Yakobé nwóm po ni papa ni pnuwé lo
29
Pocé Yakobé nfané nóté, nfalówé ni fénfané né sogado ncung néli bótén Mesopotamia. 2 Nwómó pnuwé njé néli pafule se i po ni fénfané lo lesu, ngénngané njé rénfapéluné, né ga nduk sumu isó. Po sumu njé lapo lo né reni domba re kabén met telé rénbóy si, si re riri kyat ta réjaga si né. Rfajól pocé rfaléftóno bo rfainmo haiwané nesté wóé po sumu njé ni. Mayta sumu njé rfura i re lóy ta pélóyé. 3 Lóy ta njé i mare kabén re domba né re rfajól lima ndimé ga taga kyat ta réjaga si né rfalgali rfalilés lóyé njé bo rfainmo si fanuéncó le. Rfainmo si rewóré taga réléye lóyé njé néli sumu lo bo rfura i nmulé.4 Yakobé nwóm po sumu lo né, nutné kyat ta réjaga haiwan ta pocé né, “Dél ta mewé! Mewé nte, mew fawa lima?”
Si rcónglo i, “Amé nte, am lima pnuw Harané.”
5 Yakobé nutné si nóté, “Labané njé, Nahoré gbu i, ffayal i?”
“O, iya! Kfayal i.”
6 “Npe gélesó pa?”
“É, tisé, npe gélesó pa. Méngóto, ntu ta ngósno Rahelé njé ta njé lima, nuté ni domba re kabéné né.”
7 Pocé Yakobé nécegé si, “Nte ngénngané nje tagare nfapéluné, npe sói se ffajólo keé domba re kabéné né ga ffaténténgéné mew pote? Ta fié né ffainmo si wóé ro, rewóré ga fut si néli gémuné lo bo rémnóm róri sogado dorémé. Pocé ga taga ffajólo si nóté bo fsungé si po kurungané lo.”
8 Si ga rcónglo i faje, “We, bisa pa. Mare domba re kabén ta iglé né ma re rfajól lima ndimé, bo lóy ta rfura i sumu njé kfalilés i su, ga tagare kfainmo si fanuéncó le.”
9 Ta Yakobé nmaméiténé ndé si lesu né, Rahelé nwóm lima, nuté ni papa ni domba re kabéné, sababta Rahelé ta nénéjaga si. 10 Pocé Yakobé némnaw Rahel re haiwané né rwóm lima, ta nfan néli sumu lo, bóngo nfalilés lóyé njé se nfainmo haiwané né wóé. 11 Rewóré ta né bóngo nfótén re ntangso Rahelé.
12 Pocé Yakobé nécego Rahel faje, “Ya nte nik mama njé Ribka, nim papa rémó i.”
Rahelé nlongé ta né, ta ncéreré néli riri umé lo se nfabingo ni papa, “Papa, fónomé njé nwómé, i ntéli sumu lo!”
13 Labané nlongé ta né ta ncópén nétó se nfano Yakob néli, négbi i se nfótén i. Rewóré, bóngo rfadéréré néli rcung némin umé wlólo. Néminé bóngo sói néli ta Yakobé nuné re némnawé né, néfétno Labané ndimé.
14 Bóngo Labané néceg faje, “Pana fajé, ya re awé nte isó nésé it pa.” Pocé bóngo Yakobé ntolén i po si ni i mnuwo sni isó wlólo.
Yakobé npe Labané ni yabé bo néfsóo Labané ntu
15-17 Labané re ntu mépin séluwé: ta taténlóyé njé ngósno Lea, ta téwyóyé njé ga ngósno Rahelé. Lea rtailé ni birahi né rémnaw po mtó lo, Rahelé ga rtailé ni birahi né rémnaw po ni badan lóyé njé sogado po usno lo.
Yakobé ntolno Labané né, n-gali néjaga ni haiwané né. Nganesó Labané nécego Yakob faje, “Mpe yabé nte, masike kyat ta nésé isó pa ma, mare kpolso aw facuci. Se, ta wlemé ncuka né, bo kpolso aw sói?”
18 Yakobé re mgó wlo Rahelé, se ncónglo Laban faje, “Tua, ma mpolso ya fagélesó na. Ya bo kpe yabé po aw ni taun nuén fité wlólo, asal ta mpo fié ntim Rahelé bo kéfsóo i.”
19 Pocé Laban ncónglo i faje, “Iya. Ta fié né kpo awé, ma kyat nésé na. Se mtolén pote ro bo mpe nik yabé.”
20 Bóngo Yakobé ma npe yabé taun nuén fité wlólo. Ta mulo npe yabé né, ncéngé bo néfsóo Rahelé se. Yakobé ta délé mgo wlo Rahelé, se masike npe yabé né taun nuén fité wlólo ma, nbósémé né dolo ngané fis néli le.
21 Taun nuén fité né re nwómo i bóngo Yakobé nécegé Laban faje, “Tua, nik waktu ta kpe nim yabé né re nwómo i ro, se mpo ya ntimé njé bo kéfsówé ro.”
22 Pocé bóngo Labané nfakékakmé re nfajólo farimé kyat po pnuwé njé ni, se npe fafsówé njé ni rameang. 23 Nópé ga dorém ta njé, Labané nfatebé Rahel pa, ga nfatebé Lea, néli Yakob ni bo néfsóo i. Yakobé nyénéfé ndé i, nfayal i pa se. 24 (Labané ma npo ni beyak ta ngósno Zilpa njé néli Lea ni, bo ndadi Lea ni beyak i.)
25 Ni tómémóné né, ga nuné ta mépiné njé Rahel pa ga Lea, bóngo nfano Labané se nécego i, “Tua, pe sói se mpe ya faje? Ta kpe nim yabé né, bo kéfsóo Rahelé. Awé ga makal ya se mpo ya Lea né!”
26 Labané ga ncónglo i faje, “Bo tdéréré adat pote faje né, mare ta ténlóyé njé néfsówé ntubé ga taga ta téwyóyé njé néfsówé. 27 Se kécego awé, méfsóo Lea nte, mfatélapés rameangé né fangané fité, ga taga kpo aw Rahelé nóté bo méfsóo i, mayta rewóré, awé mare mpe nik yabé fataun nuén fité wlólo nóté.”
28 Pocé Yakobé ndéréré ta Labané nécegé né. Sogado i re Lea riri rameang njé ni ngané fité né re nwómo i. Pocé bóngo Labané npo i Rahelé se néfsóo i nóté. 29 (Labané ma npo ni beyak ta ngósno Bilha néli Rahel ni bo ndadi ni beyak i.) 30 Bóngo Yakobé ma nyénéfé ndé Rahelé. Mayta si dórén luwé né, Yakobé wlo bo nérakén be Rahelé. Néfsówé rewóré, npe Labané ni yabé taun nuén fité nóté.
Yakobé ntu né
31 Jou Lahatala nuné Yakobé ni masié be cuci po Lea ni, ta mulo npo fié se Lea npe lapo. Rahelé ga re ntu pafule. 32 Lea nmawyóyé né, ntu njé món i. Bóngo néceg faje, “Jou Lahatala re némnawé wleg ta nkangelang njé ta nik légaé npe ya pélpalété, ta mulo npo ntigé. Se nete nik légaé nase nmasié ya se nut ya fié ro.” Bóngo nfangósno yomya njé, “Ruben” ta ni ngale né, “Fémnawé, yomya món i!”
33 Pocé Lea npe lapo nóté, bóngo nmawyóyé né ntu njé món i nóté. Bóngo Lea néceg faje, “Jou Lahatala re nuné re nlongé ta nik légaé njé mgo wlo ya pa, ta mulo npo am yomya ta nje.” Se yomya njé nfangósno i Simeoné, ta ni ngale né “nlongé”.
34 Rewóré, Lea npe lapo nóté, bóngo nmawyóyé né, ntu njé món i nóté se néceg faje, “Nte nik légaé nase ta délé nérakén be ya, sababta rentumam sételé ro món bóto si.” Bóngo nfangósno yomya ta njé Lewi, ta ni ngale né “nérakén”.
35 Rewóré ta né, Lea npe lapo nóté, yomya njé ntubé né món i. Bóngo néceg faje, “Kduké ntig ta nje, ta délé ktail Jou Lahatala”, bóngo nfangósno yomya njé Yehuda, ta ni ngale “Ttail Jou”. Lea nduké ntu ta njé bóngo nduké ntu pafule.