Abrahamé ntu re gbu po ni pégelé ta ngósno Ketura njé ni
25
Abrahamé néfsówé nóté, néfsóo mépin isó ngósno Ketura. 2 Abrahamé i re ni pégelé ta njé rduké nturi séwonémé, ngósnori né ta nte: Zimran, Yoksan, Medan, Midian, Isybak, re Suah. 3 Yoksané njé Syeba i re Dedané riri papa i, se Dedané ntu re gbu né ta kyat suku Asyur, Letus, re Leum. 4 Midiané ntu né: Efa, Efer, Henok, Abida, re Eldaa. Kyaté-kyat ta né, Abrahamé i re ni pégelé Ketura nturi re gburi.5-6 Abrahamé ntu ta nduk po ni pégelé nésé né, ndo riri haréta iglé bóngo nané si rlué si néli po faspal ngancóo bo rélówé ntu Ishaké. Ishaké ga, ta Abrahamé rakno bo nmóté né, nfagóo i ni haréta re bétbété né ndimé.
Abrahamé nmóté se rput i
7-8 Abrahamé re nlégaé, ni taun nuén witéncó re yóféfit re limé, bóngo nmóté. 9-10 Nmóté né, i ntu Ishak i re Ismaelé rut i po i ni bétbét ta po Makhpela njé se rput i po fénófé njé wlólo, nérakéné ni dél pégelé Sara. Bétbét ta njé po Mamre faspal ngancóo, tatubé Abrahamé n-gon i po kyat Het isó ni ngósno Efroné, Zohare ntu i. 11 Abrahamé re nmóté bóngo Jou Lahatala ntebo ni barakaté né po ntu Ishak ni. Waktu ta né, Ishaké ntolén nérakén sumu ta ngósno “Lahai-Roi”, ta ni ngale, “Jou Lahatala nfaménawé ya.”
Ismaelé ntu re gbu
12 Ismaelé, Abrahamé i re Hagar nturi i. (Hagaré mépin Mesir i, Sara ni beyak i). Bo kéfétén Ismaelé ntu re gbu né. 13-16 Ismaelé ntu móné né, ta nténlóy sogado ta téwyóyé, ngósnori né ta nte: Nebayot, Kedar, Adbeel, Mibsam, Misyma, Duma, Masa, Hadad, Tema, Yetur, Nafish, re Kedma. Yomya yófésó re séluwé nesté, si kolano si, nae ta re riri pnuw re suku. Pnuw re suku ngósno né rfangósno si ngósnori ro. 17 Ismaelé ni umur taun nuén witéncó re yófétel re fité taga nmóté. 18 Ntu re gbu né rtolén po Mesiré ni wómo po faspal ngancóo, nérakén bótén Asyuré, po pnuw Hawila wómo sogado pnuw Syur wómo. Si re farimé Abrahamé ntu ta nésé né rfatut lé.
Esau i re Yakobé rtubé
19 Neté bo téfétén Abrahamé ntu Ishak. 20 Ishaké ni taun nuén yóféfóté taga néfsówé. Néfsóo Ribka ta ni papa ngósno Betuel. Betuelé njé kyat Aram i lima Mesopotamia. Ribka ni rémó njé ngósno Labané. 21 Pocé Ribka re ntu pa, se Ishaké néror po Jou Lahatala ni bo ni pégelé njé nduké ntu. Bóngo Jou Lahatala nlongé Ishaké ni réroré né se Ribka npe lapo. 22 Ta npe lapo né ntu nesté rfasosora. Yomya nesté rfaftóf po riri mama sno wlólo. Se Ribka néceg faje, “Snogé wlólo nje, ga i ni maméyawéné né!” Pocé bóngo néror po Jou Lahatala ni bo nfabingo i, “Pe sói se ga ndadi i faje né?”
23 Bóngo Jou Lahatala ncónglo i faje, “Po min snomé wlólo né yomya séluwé. Si nturi re gburi nópé né rdadi bangsa séluwé, nase isó ni lé isó. Ta ntéwyóyé njé nase nkuat po ta nténlóyé njé ni. Ta nténlóyé njé nase ndadi beyak po ta téwyóyé njé ni.”
24 Ribka ni ngénngan ta bo nmawyóyé né nwómo i: fatuw ta wyóyé nesté fasosora, món bóto si. 25 Ta ténlóyé njé ni fafayalé né ni liké né mékóté, taga plu bóto i. Necé ta mulo ga rfangósno i Esau (ta ni ngale ‘mékóté’). 26 Ta téwyóyé njé ntubé né, fao né nétané Esau sóo wómo póp ta po miné. Nécé ta mulo rfangósno i Yakob, ta ni ngale ‘nétané sóo pópo’. Ta Ribka nmawyóyé si né, Ishaké ni taun nuén yóféwonémé.a
Esau nwagé ni hak ta ténlóy ta ni papa bo nfagóo i né
27 Yomya séluwé nesté sogado re rpélóyé, ta ngósno Esau njé ntingésé mnóm banga fié, se i góo be po banga lo. Yakobé ga nénpe yabé be po umé wlólo.b 28 Ishaké ni gogoru góo né pélóy be po Esau ni, sababta nó fié haiwan wóngto ta Esau néyówé né. Ribka ga ni gogoru góo né pélóy be po Yakob ni.
29 Nganesó Yakobé nfamósé kacang ta mékóté, mnuw pa né ga Esau nwómé, néyówé mnóm banga taga néléyé se némgaé, ga ntélóté. 30 Bóngo nécegé Yakob faje, “Mdo nak facuci, de, namé mnóm ta mékóté né. Ya nte ta délé ktélóté se bo kó.” (I mdio néror mnóm ta mékóté né, ta mulo Esau ni ngósén esó nóté Edom, ta ni ngale né ‘mékóté’.)
31 Yakobé ncónglo i, “O, nete, mnómé né. Mayta mare méjaji ya su. Pote se néli papa nmóté, awé nase mduk téntén ta pélóyé, sababta awé ta nténlóyé. Anim ténténé né méjaji ya ta awé nase bo mpo keé ya.”
32 “O, iya, wóré ga kpo awé. Ktélót ta nte i, kbósémé né dolo bo kmóté se wódól ta né reni ngale esó pa po ya ni.”
33 Pocé Yakobé nécegé nóté, “Mare msasi su, bo nim ténténé né ya ta kduké, ga tagare kdo awé mnómé. Bóngo Esau ncasi.”
34 Rewóré ta né, bóngo Yakobé ndo Esau nó roti re mnóm ta mékóté né. Esau nó re ninémé rewóré ta nfan i. Se ta nwagé keé ni hak ta ténlóyé né ta délé dolo reni ngale esó pa.