ndé ya dorémé lo, nané ya kpe ya fafié, mati kfasópno aw méitén ta lé na, masike facuce le ma matiné. 30 Se ta mfan awé nte, nihalé mlolémé nim papa re nim dél po umé wlólo né, mayta pe sói se myó keé nik tófél ta kéncuba re kénfapélóy si né?”
31-32 Labané néceg fajé né, Yakobé télél i, nuné pa ta Rahelé nyó tófélé né, se ncónglo Laban faje, “Ta mulo kfan amé né, ya kémtaté. Kémtaté nase myó nmulé ntimé nesté. Mayta nim tófél ta mencuba si né, ya kyó si pa. Se faje, méyówé le, bo amé ma kémnawé. Ie ga mduk si, myó keé si nmulé. Re iga mduk po pai ta ni gina lo, kyat ta njé mare nmóté.”
33 Pocé bóngo Labané ncung po Yakobé ni tenda lo, nfaléyówé pocé, mayta nduk pa. Rewóré, ncung po Lea ni tenda lo, Bilha ni tenda lo re Zilpa ni tenda lo. Nduk pa ndimé. Rewóré ta né ga ncung po Rahelé ni tenda lo. 34 Mayta tófél ta Rahelé nyó si nesté, re nésungé keé si néli po ngalép ta rpeé unta ni yéfyéf po tou lo né bóngo ntolno keé. Labané nfaléyówé tófélé né néli re lima po tenda wlólo né ma nduk pa.
35 Pocé Rahelé nécegé ni papa, “Ma msawan na, papa. Ya kwosél pa, kémnawé niké se.” Se Labané nfaléyówé, ma nduk pa, tófélé né.
36 Pocé Yakobé ncawan Labané se néceg ta, “Ya ksól sói? Ya ksól gélesó pa, néga mséreré mfaféjalé ya dolo ményaw si né! 37 Awé re mfaléyówé po nik gina lo ndimé, né ga mduk sói? Coba ta méyówé né, mfapél nóp po anim délé né re ya nik délé né rir fapéluné lo nte. Wóré ga si ta récegé pai ta ncólé. 38 Taun nuén yóféluwé ya re kpe yabé po aw ni. Ta mnuwo i né, nim domba pégelo re nim kabén pégelo rpe lapori né, nturi né mnap pa. Nim kabén móné né ma ya kó kémgo pa. 39 Nim kabén pari domba ta haiwané nó si, ya kelee si po aw ni pa, se kiwno re nik haiwané né. Ta rlewés dorém pari ngénngané ma, awé mané ya ta kiwén si. 40 Ya kpe nim yabé né, iga ngénngané, kmanahané né ni mafyanésé. Bo dorémé kmanahane ni bébóbélé, ta ga kyénéfé ma nénénbung ya pa. Masolo kéjaga be nim haiwané né. 41 Re taun nuén yóféluwé ya ktolén po nim umé lo. Kpe yabé taun nuén yófésó re fóté, kpólésé ntim mépiné nesté riri kay mulo. Rewóré, kpólésé nim kabén re domba taun nuén wonémé. Po taun nuén yóféluw ta né wlólo, pélpólés ta méjaji ya né mfatuwo pa nuén yófésó ro. 42 Jou Lahatala ta nik gae Abraham re nik papa Ishaké rfapélóy re rémtat I njé, bo ndéréré ya pa, nihalé ksópéné nte, kut gélesó esó pa. Mayta I re nuné, ya ta kpe yabé kuat re bébubo i po aw ni né, se ta mulo ga dorémé lo nané awé ma mpe am gélesó na.”
Yakob i re Labané rfajaji bo rfatut fafié
43 Labané ncónglo Yakobé, “Nim pégelé nesté antig si, ntimé nesté agbig si. Nim kabén re domba né ma nik kabén re domba né nturi si. Farimé ta né lima ya ni. Mayta re ndadi anim si ndimé, se bo kpe sói nóté? 44-45 Jolosi it i dórén luwé tfajaji, bo am re mewé tfatut fafié, bóngo tfawoslé lóy fapusó bo tpeé i fafayal po ité rir jaji njé ni.”
Se pocé Yakob nyó lóy ta pélóy pusó se nfawoslé i npeé i fafayalé. 46 Bóngo nané ni délé né rfajólo lóyé se rtofu pocé. Se rémnóm re riném po lóy ta rtofu né lapo lo. 47 Géwgów ta njé Labané nfangósno re ni méitén Aram, “Yegar-Sahadutha”. Yakobé ntebo ni ngale né re i ni méitén Ibrani né, “Galed”. Ngósén abén luw ta né ni ngale be esó ta i glio né faje, “Lóy ta ttofu, ta tfatélolmo ité rir jaji né.”
48 Labané nécegé, “Lóy ta ttofu nte nfatélolmo it ta re tfajaji.” Nece ta mulo rfangósno lóy ta rtofu né Galed. 49 Rfangósno i esó nóté, “Mizpah”, sababta Labané nécegé, “Ité tfaeé isó re isó nte, Jou Lahatala nase nfaménawé ité. 50 Se mpe aw fafié. Iga mpe ta lé po ntigé nesté ni, pari myó mépin ta nésé nóté, masike kyaté runé pa, Jou nase nuné. I nase nfasól awé.”
51 Pocé Labané nécego Yakobé, “Lóy ta ttofu re lóy ta mpeé i fafayalé njé, po ité rir fapéluné nte. 52 Étné témnaw si né, ité nase tfatélolmo ta re tfajaji. Téjaji ta ya nase kliw néli pa bo kpe aw fagélesó, awé ma nase mliw lima pa bo mpe am fagélesó. 53 Jou Lahatala ta Abraham i re Nahor rfapélóyé I njé, kéroré né nfaléngóto am re mewé bo pai ta ncólé, Jou nfasól i.”
Pocé bóngo Yakobé ncasi re Jou Lahatala ngósno, Jou ta ni papa Ishaké nfapélóy re némtat I njé. 54 Pocé Yakobé néwetés haiwané, ntapéné npeé ni sadaka po Jou Lahatala ni po métété lo né. Bóngo nkakém Laban i re ni dél si se rémnóm pocé, rfatuwo riri jaji ta tagare rpe né. Rémnómé rewóré, ryénfé si pocé.
55 Ni tómémóné ta ngénngané tagare ncó néya né, Labané npangén néya, nfóténé ntu re gbu né, néroré riri barakat po Jou Lahatala ni, bóngo rfan si, réléy si po riri pnuw re bóténé lo.