Jou Lahatala néslayé keé Pnuw Sodom re Pnuw Gomora
19
Ta Jou Lahatala ni nénan ta si yama soroga lo nesté reé Abrahamé né, rfan néli pnuw Sodomé. Rwóm néli né re mérimé. Loté néntolén po pnuwé ni ngówéné gbono lo. Pocé némnaw si ta nwosél néya se ntón si, bóngo nétig nóp bétbété lo né, se ncuba si, 2 bóngo nécego si faje, “Légaé ta mewé. Mew lima, bo ftilé po nik umé lo su, féus sóomi né bo fyénfé pocé su. Tomésu móné tómémóné, fpangén néya ga ffané.”Si ga rcónglo i faje, “Gélesó pa, masike kyénéf am po pnuwé njé ni yéfén lapo lo nte le.”
3 Mayta Loté wlo pa se nécegé si, “Matiné! Fyénéf po nik umé lo!” Loté nkabata be ta néi, sogado si ma rdéréré i néli ni umé lo.
Néli bóngo Loté nané ni kyaté né rfakéwelo róri mnóm re roti ta reni ragi pa. Rewóré bóngo rémnómé. 4 Rémnómé rewóré se réntolén si lesu, nópé ga món-món Sodomé né, ta móné mya sogado ta re rlégaé, rwóm lima se rfaljelé keé umé njé. 5 Bóngo farimé si rgélay néminé, “Loté, món ta rwóm péséwé né, si pocé pari tisé? Msópné si tóma pote am ni. Masike món si ma, bo kfayéulé kdé mam si se!”
6 Loté ncópén nétó, bóngo nakété keé ngówéné njé nmulé. Nétó, 7 bóngo nécegé si, “Anik dél ta mewé, ta mewé bo fpe né, necé ta délé lé. Ya kéror po mew ni, bo ma fpe fajé na. 8 Se ta fié né, flongé ta ya bo kécegé nte. Ya re ntig mépiné mya séluwé, si runé món pafule. Wóré ga kpo mewé, bo fpe si fawa le, né ndé be mewé. Kyaté nesté miné ga ndél pa bo fpe si fagélesó, sababta si po nik umé wlólo se ya mare kfaménawé si fafié.”
9 Kyat Sodomé né ga rcónglo Loté, “É! Mówés pocé! Awé kyat aw pote pa, nim kawasa sói se ga bo mfaméteglo amé né? Famla mówésé, mati na ga péséwé nte mduké namé né, kyaté nesté miné lébé rménóné.” Rewóré ta né bóngo rfaftófé Loté némin ngówéné lo, sogado ngówéné njé ma re bo némpekete.
10 Pocé ga Jou Lahatala ni nénané nesté rcélok Lot fao né se ratél i némin umé wlólo, ga rakété keé ngówéné njé nmulé. 11 Bóngo rfabyaf farimé kyaté-kyat ta si po tó néliké né mtóri, sogado nae ta résyap néli re lima ma rduk ngówéné njé pana.
12-13 Rewóré ta né, Jou ni nénan séluwé nesté récego Loté, “Kyat ta po pnuw Sodomé nte róri sélsólé né re pélóyé. Jou Lahatala re nuné. Kyat ta rfabingé né, réntangésé rgagélayé. Se amé nte Jou ta nané amé ktebé yama késlayé keé pnuwé nje né. Se kécego awé, antim pari, ménóy pari, mélófé pari, nim dél tuo iglé ta rtolén pote né ma, famla msopné si ndimé, bo flué mewé.”
14 Rewóré ta né, Loté nfané se nfakduké ndé ni ménoy séluwéa, bóngo nécego si, “Wyóy ta mewé, famla fsópén po pnuw ta njé i ni, sababta Jou Lahatala bo néslayé keé i.” Móné nesté rlongé ta né, ga récogoma Loté npe lagé ndé si.
15 Ta po lawé tagare nfaysayné i né, Jou Lahatala ni nénan séluwé nesté récegé Loté, “Pnuwé nje bo késlayé keé i ro se famla facuci bo ffówés mewé ro! Aw re nim pégelé re ntim mépiné séluwé nesté, fówésé, bo ma fmót na.”
16 Pocé ta Loté bo nówésé né, wlo njé ta délé nmétéwé bo nfané né, se bo neé ni umé njé dolo mamla pa. Se Jou Lahatala nmasié i, bóngo ni nénan séluwé nesté rétané po faori lo né se rcópné si po pnuwé njé ni. 17 Rfatebé si néli po pnuw wómo lo né, Jou Lahatala ni nénan isó nécego si nóté, “Fséreré ro bo ma fmót na re mati fégiwé mew némin tóumi lo na. Fséreré mew néya po métété lo né. Mati ffatóyné mew po lóté lo nóté na, bo luténé njé ma nyó mew na!”
18-19 Loté ga ncónglo si faje, “Alli, légaé ta mewé, mati fané amé kówés néya métété lo na. Légaé, nimi féyfié re pélóy po am ni né, re fgali amé se kmót pa. Mayta métété njé ga i ni lówé né! Mati na ga luténé njé nyó amé, se kwóm néli pafule re kmóté. 20 Pnuwé myaku ta njé li, kémnawé né dolo bo nélów pa. Fpo fié bo kówés am be pocé bo ksalamaté.”
21 Jou Lahatala ni nénané né rcónglo Loté, “Iya. Fajé ro. Pnuwé myaku ta njéi nase késlay i pa. 22 Se fówés pocé ro famlale! Sababta iga fwóm néli pafule, ya nase késlay Sodom pafule.” Necé ta mulo ga pnuwé njé rfangósno i Zoar (ta ni ngale né ‘myaku’).
23 Lot ecé re rwóm po Zoaré né, ngénngané njé ma ncó. 24 Télél be ga Jou Lahatala ntebo lutén re balerang yama soroga se ntéplor i nóp Sodom re Gomora né, 25 se pnuw séluwé nesté ma rémgesé ndimé. Kyat ta rtolén pocé né rmóté ndimé se géwgów néli re lima ma reni gélesó pana. Téntóném re ayé ma mges i ndimé. 26 Pocé fajé Loté ni dél pégelé ga négiwé i némin tou lo, se nbétérés i bóngo ndadi gasi i.
27 Ni tómémóné né, Abrahamé ncópén po umé lo, bóngo néléy po géwgów ta pepé i re Jou Lahatala rfaméiténé lo né. 28 Pocé fajé se néngóto nóp lóté Sodom re Gomora, némnaw méyas ta nénpiplé i néya lóté njé ni né, i ni méyasé né dolo ta rtapén kaléro né. 29 Jou Lahatala nfatélolomo I Abrahamé né, ta mulo n-gali Loté sogado nówésé né ma npe gélesó pa. Kéfétén Jou Lahatala néslayé keé pnuw Sodom re Gomora né nwóm ta lóo né.
Sogado reni suku Moab re Amoné né
30 Pocé Loté némtaté ntolén po Zoaré né, bóngo i re ntu mépin séluwé nesté rfané se rtolén si po métété lo, po fénóf isó ni. 31 Nganesó ntu mépin ta ténlóyé njé nécego fténo ta téwyóyé njé faje, “Rir papa nte re nlégaé. Taga po géwgów ta nje ma reni món pa ta bo réfsóo ité bo tduké nturé. 32 Se bo mati ngósnoré né myangés na, ta fié tfamse rir papa, ga tyénéfé tdé i bo tduké nturé.”
33 I ni dorémé njé bóngo rfainmo riri papa anggur sogado némse, bóngo ntu mépin ta ténlóyé njé ncung néminé se nyénéfé ndé ni papa. Ni papa ta délé némse se ntu njé nnyénéfé ndé i sogado npangéné né, ta délé nuné i pa.
34 Ni ta mélówé néya né, ntu ta ténlóyé njé nécego fténo ta téwyóy i njé, “Dorémé lo ya re kyénéf kdé i, rir papa. Se péséwé nte dorémé, tfamse i nóté bo awé ma myénéfé mdé i, bo it dórén luwé tduké nturé ndimé.” 35 I ni dorémé njé rfamsé i nóté, se ntu ta isó njé ma nyénéfé ndé ni papa. Loté ta délé némse sogado nuné pa ta ntu njé nyénéfé ndé i né.
36 Pocé bóngo yomya séluwé nesté rpe lapori, riri papa ro ta ntu si né. 37 Ta ténlóyé njé nmawyóyé, ntu njé món i, nfangósno i Moabé. Moabé ntu re gbu nópé né rfangósno kyat suku Moab si sogado ngénngan péséwé nte. 38 Ta téwyóyé njé nmawyóy nópé né, ntu njé ma món i nóté, bóngo nfangósno i Ben-Ami. I ntu re gbu nópé né, rfangósno kyat suku Amon si sogado ngénngan péséwé nte.