30
Rahelé némnawé ta Lea nduké ntu, i ga nduké ntu pa po Yakob ni bóngo ndewe Lea, se nécegé Yakobé, “Ya nte mare re ntigé! Ma bo tisé, nase kmóté!”2 Pocé Yakobé ncawan Rahelé se néceg faje, “A, ga msawan ya fawa? Bo tduké nturé né, ndé po ya ni pa. Jou Lahatala ta npo aw pa ta mulo re ntim pa.”
3 Rahelé ga néceg faje, “Yakobé, ta fié né, méfsóo nik beyak Bilha. Bo fduk ntumi, wóré ga ya kyó i dolo ntig tuo i, bo ya ma re ntigé.”
4 Se npo ni beyak Bilha néli po ni légaé ni bo néfsóo i, bóngo Yakobé nyénéfé ndé i. 5 Bilha npe lapo. Nnmawyóyé né, ntu njé món i. Bóngo Rahelé nyó i dolo i ntu tuo i. 6 Bóngo néceg faje, “Ta fténogé njé nduké ntu né félé, ya re ntig pa, kbósémé né lé, dolo métegél pa. Mayta Jou re nlongé nik réroré né se re ntigé ro se nte re métegélé.” Pocé Rahelé nfangósno yomya njé Dan, ta ni ngale né, “Jou nfamétegélé”.
7 Rewóré, Bilha npe lapo nóté, nmawyóyé né ntu njé món i nóté. Yomya ta njé ma Rahelé nyó i dolo ntu tuo i. 8 Néceg faje, “Ta mnuwo i nte, ya ta délé kéyówé yéfén sogado ga re ntigé, bo mati fténogé njé le na ta re ntu né. Jou re ndo ya sogado ya re fténogé njé re kfamgo, kduké ntumamé ndimé.” Necé ta mulo ga yomya ta njé nfangósno i Naftali, ta ni ngale né, “Ta délé kéyówé yéfén re téptébnog pa”.
9 Pocé Lea nuné i nase re ntu pafule, bóngo npo ni beyak ta ngósno Zilpa njé néli Yakob ni, bo ndadi ni pégelé i nóté. 10 Se Zilpa ma nduké ntu món isó, bóngo Lea nyó i dolo ntu tuo i. 11 Lea néceg faje, “Goné ya, kduké ntig isó nóté!” Bóngo nfangósno yomya njé Gad, ta ni ngale né, “Goné ya!”.
12 Rewóré ta né Zilpa nmawyóyé nóté, ntu njé món i nóté, se Lea nyó i dolo ntu tuo i nóté. 13 Bóngo néceg faje, “Kduké ntig isó nóté, ya ta délé séngséngé bóto ya. Nase mépin-mépiné né rfagoné ya.” Necé ta mulo yomya ta njé nfangósno i Asyer ta ni ngale “séngséngé”.
14 Ta gandumé né re nwómo i góo se rfalingété né, Lea ntu Rubené nfan po bété lo. Pocé nduk ayé pyono diréncó ngósno dudaim, né urém i.a Rubené ningét péfis néli, se npo ni mama Lea bo nó. Pocé bóngo Rahelé nécegé Lea faje, “Urém ta ntimé njé nyó né, mdo nak facuci.”
15 Lea ga ncónglo i faje, “Nbung aw pafule né, re méyó nik légaé ga bo méyó nak urémé né nóté né?”
Rahelé ga ncónglo i faje, “Wóré, kpo aw fié bo péséwé nte myénéfé mdé i su, asal ta nam urémé né mdo nak facuci.”
16 Ta mérimé né, Yakobé néléy lema bété lo, bóngo Lea ntón i se nécego i faje, “Dorém ta nje myénéf pote ya ni su, sababta ya re kpólés po Rahel ni, kpólso urém ta ntigé njé nut lema bété lo né.” Bóngo dorém ta njé Yakobé nyénéf po Lea ni.
17 Jou Lahatala nlongé Lea ni réroré né, se Lea npe lapo nóté. Nmawyóyé wyóy ta njé bóngo ntu né re sélimé ro, món bóto si.
18 Lea néceg faje, “Ta ya kpo fié nik beyak Zilpa néli nik légaé njé ni né, nte Jou Lahatala re nfamulé nik féyfié né, npo ya sogado ya kmawyóyé ntumam isó nóté.” Necé ta mulo yomya ta njé nfangósno i Isakhar. Ngósén ta né, ni ngale “pélpólésé”.
19 Pocé Lea npe lapo nóté. Nmawyóyé wyóy ta njéi, se ntu né re séwoném ó ro, món bóto si. 20 Bóngo néceg faje, “Jou Lahatala ndo ya ntig ta nje, necé dolo npo ya hadiah ta fié tuwé. Ntig móné né re séwoném óro se nase nik légaé ntolén be pote ya ni, neé ya pana.” Necé ta mulo ga yomya ta njé nfangósno i Zeblum, ta ni ngale, “hadiah ta fié tuwé”.
21 Rewóré ta né, Lea nduké ntu mépin isó, nfangósno i Dina.
22 Pocé Jou Lahatala ma nlolmo Rahelé se ni réroré né Jou npo fié bo nduké ntu. 23 Bóngo Rahelé npe lapo. Nmawyóyé ntu món isó nóté se néceg faje, “Kduk ntigé nje, Jou Lahatala re nfayangésé keé nak méymóyé né. 24 Kéroré né Jou Lahatala nbóngé ntig món faisó nóté.” Pocé bóngo re ntu ta njé nfangósno i Yusufé, ta ni ngale né ‘nbóngé’.
Yakobé npe Labané ni yabé lesu, ni pélpólésé né domba re kabéné
25 Ta Rahelé nmawyóyé Yusuf rewóré né, bóngo Yakobé nécego Labané, “Tua, bo mpo ya fié né, ya bo kéléy po niké pnuw re bóténé lo. 26 Kéléyé né, ya bo kuté nik pégelé nesté, re ntigé né. Tua, awé re muné taun nuén fis néli ta kdadi beyak po aw ni, né ta bo kpólésé ntim mépiné nesté mulori. Se mpo ya fié bo ksópné si ro.”
27 Mayta Labané ncónglo i faje, “Iga mmasié ya, ma mfan su na. Sababta ya re képóéné se kuné ro ta mulo Jou Lahatala npo ya barakat ta félé né béréga awé. 28 Se mécegé ro, pélóo fawa ta bo kpolso awé né? Sói ta mécegé né, ya nase kdéréré ndimé.”
29 Bóngo Yakobé ncónglo i, “Tua, awé re muné ro, ta ya kpe nim yabé né ta délé météwé. Ya kgawene nim haiwané né ma fié sogado nbóng ta félé. 30 Ta Ya kwóm lima pote pafule né, Tua, awé nim wódól re haiwané né dolo félé tuw pafule. Ya i lima, se kpe nim yabé, ga tagare Jou Lahatala npo aw barakat félé. Se nte renim renam félé ro, Tua. Ya ga renik renak gélesó pafule. Mare kéléyé bo kéyówé nik wódól facuce bo ntig re nik pégelé né rpeé riri ngongano.”
31 Pocé bóngo Labané nutné i, “Se sói ta mare ya bo kdo awé bo mpe nik yabé nóté né?”
Yakobé ncónglo i, “Wóré, Tua. Mati mpolso ya pipis na. Nim haiwané né ya nase kfaménawé si, asal ta ya nik réroré nte, wlemé. 32 Mpo ya fié bo ngénngan péséwé nte ya kfan néli nim kabén re domba ta re metori lo né bo kéyó domba ta béblaté né, re kabén ta palangi né. Domba re kabén ta nesté bo kfara si bo mdo nik si. Ta necé i ro ya nik pélpólés ta mgo wlegé né. 33 Kfara si fanfajé né, bo reni fafayalo, pocé awé nase muné ta ya kmétegél po aw ni. Iga mwóm néli ya ni ga mémnaw domba ta béblaté pa, pari kabén ta pelangi pa, necé re muné ro, Tua, haiwan ta né ya re klewés po aw ni.”
34 Bóngo Labané ncónglo i, “O, iya, fajé óro! Ya kdéréré ta mécegé né.” 35 Momongo, ngénngan ta né, Labané nfara keé kabén ta rpalangi né, re domba ta béblaté né bóngo nané ntu nesté rgawéné si. 36 Laban i re ntu né rut haiwané né, rélówé keé Yakobé, i lóo né rfan ngane telé wlólo. Kabén re domba gléo ta Labané ni né ga, Yakobé ta néjaga si.
37 Rewóré ta né, Yakobé népekét ay dirén telé ni séngsóng ta gélólé lesu né, ga népirés liko né cuci-cuci, nfatébtébélé keé. 38 Bóngo nfapel séngsóng ta né po kabéné né róri wóé góo lo né, bo riném wóé pocé né rémnawé. Ta mulo nfapél séngsóngé né pocé né, kabéné né iga bo réfsówé, si wlori ncuka riném wóé, se si lima réfsówé né nase rémnaw séngsóng ta né. 39 Se iga réfsówé né régbono séngsóng ta tébtébélé né, bóngo nturi né ma palangi.
40 Domba né ga, Yakobé nfara si se nfatébóno si re Labané ni haiwan ta rpalangi re béblaté. Nturi nópé ma félé be béblaté se nyó si nóté. I npe fajé, ta mulo ga nduké ni haiwan ta remeto, taga nfara keé si re Labané ni haiwané né ndadi i ni si ndimé.
41 Fajé nóté, Yakobé néngóto haiwan ta bo réfsówé né ga rkuaté, tabóngo nfapél séngsóng ta népirésé né po usnori lo, po róri wóé góo lo né. 42 Mayta, haiwan ta rkuat pa né ga nfapélo pa, ay séngsóngo né. Ta mulo ga farimé haiwan ta rkuaté né, Yakobé ni si. Ta rkuat pa né ga, Labané ni si. 43 Yakobé npe ta dolo né, ta mulo ga ndadi kyat ta nkayangé. I reni kabén, domba, unta, keladai re béyaké ma félé.