Abram ecé rcunat si bo rfatuwo riri jaji po Jou ni
17
Abramé ni umur taun nuén yófépopét re popété né, Jou Lahatala nwómo i se nécego i fanfaje, “Ya, Jou Lahatala ta nik kawasa né ta délé pélóyé. Se mdéréré ya, mpe be ta métegélé, bo renam sélsól na. 2 Abramé, nte Ya re awé bo tpe jaji. Ya ma nase bo kpo ntim re gbim fafélé.”3 Nlongé ta né, bóngo Abramé néspók nópé se ncuba Jou Lahatala. Pocé, Jou nméiténé nóté, 4 “Ta nte i jaji ta bo kpe po aw ni né: Ya kéjaji, antim re gbimé né nase ndadi suku ta félé. Bo muné fatuw ta bo ndadi i né, 5 ya bo kiwéné keé ngósnomé né. Nte awé ngósnomé né Abram pana, mayta Abrahamé sababta awé bo mdadi bangsa isó riri délut awé.” (Ngósén ‘Abrahamé’ ni ngale né, ‘délut po suku ta félé’). 6 Ya nase kpo ntim re gbimé né fafélé, se rdadi suku ta félé, si ma nase reni ta bo rdadi kolano. 7 Ya nase kdadi Jou po aw re ntim re gbimé nesté ni. Nik jaji ta nje nase ndadi i po aw ni le pa, mayta sogado ntim re gbimé nesté ni nóté, sogado fajé néli le. 8 Fajé nóté, bótén Kanaan ta mewé ftolno nte, masike kyaté riri bótén i ma, Ya kéjaji, nase kdo aw re ntim re gbimé né nimi i ndimé sogado fajé néli le. Ya ma nase kdadi ntim re gbimé né riri Jou Ya.
9-10 Jou Lahatala ntómé ni méitén po Abraham ni nóté, “Bo tuné ta fatuwé Ya re mewé tfajaji né, mewé mare fdéréré ta bo kané mewé nte: Aw re ntim re gbim ta móné né, mare fsunat mewé ndimé. Iga re fsunaté mewé né taga tuné ta fatuw-fatuwé ta mewé re fdéréré Ya. Necé mew ta nte le pa, mayta sogado ntim re gbim ta isémé né. 11-12 Farimé món po nim umé wlólo né, iga riri umuré né re ngané walé, tabóngo fsunat si---Ntim re nim beyak ta rtub po nim tenda lo sogado nim beyak ta mgon si né ma, msunat si ndimé. Sunat ta né dolo faféyal esó ta Ya re mewé re tfajaji. 13 Kyat món farimé mare fsunat si, necé ndadi faféyal esó po nimi diri lo né, nfaftulo ta Ya re mewé, rir jaji né mwetés pa sogado fajé néli le. 14 Món pai ta rcunat i pa, nejé Ya kfayal i pa, sababta nétané Ya nik jaji né pa.”
15-16 Jou Lahatala ntómé ni méiténé né nóté, “Abrahamé, kécego awé, nim pégelé njé ma mkakmé i Sarai nóté na, mayta nte ro mkakmé i ‘Sara’. Sababta Ya nase kpo i barakaté se npe lapo, nmawyóyé né ntu njé món i. Ya nase kfabarakat Sara nóté, se nase ntu re gbu né ndadi suku ta félé, sogado reni ta nase rdadi kolano.” (Ngósén Sara ni ngale né kolano ni ntu mépiné).
17 Abrahamé nlongé ta né, bóngo néspók nópé se ncuba Jou. Pocé ga nénuta po wlo wlólo, “Beé, nte nik umuré re taun nuén witéncó, Sara ma re ni umur taun nuén yófépopét óro. Néga bo kduké ntumam fanfawa?”
18 Pocé Abrahamé néceg faje, “Jou Lahatala, wóré, barakat ta méjaji ya bo mtebo po antigé njé ni né, mpo be po Ismaelé ni le, ntig ta ni mama nésé i njé.”
19 Jou Lahatala ga ncónglo i, “Tisé, i pa. Nim pégelé Sara ro ta nase nmawyóyé né ntu njé món i, se mfangósno i Ishaké. Nik jaji po aw ni né nase yomya ta njé ta ntebo po gbim re nim wes re félbawé né ni sogado ga fajé néli le. 20 Mayta, ta méroré bo kpo barakat po Ismael ni né ma, Ya re klongé. Se Ya nase bo kpo i barakaté nóté, re kpo ntu re gbu fafélé. Ntu né nase rdadi kolano yófésó re séluwé, re ntu re gbu ta ntebé nópé né nase bangsa isó ta npélóyé. 21 Mayta Ya nik jaji ta kécego awé né ga nase ktebo be po ntim Ishak ni. Ntim ta njé, góli taun nuéncó, Sara nase nmawyóyé i.” 22 Jou Lahatala nméiténé rewóré, bóngo nfané.
23 Po ngénngan ta né óro, bóngo Abrahamé ndéréré ta Jou Lahatala nané i né, se ncunate ntu Ismaelé re món farimé ta po ni umé wlólo né. Ni béyaké né nturi ta rtub po ni umé wlólo né, sogado ni beyak ta n-gon si né ma, ncunat si ndimé. 24 Ta Abrahamé rcunat i né, ni umur taun nuén yófépopét re popété, 25 i ntu Ismaelé ga ni umur taun nuén yófésó re telé. 26-27 Abrahamé i re ntu Ismael, re ni beyak móné né farimé rcunat si ngané esó ta néi le.