Kejadian 28

Pocé bóngo Ishaké nkakém Yakobé se néceg faje, “Antig ta awé, kécego awé, mépin ta pote Kanaané né, ndél pa bo méfsóo si, sababta ité mare téfsóo be rir suku né. 2 Se mfan néli bótén Mesopotamia, po nim gae Betuel ni, bo méfsóo nim tua Labané ntu faisó. 3 Ya kéror po Jou Lahatala ta ni kawasa némógé njé ni, bo nfabarakat awé. Kéroré bo npo ntim re gbim fafélé, sogado rdadi suku ta félé. 4 Barakat ta Jou Lahatala re néjaji nim gae Abrahamé né, kéroré bo mnapo awé nóté, ntebé sogado ntim re gbimé sogado bótén ta mtolno nte bo ndadi animé, ta dolo Jou Lahatala re néjaji nim gae Abrahamé né.” 5 Ishaké néror Yakobé ni barakaté né nwóm ta lóo né, pocé ta néewén Yakobé bóngo Yakobé nfan i néli Mesopotamia, po ni tua Laban ni. Labané ni papa kyat Aram i ngósno Betuele. Labané rémó Ribka, ta Esau re Yakobé riri mama i.

Esau néfsówé nóté

6-7 Pocé kyaté né rfabingo Esau, “Nim papa re nécego fténomé njé ndél pa bo néfsóo mépin Kanaané né. Se nané i néléy néli ni pnuw ta po Mesopotamia bo néyówé mépin faisó ta bo néfsóo pocé. Fténomé njé re nlongé nim papa i re nim mama riri sogaro né se re nfan i néli. Ta nfan pafule né, nim papa re néroré ni barakat po Jou Lahatala ni.” 8 Esau nlongé ta né, nuné ta ni papa Ishaké mgo wlo si pa, mépin Kanaané né. 9 Bóngo nfan po ni papa fténo Ismael ni, se néfsóo ntu mépin isó nóté, ngósno Mahalat, Nebayoté rémó i.

Yakob nbélisé Jou ni nénané rtebé rdé lon yama soroga

10 Yakobé i po Bersyeba se nfan néli pnuw Harané. 11 Ta ngénngané njé ncep nópé né, nwóm néli géwgów esó ni bóngo dormé i pocé. Dorém ta njé, nyénéfé né, npeé ni lilén lóy pusó. 12 Pocé ga nbélisé, némnaw lon isó nwosél po lapo lo, i wómo njé nétit néya langété, bóngo Jou Lahatala ni nénan yama soroga né rpak re rtebé rdé pocé lo né njé ni. 13 Jou Lahatala ga nwosél po lapo lo né, se néceg faje, “Ya nte Jou Lahatala, nim gae Abrahamé i re nim papa Ishaké riri Jou Ya. Bótén ta awé myénfo nte, Ya nase bo kdo aw re ntim re kbimé né nimi i. 14 Ntim re kbimé né nase rfélé, féléori né dolo bétbété ni ngai. Si riri pnuwé njé nase nbóng ta npélóy néli re lima. I mdio be aw re ntim re gbimé né se lima, nase farimé suku ta po langét pópo nje ni ma rduk barakat lima Ya ni. 15 Kécego awé, masike aw po sói lo le, Ya nase kdéréré awé. Sói le ta bo nfakangelang awé né, nase kfaketé keé se mpe gélesó pa re kfatopo keé aw pa. Sói ta re kéjaji awé nte nase kpe ndimé.”

16-17 Yakobé nyénéfé npangéné, nbósémé némtaté, tabóngo néceg faje, “Alli, tagare kuné, fatuw-fatuw Jou Lahatala i pote po géwgów ta nfié nje ni. Géwgów ta nje, dolo géwgów nésé pa. Jou ni géwgów ta nénwómo i, soroga ni ngówéné gbono.”

18 Ta mélówé re nfaysayné i né, Yakobé npangén néya, bóngo néyó lóy ta npeé ni liléné njé, se nfawoslé i néya npe i pal ta bo nfatélolmo i Jou re nwómo i pocé. Nfawoslé i rewóré, nduplo i yégét Zaituné bo nuné géwgów ta njé, Jou ni. 19 Géwgów ta né tatubé ngósno Lusé mayta pocé Yakobé niwéné keé ngósno né, se nfangósno keé Betel, ta ni ngale, “Jou Lahatala ni wémwóm góo i.”

20 Pocé fajé Yakobé néjaji po Jou Lahatala ni, néceg ta, “Jou Lahatala, kéroré bo mdéréré ya po nik fénfané lo nte. Mfaléngóto sói néli ta bo nfarwae ya né, mfaketé keé. Bóngo re mdo ya mnóm re kabaya. 21 Bo kfané nte sogado kéléy po nik papa ni umé lo, iga ya i be po féyfié wlólo, né nase maduga Awé le ta mdadi anik Jou. 22 Ya bo kfapélóy Ngósnom po géwgów ta kpeé i palé njé ni. Bo sói néli le ta Awé mpo ya né, ya nase kpe téntén faabén yófésó, taga késólé téntén esó bo kpo Awé.”