Jou Lahatala nané Abrahamé bo npeé keé ntu njé sadaka
22
Pocé se néli, Jou Lahatala bo nuné Abrahamé wlo njé ta ndélé I fatuw-fatuw pari tisé. Bóngo nkakém i, “Abrahamé!”Abrahamé ncóngélé, “Jo! Yai ta nte.”
2 “Mfan néli bótén Moria, muté ntim Ishak ta nkumél i, re mmasié i njé. Fawét po métét isó ta bo kfaftulo awé njé. Néya, méwetésé ntimé njé, mtapén i mpeé nim sadaka i po Ya ni.”
3 I ni tómémóné ta dérorém i lesu né, Abrahamé re npangéné se nyéf keladai njé tou. Rewóré, nfagséglé ay ta bo ntapéné ni sadaka njé, bóngo I re Ishak re ni beyak séluwé rfan néli po géwgów ta Jou Lahatala re nécego i lo né.
4 Rfan sogado ngané telé, Abrahamé nfapangné usno né néya, lów i lesu re némnaw géwgów ta bo rfano né. 5 Pocé bóngo nécego ni béyaké né, “Mew pote su, mew re keledai njé. Ya re ntigé nje bo kfan po téli su, bo kfapélóy Jou Lahatala, wóré ga kpólén am lima.”
6 Pocé bóngo ay ta po keledai lo né, Abrahamé néyó se nétewlé néya Ishak jéjólo lo né. Ié ga nut yété re lutén ta bo ntapno ni sadaka né. Pocé bóngo si dórén luwé rfané rénfadéréré néli. 7 Ta rénfan néli né, Ishaké nkakémé ni papa, “Papa!”
Abrahamé ncónglo i, “Mpe sói, nó?”
Bóngo Ishaké nutné i, “Ay re luténé né ta re nte, domba ntu ta bo ttapén i njé ga i pua?”
8 “Antig ta awé, Jou Lahatala ta nase bo nfaléléy domba ntu njé.” Pocé si dórén luwé né rfalów si néli po géwgów ta Jou Lahatala re nécego Abrahamé né.
9 Rwóm néli tabóngo Abrahamé nfajólo lóy se nfarén néya, nfakéwelo géwgów ta bo ntapéné ni sadaka po Jou Lahatala ni, bóngo ayé né nfarén po ya. Rewóré tabóngo nbólét Ishak ga nfapél i néya ay ta re nfaréné né pépo lo. 10 Bóngo néyó yété njé bo néwetés i. 11 Mayta mélil be nélóngé yété njé néya, Jou ni nénan yama soroga nkakém i, “Abrahamé, Abrahamé!”
Pocé Abrahamé ncóngélé, “Jo! Ya I ta nte!”
12 Jou ni nénané njé nécegé i, “Abrahamé, ma mpe i gélesó na! Nte Ya kuné aw fatuwé mdélé Jou Lahatala, re mémtat I. Sababta awé métóf pa bo mpo ntim ta nkumél i le njé po I ni né.”
13 Pocé Abrahamé nfapangné béboko njé néya, télél be ga némnaw domba món isó, ni tadu njé ncób po ayé myaku-myaku ni séngsóngé lo né. Se Abrahamé nésólé ntu njé bóngo niwno domba njé néya, ntapén i se npeé ni sadaka po Jou Lahatala ni. 14 Géwgów ta né, Abrahamé nfangósno “Yahweh Yireh”, ta ni ngale, “Sói ta reni pa po it ni né, Jou Lahatala nfaléléy.” Se sogado ngénngan péséwé nte ma kyaté né réréceg faje, “Po Jou Lahatala ni métété lo né, Jou nfaléléy sói ta reni pa po it ni né.”
15 Pocé Jou Lahatala ni nénané njé nméitén yama soroga lo nóté, 16 “Jou Lahatala nméiténé, néceg faje, ‘Abrahamé, ta kané awé mpo ntimé njé né, awé re mdéréré fié, métóf pa sogado mpo ntim ta nkumél i le njé, mpeé i sadaka po Ya ni. Se ta mulo né, Ya, Jou Lahatala, kéjaji re Ya ngósnog óro, 17 ta Ya nase kpo aw barakat fafélé re kpo ntim re gbimé né fafélé, i féléo né dolo ngó ta po langété lo re sésé ta po wolét lapo lo né. Kyat ta riri lé si né ma réfen si pa, se rtolno keé riri pnuwé né. 18 Awé re mdéréré Ya, ta mulo Ya bo kpo aw barakat fafélé. Barakaté né nase mnapo ntim re gbimé né. Ni wóré nópé, nase farimé suku ta po langét pópo njé ni reni kyat ta bo réroro Ya barakat ta dolo re kpo mewé né.’ ”a 19 Jou ni nénané njé nméiténé rewóré, Abrahamé i re Ishak réléy néli ni beyak séluwé nesté ni, se farimé si réléy si néli Bersyeba, bóngo rtolén si pocé.
Nahoré ntu re gbu
20 Pocé ta rfabingo Abrahamé, “Fténom Nahoré i re ni dél pégelé Milka, nturi né re món séwalé ro. 21-23 Ta ténlóyé njé ngósno Use. Fténo né ngósnori né ta nte: Bus, re Kemuel, Kesed, Hazo, Pildasé, Yidlaf, re Betuel.” (Kemuelé njé Aramé ni papa i. Betuelé njé Ribka ni papa i). Milka i re Nahoré nturi séwalé né ta né. 24 Nahoré reni pégelé piara isó ngósno Reuma. I re mépin ta njé nturi né séfóté: Tebah, Gaham, Tahas, re Maaka.