Ishaké ntubé
21
1-2 Ta Jou Lahatala néjaji Sara né, i ni ngénngané re nwómo i, bóngo nfabarakat Sara se npe lapo. Nmawyóyé, ntu njé món i. 3 Bóngo Abrahamé nfangósno i Ishaké (ta ni ngale né ‘mlifé’). 4 Ta Ishaké ni umur ngané walé, bóngo Abrahamé ncunat i, ndéréré ta Jou Lahatala re nané i né. 5 Ta Ishaké ntubé né, Abrahamé ni umur taun witéncó.6 Pocé bóngo Sara néceg ta, “Jou Lahatala ta nfarén sogado kduké ntigé nje né, kséngé se kémlifé klé ya le. Farimé kyat ta rlongé né ma nase rcéngé ndimé. 7 Ta mnuwo i nte, kyat isó ma tis ta nécego Abrahamé ta amé bo kduké ntumamé! I re nlégaé, né ga télél be kmawyóyé ntu món isó!”
Sara nfaungé Hagar i re Ismaelé
8 Ishaké nbóng ta npélóyé se ni ngénngan ta bo rfaeo i susé né re nwómo i, bóngo Abrahamé npe rameang ta pélóyé. 9 Pocé Sara némnaw Ismaelé, Abraham i re Hagaré nturi njé, némongé ndé Ishak, 10 tabóngo nécegé Abrahamé, “Mfaungé keé béyaké njé, i re ntu njé. Mati na ga re tiso awé, ga anim sói néli ta mfatoléné né, béyaké njé ntu njé ma nase nduk ténténé nóté.”
11 Nlongé ta né, Abrahamé wlo mjakémé se nénuta, “Ismaelé ma ya ntig i, né ga bo kfaungé i né!”
12 Pocé ga Jou Lahatala nécego Abrahamé, “Wlemé njé mati nkangelang na. Ma muta be béyaké njé i re ntumi Ismaelé njé le na. Mdéréré le, ta Sara nécego awé né. Sababta ndé be lima ntim Ishak ni, awé nase mduké ntim re gbim ta félé ta dolo re kéjaji aw tatubé lima né. 13 Mayta masike fajé ma, Ismaelé njé antim i, se nase kpo ntu re gbu ta félé nóté, bo ndadi bangsa ta pélóyé.”
14 Ni tómémóné néya, Abrahamé nyó róri mnóm, re nwósé róri wóé po haiwan liko ta rpeé wóé góo lo, se nfapóo Hagaré. Pocé bóngo npo Ismael néli Hagar ni, bóngo nané si rfan si. Rfané se rliba-liba si rélówé pnuw ta po bótén ta néployé njé. Bótén ta njé ngósno Bersyeba.
15-16 Róri wóé né re tiso, bóngo Hagaré nénuta, “Ya wlegé néfeno pa, kémnawé ntigé njé bo nmóté né,” bóngo nfatoléné keé yomya njé nóp méungéné lo né, se nésalé i néli cuci, i lóo né dolo rtingés nuéncó. Bóngo ntolén nópé se ntangésé.
17 Pocé Jou Lahatala nlongé Ismaelé ntangésé né, bóngo ni nénan ta i po soroga nméitén yama, néceg faje, “Hagaré, wlemé njé kangelang sói? Ma mémtat na. Ntimé njé ni téngtangésé né, Jou Lahatala re nlongé. 18 Mélolét aw néli ntimé njé ni ro, bo mfamémuf i. Nase npe gélesó pa. Ya kéjaji awé, pote se néli, kpo i ntu re gbu sogado ndadi bangsa isó ta npélóyé.”
19 Pocé Jou Lahatala npe se télél be Hagaré némnaw sumu isó. Bóngo nfan néli se nwósé róri wóé góo njé, ga ndo ntu njé se ninémé.
20-21 Pocé Ismaelé nbóng ta npélóyé. Jou Lahatala ntébtubo re ndéréré i, bóngo ntolén i po bótén Paran po géwgów ta nélówé pnuwé. I ni yabé né ntingés be haiwané. Pocé bóngo ni mama nfafsóo i re mépin Mesir isó.
Abraham i re Kolano Abimeleké rfajaji
22-23 Tentara né riri kapala njé ngósno Pikolé. Nuéncó i re kolano Abimeleké rwóm néli Abraham ni se récego i faje, “Ya kémnawé mewé, Jou Lahatala ntébtubo re ndéréré mewé se sói ta mewé fpe né ndadi i ndimé. Amé re kuté mew fié, se kéroré bo mewé ma fut am fié, am re ntumam re gbumamé né ma fpe am gélesó na. Re masike bóténé nje ftolno dolo kyat wémwóm mewé ma, ffaménawé i fafié.”
24 Abrahamé ncónglo i, “Jo, ya ksasi, amé nase kpe mew gélesó pa.” 25 Pocé ga Abrahamé néceg faje, “Jou Kolano, masike ité re tfajaji nte, mayta nim béyaké né, re ryó keé mam sumu njé.”
26 Kolano njé ncónglo i, “Necé ya kuné pa, pai ta npe ta né. Mfabingo ya pa se tagare klongé nte.”
27 Pocé Abrahamé ndo kolano Abimeleké ni domba re sapi, bóngo re si dórén luwé né rfajaji, bo rfatut fafié. 28 Abrahamé ma néyó ni domba ntu pégelo séfité nóté se nfara si néli. 29 Bóngo kolano njé nutné i, “Mpe sói se mfara domba séfité nesté?”
30 Abrahamé ncónglo i, “Domba ntu séfité nesté bo kdo nim si. Myó si, bo muné ta sumu njé amé ta koléy i se amam i.”
31 Si dórén luwé rfajaji pocé, ta mulo ga géwgów ta né rfangósno Bersyeba, ta ni ngale sumu jaji. 32 Si rfajaji po Bersyeba rewóré, kolano Abimeleké i re Pikolé réléy néli riri pnuwé lo po bótén Filistiné.