Kejadian 18

Jou Lahatala nécegé nmulé ta Abrahamé bo nduké ntu món isó

Jou Lahatala nwómo Abraham nuéncó nóté. Po ngénngan ta né, Abrahamé ntolén po ay-ay Mamre pópo lo. Ta ngénngané nfapéluné né, ntolén po ni tenda ni ngówéné gbono lo né. 2 Nfapangné béboko njé néya, télél be ga némnaw kyat sételé rwosél po ni tenda nétóo. Pocé bóngo Abrahamé ncéreré nétó nwetcé si se nétig nóp bétbété lo ncuba si. 3-5 Bóngo nécegé si, “É, légaé ta mewé, mewé re fwóm lima, se ma fliw ya na. Bo fmésié ya né, ftilé ya su. Lima bo ffatóyné mew pote po ayé nje pópo lo su, bo kané kyaté ryó nimi wóé bo féus sóomi né. Wóré ga, kfapelé nómi mnómé bo fémnómé. Fémnómé ntébéné ga masike ffalówé nimi fénfané né.”

Kyat nesté rcónglo i faje, “Iya. Pa na, ktilé su.” 6 Nlongé ta né, Abrahamé nbablé ncung némin ni tenda wlólo né, bóngo nécego Sara, “Famla méyó terigu ta fié né fakarong pusó, bo mpe rór roti.”

7 Néceg ta né rewóré, ncéreré néli ni haiwan ta npiara lo né, bóngo nyó sapi ntu isó ta nbékboké re nménénés fié, se npo ni beyak ta i pocé njé bóngo ni béyaké njé néwetés i se nfamósé i. 8 Rewóré ta néi, Abrahamé néyó sapi nó sus géo re sapi ta rérfamósé né se nut néli kyaté nesté ni bóngo nfapel nópé se rémnómé. Rémnómé né, i n-gawéne si pocé ay pópo lo né.

9-10 Si dórén telé nesté, isó njé Jou Lahatala. Pocé ga rutné Abrahamé, “Se ga nim pégelé Sara i pua?”

Abrahamé ncónglo si, “I ntémin tenda wlólo.”

Jou Lahatala néceg faje, “Taun ta tégbono i nje, Ya nase bo kwómé nóté. Pocé nim pégelé Sara nase nmawyóyé, ntu njé món i.”

Ta Jou nméiténé né, I re ni délé né rémnaw Sara pa, si rtékil i. Sara ntolén po ngówéné gbono, se nfaméylongé si. 11 Po ngénngan ta né, Abrahamé re nlégaé, Sara ma re npégelé, sogado Sara penyaket mépiné rémgo i pana. 12 Necé ta mulo ga, nlongé Jou nméiténé né, Sara némlif cuce. Po wlo wlólo né nénuta, “Beé! Ta re kpégelé ta ntei ga, bo kérakéné nik légaé, bo kduké ntigé nóté né? Nik légaé njé ma re nlégaé!”

13 Pocé bóngo Jou Lahatala nutné, “Abrahamé, pe sói se ga Sara némlifé? Sara ga ndélé pa né? Cogo re npégelé se nase nduké ntu pa? 14 Nuén fisé bo Jou Lahatala re nfaréné ga ndadi i pa né? Ta dolo Ya re kéceg péséwé né, taun ta tégbono i nje, ya nase kwóm lima nóté. Po ngénngan ta néi Sara nase nmawyóyé, ntu njé món i.”

15 Sara nlongé ta né bóngo némtaté, se nlólo ta némlif pa, néceg faje, “Ya kémlif pa!”

Jou Lahatala ga ncónglo Sara, “Awé mlólé, péséwé mémlifé!”

Abrahamé néror po Jou Lahatala ni, mati néslay Sodom na

16 Rewóré ta né, Jou Lahatala I re ni dél séluwé nesté bo rfan si, bóngo Abrahamé nfatebé si néli sogado rémnaw nóp lóté Sodom. 17 Pocé Jou nénuta po wlo wlólo, “Ta bo késlayé keé Sodomé nte, bo kfabingo Abraham su pari fawa? 18 Sedangta Abrahamé nte, ntu re gbu né nase rdadi bangsa isó ta npélóy re nkuaté. I mdio be barakat ta kdo i ntu re gbu né se lima, farimé suku po langét pópo nje ma bo réroro Ya barakat. 19 I ro ta Ya kpili i bo nfasodoto ntu re gbu né bo rdéréré Ya re rpe ta fié re ta métegélé né. Rdéréré Ya né, Ya nase kpo si ta kéjaji i né. Se ta mulo né, Ya mare kfabingo i su sói ta bo kpe.”

20 Se pocé bóngo Jou Lahatala nfabingo keé Abrahamé, néceg faje, “Kyat Sodom re Gomora ntópé nte, reni kyat ta rfabingé si, rpe ta lé ndimé, róri sélsólé né félé. Ta rfabingo Ya né, sogado rtangésé né rgagélayé. 21 Necé ta mulo ga Ya bo ktebé nópé nte, bo kémnawé fatuw pari tisé.”

22 Pocé bóngo kyat séluw ta si re Jou Lahatala nesté rfalów si nóp Sodomé. Jou Lahatala ga I re Abrahamé lesu. 23 Pocé bóngo Abrahamé nfarakné i néli po Jou Lahatala ni, bóngo nutné I, “Jou, ta bo méslayé keé Sodomé nte, ma ga reni kyat ta wlori métegél po Aw ni. Né nase méslayé keé si nuéncó le re kyat ta rpe sélsólé né? 24 Adeade po pnuwé wlólo né reni kyat yófélim ta wlori métegél po Aw ni, pnuwé njé mfasalamat i pa? Se méslayé keé i le? 25 Alli, Jou, iga bo mpuné keé si ndimé né, necé mfasólé keé kyat ta wlori métegélé né nuéncó le re kyat ta róri sélsól félé né. Awé hakim po bóténé lóyé njé ni ndimé se Awé mpe be ta métegélé. Nuén fisé bo mpuné keé kyat ta re róri sélsól gélesó pa né!”

26 Pocé ga Jou Lahatala nécegé Abrahamé, “Tisé, iga kduké kyat yófélim ta wlori métegél po Ya ni po pnuw Sodom re Gomora, nase késlay i pa, pnuwé njé, sababta si dórén yófélimé nesté.”

27 Abrahamé nécegé nóté, “Jou, ya kyat ya lima bétbété lo se renik kawasa esó pa ta bo kméitén kdé Awé. Mayta, dolo kmóé ya pa, kéroré bo kméiténé kdé Aw facuci nóté. 28 Ma ga mduké kyat yófélim pa, ga masolo kyat yóféfót re sélimé le. Nase bo méslayé keé pnuwé njé ndimé, Jou? Masolo nkurang be sélimé ga?”

Jou ncónglo i faje, “Bo kduké kyat yóféfót re sélim ta wlori métegél po Ya ni ma nase késlay i pa sababta si dórén yóféfót re sélimé nesté.”

29 Abrahamé nécegé nóté, “Fanfawa bo masolo kyat yóféfóté le?”

Jou ncónglo i faje, “Iga fajé, Ya nase késlayé keé i pa, pnuwé njé, sababta kyat yóféfóté nesté.”

30 Pocé Abraham nméiténé nóté, “Jou, ma msawan na, bo kméiténé nóté. Fanfawa adeade masolo kyat fayófételé le?”

Jou ncónglo i, “Iga kduké kyat yófételé, nase kpe pa sababta kyat yófételé nesté.”

31 Rewóré ta né Abrahamé nméiténé nóté, “Jou, dolo kmóé ya pa é? Kéror po Aw ni, bo któmé nik méiténé nte nóté. Adeade masolo reni kyat yóféluwé le ga fawa?”

Jou ncónglo i, “Iga kduk kyat yóféluw ta wlori métegél po Ya ni, nase késlay i pa sababta kyat yóféluwé nesté.”

32 Ni wóré nópé, Abrahamé néceg faje, “Jou! Ma msawan na. Ya masolo bo kméitén nuéncó ta nte i le. Fawa iga masolo reni kyat yófésó le?” Jou ncónglo i faje, “Iga reni kyat yófésó ta wlori métegél po Ya ni, Ya nase késlay i pa, sababta kyat yófésó nesté.” 33 Nméiténé ndé Abrahamé né rewóré, Jou nfan I, Abrahamé ga néléy po ni tenda lo.