Yakobé nut Esau ngósno se nyó keé ni barakat ta lima Jou Lahatala ni né
27
Ta Ishaké re nlégaé né nébyafé, ngané esó nkakém Esau, ntu ta ténlóyé njé, se nécego i faje, “Antig ta awé!”Esau ncónglo i, “Jo, papa!”
2 Bóngo Ishaké néceg faje, “Ya nte re klégaé, se nihalé nase nganesó pa luwé nte bo kmóté. 3 Se nte kané awé, méyó nim tingésé né bo mfané méyówé róré mnóm banga.a 4 Lima, bo mpe mnóm ta mnó, mnóm ta kó fié né. Kó ta né rewóré, ya nase kéroré nim barakat po Jou Lahatala ni, ta ya kmót pafule nte.”
5 Ta Ishak i re Esau rméiténé né, Ribka nlongé. Se ta Esau re nfané néyówé mnómé né, 6 bóngo Ribka nkakém Yakobé, “Aw lima su. Ya klongé nim papa nané fténom Esau 7 néyówé mnómé, bo nfamósé mnóm ta i nó fié. Nó rewóré, i bo néror Esau ni barakat po Jou Lahatala ni.b 8 Se ntig ta awé, mlongé ta ya kécegé nte bo mpe. 9 Mfan néli kurungané lo méyó kabéné ntu ta békboké né faséluwé lima, bo ya kfamósé kpe mnóm ta nim papa nó fié né. 10 Kfamósé rewóré, mut néli po nim papa ni, bo famla nó. Nó rewóré, i nase néroré nim barakat po Jou Lahatala ni. Kdodato be nfabarakat aw pafule ga re nmóté.”
11 Pocé ga Yakobé néceg ta, “Mama, mayta Esau replu, ya replug pa. 12 Mati na ga papa nfabósmé faoge né, ga nuné ta klól i, se nase nfabarakat ya pa, ga nbóng ta nlolahi keé ya!”
13 Ni mama ga ncónglo i faje, “Ntig ta awé, iga nlolahi awé, lolahi njé na mgo be ya, sababta ya ta kané awé. Mdéréré le ta kécegé nte, mfané ro bo méyó kabéné né se.”
14 Pocé bóngo Yakobé nfané néyó kabéné né se nut si lima, bóngo ni mama npe mnóm ta mnó ta Ishaké nó fié né. 15 Mnómé né renmósé, Ribka néyó Esau ni kabaya ta fié ta niséné né, se nané Yakobé nisno. Nisno rewóré, 16 Ribka néyó kabén liko nóté se néyémo keé Yakob fao re koko ta replu pa né. 17 Rewóré, bóngo npo Yakobé mnóm ta re nfakewélo né re roti.
18 Tabóngo Yakobé ncung némin ni papa ni se nkakém i, “Papa.”
Ni papa ncónglo i, “Jo. Ntig ta awé, awé Esau pari Yakobé?”
19 Bóngo Yakobé ncónglo i faje, “Ya Esau, antim ta ténlóyé njé, papa. Ta mané ya né, re kpe ro. Mnóm ta kéyówé né ta re kut lima nte. Mpangén néya, mtoléné bo mémnómé. Mémnómé rewóré bo méroré nik barakat po Jou Lahatala ni ta re méjaji ya né.”
20 Ishaké néceg faje, “Ga mémla o?, mduké mnómé né!”
Yakobé ncónglo i, “Iya sababta anim Jou Lahatala ta n-gali ya.”
21 “Pa na fajé, aw lima pote bo kfabósmé awé, bo kuné awé nte Esau pari pai.”
22 Pocé Yakobé nfarakné i néli, bóngo ni papa nfasésaé i fao né se néceg faje, “Glimé njé dolo Yakobé, mayta faomé nte ga dolo Esau.”
23 Ishaké nfayal Yakob pa sababta fao né replu dolo Esau. Pocé ta re bo néror Yakobé ni barakaté né, 24 nutné i nuéncó nóté, “Fatuwé, awé nte Esau?”
Yakobé ncónglo i, “Iya, ya Esau.”
25 Pocé bóngo Ishaké néceg faje, “Antig ta awé, mpo mnómé né lima. Kémnómé rewóré ga taga kéroré nim barakat po Jou Lahatala ni.”
Bóngo Yakobé npo mnómé né néli, re npo anggur cuci. Némnómé rewóré, 26 Ishaké nécego Yakob faje, “Wyóy ta awé, mlik yama, bo mfótén ya facuci.”
27 Pocé Yakobé nlik nópé se nfótén i, Ishaké nfótné Yakobé ni kabaya né, fatuw ta Esau pépu. Se pocé ga taga néroré ni barakat, né néceg faje, “Ntig nje pépu né wlegé ncuka kfótné. Pepu né dolo bétbét ta Jou Lahatala re nfabarakaté se ni téntónémé né békboké. 28 Jou Lahatala, ya kéror po Aw ni, ntigé nje nó bété né mpo lémlem yama langété lo bo nó téntónémé né békboké! Nó téntóném gandum re anggur fafélé! 29 Kéroré né suku re bangsa félé nase rcuba re rlongé i. Kéroré bo i nkawasa keé fténo re rémó né, se rcuba i. Kyat pai ta nlolahi i, kéroré né kyat ta njé Jou Lahatala ta mfasémulo i. Mayta kyat pai ta nfabarakat i, kyat ta njé ma Awé mfabarakat i.”
Esau néror po ni papa ni bo néroré ni barakat
30 Ishaké néror Yakobé ni barakaté né rewóré se Yakobé nfan i. Mélil be Yakobé ntéfsalé, Esau ma nwómé, taga néyówé mnómé néléyé. 31 I ma npe mnóm ta mnó se nut po ni papa ni, bóngo nécegé i faje, “Papa, mpangén néya, mtoléné, bo mó mnóm ta ya kéyówé se kut lima nte. Rewóré bo méroré nik barakat po Jou Lahatala ni.”
32 Pocé bóngo Ishak nutné i, “Awé nte pai?”
“Papa, Ya nte antim ta ténlóyé njé.”
33 Nlongé ta né, Ishaké télél i, sogado ni badan lóyé njé ma nwéwewé ndimé bóngo nutné i, “Iga awé Esau, ta i péséwé njé pai? Ta awé mwóm lima pafule né, kyat isó re nwómé ntubé, nuté mnóm ta néyówé né lima se re kó. Ya re kéroré ni barakaté né po Jou ni se nase sogado fajé néli le.”
34 Esau nlongé ta né bóngo wlo pisé se ntangésé né n-gagélayé. Bóngo néceg faje, “Papa, méroré nik barakaté nóté po Jou Lahatala ni!”
35 Pocé Ishaké ncónglo i faje, “Fténom ta téwyóyé njé nyó ngósnomé se barakat ta kéjaji bo kéroré nim po Jou Lahatala ni né, re kpo keé i.”
36 Esau nlongé ta né bóngo néceg ta, “I ni maakalé né! Ta mulo ga rfangósno i Yakobé! Ngané fis lima né, renakal ya nuéncó óro se wódól ta bo mfagóo ntim ta ténlóy ya, né ma re kéjaji i ta nduké ndimé. Nete nóté re nyó keé nik barakat ta bo méror po Jou Lahatala ni né. Se nte, nakal ya né, re nuén luwé ro! Alli, papa, se reni barakat nésé pana ta bo mpo ya né?”
37 Ishaké ncónglo i, “Péséwé ta kéroré ni barakat po Jou ni né, ya re kéroré bo awé ma mdadi ni beyak awé. Farimé kmó re remó né ma rdadi ni beyak si. Ya re kéroré bo gandum re anggur ta po nó bété lo né nfabékboko i. Ntig ta awé, nte reni gélesó pana ta ya bo kéroré nimé né.”
38 Pocé Esau néceg ta, “Papa, barakat ta méroré né maduga ésó ta né le? Papa, méroré nik barakaté nóté!” Bóngo ntangésé ngagélayé.
39 Ishaké ncónglo i faje, “Nam bété né nase lémlem yama langété ma mgo pa, se nase nam téntónémé né békboké pa. 40 Awé mfapuné bo riri sói néli né myó bo mpeé nim hidup i. Awé ma nase mdadi beyak po fténom ta téwyóyé njé ni, mayta néli mngamo se mfatopo keé i.”
41 I mdio be Yakobé néyó keé Esau ni barakaté né, pocé bóngo Esau ni lé keé Yakobé, se néceg po wlo wlólo, “Papa nte mnuw pana bo nmóté ro. Pote se néli ga papa re nmóté sogado kfatélapésé ni ngénngan ta nmóté né, nase kéyówé Yakobé bo kpuné keé i.”
Ishak i re Ribka rané Yakobé nówés po ni tua Laban ni
42 Pocé Ribka nlongé ntu ta nténlóyé njé Esau bo npuné keé Yakobé né, bóngo nané rkakém Yakobé se nécego i, “Mlongé nte! Fténomé njé nisno awé wlo né se bo npuné keé awé. 43-45 Ya nase kémnawé kéfen pa, bo ntig mewi dórén luwé né ga fémyangés mew be ngané esó le. Se mlongé ta kécegé nte bo mdéréré. Famla bo mfan aw néli pnuw Haran po nim tua Laban ni, bo mtolén pocé su. Sogado fténomé njé ni séwsawané njé re tiso i se re nfatélolmo i pana sói ta awé mpe po i ni né, pocé ga tagare kané kyaté ryó awé.”
46 Ribka ma nécego ni légaé Ishaké, “Esau ni pégelé nesté suku Hetc si. Kéngóto si né, wlegé ncuka si pa. Se bo Yakobé ma néfsóo kyat pote Kanaané nóté, ta fié né kmót ya ro.”