Sara nmóté se Abrahamé n-gón bétbét bo npeé ni kuburé
23
Sara ni umur taun nuén witéncó re yóféluw re fité, ga nmóté. 2 Nmót po pnuw Hebronéa, po bótén Kanaané. Nmóté né, Abrahamé ntangés re ndodora.3 Rewóré, nwosélé se nfan néli po kyat suku Hete né riri kyat tut ta réntolén po pnuwé njé ni ngówéné gbono lo né. Bóngo nécego si faje, 4 “É, nik dél ta mewé, ya nte kyat ya pote pa. Pote faje ya renik bétbét pa. Kéroré bo fwago ya nimi bétbét facuci bo kputé nik dél pégelé nje.”
5 Si rcónglo i, 6 “Légaé ta awé, mlongé ta bo kécegé nte. Masike kyat aw pote pa, amé kyó aw dolo mam kyat tut awé. Se kdo nimé le, géwgów ta bo mputé nim pégelé njé. Méyówé géwgów pua le ta mgo wlemé, amé nase kpo aw re wlomam ta métegélé.”
7 Abrahamé nlongé ta né bóngo ncuba po kyat Hete nesté usnori lo né, 8 bóngo néceg ta, “Nik dél ta mewé, necé fié ta fécegé bo fdo niké né. Mayta, ya wlegé né kpólésé, ni pélóo fawa le. Se kéroré bo fécego Efron, légaé Zoaré ntu njé, 9 bo nwago ya ni fénóf ta i po Makpela, ta i po nó bét wómo lo njé. Fécego i bo nwago ya pote bo mewé ma funé re fémnaw bo bétbét ta né kpeé ya re nik délé né mam kubur góo.”
10 Ta kyat tut Hete né rméiténé né, Efroné ma i pocé. Se Efroné ncónglo i, 11 “Wóré, légaé ta awé. Bété njé, ya kdo nómi i, re fénófé njé nuéncó le, bo mputé nim pégelé. Se ya kéceg po nik dél mew farimé usnomi lo nte, bo funé ta ya kdo légaé njé ni bo nputé ni pégelé pocé.”
12 Pocé bóngo Abrahamé ncuba kyat Hete nesté, 13 bóngo nméiténé ndé Efroné, bo kyat tut Hete né rlongé ndimé. Néceg faje, “Ya kéror po aw ni, bo mlongé ta bo kécegé nte. Ya wleg pa, bo nam bété njé mdo nak i le. Ta fié né kpólés i, se myó i mulo nte, bo kputé nik pégelé pocé.”
14 Pocé bóngo Efroné ncónglo i, 15 “Légaé ta awé, bété njé i mulo né pipis salaka witén fóté, mayta iti dórén luwé tfaljilé, se pipisé né dolo reni ngale pa. Mayta bo mgon i, mgon i le. Bo mputé nim pégelé pocé.”
16 Abrahamé ncónglo i, “Iya, fajé ro, i mulo né ta né ro.” Pocé tabóngo ntimbang pipis salaka, ta dolo néceg néli kyat Hete né usnori lo né, bóngo npo Efroné. I météo né ndéréré kyat ta rfalwagé né róri timbangan ta i féléo né pipis salaka witén fóté.
17-20 Npólés Efroné nó bét re ni fénófé njé rewóré, bétbét ta njé ndadi Abrahamé ni bétbét i. Se farimé bétbét, fénófé re ay ta po Makpela né ndadi Abrahamé ni ndimé. Makpela i po Mamre faspal ngancóo. Bétbét ta né, farimé kyat tut Het ta rfajól pocé pnuwé njé ni ngówéné gbono lo né, runé ndimé ta re ndadi Abrahamé ni né. Ngon bétbété njé rewóré, bóngo nputé ni pégelé Sara po fénóf ta i pocé njé. Mamre njé, i géwgów isó ta po pnuw Hebroné, po bótén Kanaan. Ta kéfétén sogado Abrahamé faywóbno nduk bétbét po Kanaané né i mdio né ta né.