Kejadian 20

Abrahamé nlólo ta ni pégelé njé i rémó i

Abrahamé i po Mamre bóngo nlué i néli po géwgów ta ngósno Negeb, bóngo ntolén i po pnuw Kades re pnuw Syure ni fapéluné. Rewóré ga nlué i nóté po pnuw Gerare. 2 Pocé Abrahamé nénuta, “Kyat pote faje, iga mgo wlori nik dél pégelé, kdodato be rayé róri i ga rpuné keé ya.” Se kyaté né rutné Sara, Abrahamé nécegé cogo rémó i. Kolano Gerare njé ngósno Abimelek nané rut Sara néli po i ni. Néli, mgo wlo i se bo néfsóo i.

3 Dorém esó kolano njé nbélisé. Po bélisé wlólo né, Jou Lahatala nwómo i se nécego i faje, “Awé myó ta riri pégelé se nase mmóté.”

4 Mayta kolano Abimeleké nébak Sara pafule, se néceg ta, “Jou, ya ksól pa! Kyó i né, ya kuné pa, ta Abrahamé ni pégelé i né. 5 Abrahamé i re Sara ro ta récegé rfarémóné. Se Ya ksól pa, néga bo mfamót ya re nik bala re kawasa né né!”

6 Pocé po ni bélisé wlólo né, Jou Lahatala ncónglo i, “Moléné, awé msól pa. Awé muné pa ta mulo ga myó i né. Ta ga mébak i pafule, sababta Ya ta kfaketé. Kfaketé né bo mati ma msól na. 7 Se nte kané awé, mfatebé mépiné njé po ni légaé ni. Ni légaé njé Ya nik nabi i, nénfawómo nik méitén po kyat ni. Se mfamul i nmulé, ni pégelé njé, taga nase néror po Ya ni, bo mati mmót na. Mayta iga melee i pa, nase fémnawé, aw re nim bala re kawasa né fmóté ndimé!”

8 I ni tómémóné né, kolano njé nkakémé ni kyaté-kyat ta pélóyé né lima ndimé, bóngo nfabingo si ta Jou nécego i né. Rlongé ta né, farimé si ta délé rémtaté.

9 Rewóré bóngo kolano njé nkakém Abrahamé se nécegé i, “Ya nak sélsól gélesó pa po aw ni, ga awé mpe sogado ya re nik bala re kawasa né bo kmóté ndimé né! Momongo awé ta msólé, nim pégelé i ga mécegé rémam i né! 10 Pe sói se mpe am fajé?”

11 Abrahamé ncónglo i, “Ta mulo ga kécegé rémag i né, ya kécogoma kyat pote faje rémtat Jou Lahatala pa, se iga mgo wlori nik pégelé njé kdodato nase rayé keé i ga rpuné keé ya. 12 Tagare fatuwé, ya klól pa, Sara nje ya rémag i. Amé, mam papa be isó, mayta nae ta mam mama, mayta amé kfafsóo. 13 Pocé fajé Jou Lahatala nané ya ksópén po nik papa ni umé lo né, se kfané klué ya po pnuw re pnuwé, pocé ya kécego nik pégelé, ‘Bo mmasié ya, téténfané ga kyaté rutné, mécegé ta ya rémam ta ténlóy ya.’”

14 Rméiténé rewóré, kolano Abimeleké nfamul Sara nmulé po Abraham ni, bóngo ndo i beyak món re mépin, re domba re sapi.

15 Pocé kolano njé nécego Abrahamé, “Bótén ta mémnaw néli né, necé ya kkuasa ndimé. Géwgów pua ta mgo wlemé, mtolén aw pocé fajé.”

16 Rewóré ta né, kolano njé nméiténé ndé Sara nóté, “Rémamé njé ya re kpo i pipis salaka caléncó, kpólésé nam móyé. Kpo i né bo kyat pote faje farimé runé ta awé msól pa.”

17-18 Ta kolano njé nyó Sara né, Jou Lahatala ntebo sélsól isó nóp farimé mépin ta po kadatongé lo né se rduké nturi pa. Nómésta kolano njé npólésé nó móyé né rewóré, ga ta ga Abrahamé nméiténé ndé Jou Lahatala, néroré bo mépin-mépiné né rduké nturi nmulé. Pocé bóngo Jou Lahatala nfafié Abimeleké i re ni pégelé, re ni beyak mépiné né se rduké nturi nmulé.