Ishaké ntolén po bótén Filistiné né, nécegé ni pégelé njé ni rémó i
26
Pocé se néli, reni mnóm pana néli lima po bótén Kanaané se kyaté né nfatélóto i. Nfatélóto i ta dolo né re nuén luwé ro: Tatubé ta Abraham i pocé né ma ndadi i ta dolo fajé nóté. Se pocé bóngo Ishaké nlué i néli po pnuw Gerare. Kolano ta pocé njé ngósno Abimelek, i kolano i po farimé bótén Filistina.2 Bóngo Jou Lahatala nwómo Ishak, se nécego i faje, “Masike kyaté né nfatélóto i, mewé mati fówés nóp bótén Mesir na. Ftolno bótén ta njé i óro, po pnuw ta ya kfaftulo awé né. 3-5 Ftolén pote ro, masike dolo kyat wémwómé mewé. Ya nase kfaménawé mew, re kfabarakaté mewé. Sababta, bótén ta nte nase kdo aw re ntim re kbimé né nimi i ndimé. Fajé nóté, nim papa Abrahamé re ndéréré ndimé ta Ya kané i re ta kfasodoto i né se Ya re i re kfajaji. Jaji ta né Ya nase ktebo sogado po aw ni nóté. Nik jaji né fanfaje: Ya nase kdo awé ntim re kbimé né fafélé, ni féléo dolo ngó ta po langété lo. Bótén ta mtolno i njé ma nase kdo nimi i ndimé. Ni wóré nópé, farimé suku po langét pópo njé ni bo réroro Ya barakat ta dolo re kpo mewé né.”a 6 Ishaké nlongé Jou ni méiténé né, tabóngo nlué i pana, ntolén i be po Gerare.
7 Ishaké ntolén po Gerare né, kyat ta pocé né rutné i, “Mépin ta aw re i njé pai?”
Nlongé ta rutné i né, Ishaké nénuta, “Alli, nik pégelé Ribka nje nbirahi, kdodato móné né mgo wlori i se rayé keé i, ga rpuné keé ya.” Se ncónglo si, “Neje rémag i.”
8 Ishaké ntolén i po pnuw ta njéi mnuw cuce. Ngané ésó kolano Abimeleké nléngné ndé po jalena lo, ga némnaw Ishaké nfótén Ribka. 9 Bóngo nkakém Ishaké se nutné i, “Mépin ta njé nim pégelé i, ga mécegé cogo rémam i se ga?”
Ishaké ncónglo i, “Ta mulo kécegé nik pégelé i pa né, kémtat be rpuné keé ya.”
10 Kolano njé nécegé i, “Ga mépino amé né, ta nejé nim pégelé i ga mécegé cogo rémam i né! Né bo niké kyaté né isó pa isó nyó keé i, ga fawa? Nase ya re nik bala re kawasa né ta kpó i ni sélsól ta pélóyé, momongo awé ta msólé.”
11 Né rewóré, kolano njé nfabingo ni bala re kawasa né, “Mépin re món ta nesté, mati ffarwae si na. Pai le ta nfarwae si, i nó sélsólé né kpun i kfamóté keé i.”
Kyat Filistiné né wlori piso Ishaké
12 Ishaké ntolén po bótén ta njé i ni, npe bété se nfatónémé. Jou Lahatala nfabarakaté se nó téntónémé né békboké, wóngto ma félé. Po taun ta né, géy ta ntónémé né nmulo i nuén witéncó. 13 Ishaké ni wódólé né, nbóng ma nbóng i, sogado nkayang tuwé. 14 I ni béyaké né félé, i ni domba, kabén re sapi ma remeto. Pocé bóngo kyat Filistiné né wlori piso i, 15 se rputo keé nó sumu-sumu né ndimé. Sumu ta né tatubé Ishaké ni papa Abrahamé ntolén pocé né se nóléyé.
16 Rewóré ta né bóngo kolano Abimelek nécego Ishak faje, “Mewé nte re félé, tagare fkayangé. Dolo re fliwé keé am lówé. Se mati ftolén pote le na, flué mew lów facuce.”
17 Pocé bóngo Ishak ecé rlué si se rtolén si po lóté Gerare. Rtolén pocé né mnuw cuci. 18 Pocé Ishaké nóléyé nmulé sumu-sumu tatubé ta ni papa Abrahamé nóléyé né. Sumu-sumu ta né, ta Abrahamé re nmóté né, kyat Filistiné né rputo keé. Nte Ishaké nóléyé nmulé bóngo nfangósno ta dolo ni papa nfangósno tatubé lima nóté.
19 Rewóré, Ishaké ni béyaké né róléy sumu ta nóbén po lóté Gerare né, se rduké ni wóé ta fié né félé. 20 Nópé ga kyat Gerar ta réjaga haiwan pocé né rfakotalé rdé Ishaké ni beyak ta réjaga haiwané né, se récegé si faje, “É, sumu ta njéi, amam i, mati fyó wóé pote na!” Necé ta mulo ga Ishaké nfangósno sumu ta njé i, “Esek” ta ni ngale, “fakotale”.
21 Pocé bóngo Ishaké ni béyaké né róléy sumu isó nóté, nópé sumu ta njé ma rfakotalé i nóté. Necé ta mulo ga sumu ta njé, Ishaké nfangósno i, “Sitna” ta ni ngale né “fatut lé”.
22 Rewóré ta né, Ishak ecé rlué si géwgów nésé se róléy sumu isó nóté. Pocé tagare rfakotalé pana. Necé ta mulo ga sumu ta njé nfangósno i, “Rehobot”, ta ni ngale né, “Géwgów ta isó nfarwae it pa.” Néceg faje, “Neté Jou Lahatala re npo rir géwgów esó ta isó renfarwae it pana, se nte nase tduké róré mnóm re rir wódól ta félé pote faje.”
23 Pocé se néli, Ishak ecé rfan néya pnuw Bersyeba. 24 Dorém ta néi, Jou Lahatala nwómo Ishaké, se nécego i faje, “Ishaké, Ya nte Jou Lahatala, nim papa Abrahamé ni Jou Ya. Mati ma mémtat na sababta Ya kdéréré aw dorém re ngénngan. Ya nase kfabarakat awé, re kpo aw ntim re gbim fafélé. Farimé ta né Ya re kéjaji nim papa Abrahamé, sababta i ndéréré Ya fié. Se nte jaji ta né ktebo po aw ni nóté.”
25 Bóngo Ishaké nfajólo lóy lima, nfarén néya, nfakéwelo géwgów ta bo ntapéné ni sadaka po Jou Lahatala ni, bóngo ncuba re nfapélóy Jou Lahatala pocé. Rewóré, nfawoslé riri tenda-tenda pocé, bóngo ni béyaké né róléy sumu isó nóté.
Ishak i re Kolano Abimeleké rfajaji bo rfatut fafié
26 Nganesó kolano Abimeleké nwómo Ishak lima pnuw Gerare. Nwómé né, i re ni dél faljil isó ta nénfafasungo i méitén ta fié ngósno Ahuzate, re ni tentara né riri kapala Pikole. 27 Pocé Ishaké nutné si, “Am po nimi pnuwé lo né, nimi lé amé se ffaungé keé amé. Pe sói se nte ga ffajalé am lima nóté?”
28 Si rcónglo i, “Neté amé kuné ta Jou Lahatala ndédéréré mewé, se amé bo kécego mewé, ta fié né, am re mewé tfajaji bo tfatut fafié. Kéror po mew ni, 29 bo mati fpe am gélesó na, ta dolo amé ma nuéncó pafule kpe ta lé po mew ni né. Ta mewé ftolén po mam bóténé lo né, amé kuté mew fié. Sogado flué mewé né ma, kpe mew gélesó pa. Nte amé kuné fatuw-fatuw ta Jou nfabarakat mewé.”
30 Nlongé ta né, Ishaké nkakém si bo rémnóm re rinémé bo rfatuwo ta bo rfajaji né. 31 Ni tómémóné né, rfajaji bo rfatut fafié se nae ta récegé riri jaji né re rcasi. Rpe jaji né rewóré tabóngo Ishaké néewén si se rfan si. Isó-isó re rpe gélesó pana.
32 Ngénngan ta né ro Ishaké ni beyak ta róléyé sumu né réléy lima se rfabingo i, “Sumu ta amé kóléy i njé, re duké ni wóé!” 33 Bóngo Ishaké nfangósno sumu ta njé, “Syeba”, ta ni ngale, “Jaji” sababta sumu ta njé róléy i né mgo po ngénngan ta si rfajaji né. Necé ta mulo ga pnuwé njé ma rfangósno i Bersyeba sogado ngénngan péséwé nte.
Esau néfsóo mépin suku nésé séluwé