Kejadian 16

Jou nfabarakat Hagar i re Ismaelé

1-3 Abramé ntolén po Kanaané né remnuwo taun nuén yófésó. I re ni pégelé Sarai renturi pa. Mayta Sarai reni beyak isó, kyat Mesir i ngósno Hagaré.

Pocé bóngo Sarai nécego Abramé, “Jou Lahatala npo ya fié pa bo re ntigé né. Se ta fié, myénéfé mdé nik béyaké njé. Bo iga fduké ntumi, wóré ga ya kéyó i.” Ta Sarai nécego i né, Abramé ma wlo. Pocé bóngo Sarai npo Hagar néli Abram ni, bo npeé ni pégelé i nóté. 4 Se Abramé nyénéfé ndé Hagaré, bóngo mépiné njé npe lapo.

Hagaré nuné ta re npe lapo né, tabóngo wlo njé npélóyé se nétén Sarai pana. 5 Pocé bóngo Sarai nécego Abramé, “Ya re kpo nik béyaké njé po aw ni, mayta nuné ta re npe lapo nte, tabóngo nétén ya pana. Necé awé ta msólé! Wóré ga Jou Lahatala ta nfarén it i dórén luwé.”

6 Abramé ncónglo i, “Hagaré njé, awé nim beyak i, se awé ta mkawasa i. Mpe i fawa le ma, ndé be po awé wlemé ni déréro.” Pocé bóngo Sarai nfasloé Hagaré re nfasoyabé i né ta délé météwé, sogado Hagaré nówés i.

7 Hagaré nówés i né nélówé pnuwé, nwóm po wóé bibél isó, po yéfén ta ntélmé néli pnuw Sur. Pocé Jou Lahatala ni nénan isó yama soroga nwómo i. 8 Bóngo nutné i, “Hagaré, Sarai ni beyak ta awé, nte aw pua lima? Bo mfan aw pua?”

Hagaré ncónglo i, “Nik nyonya njé Sarai nut ya lé se kówésé.”

9 Pocé bóngo Jou ni nénané njé néceg faje, “Méléy néli i ni, bo mpe ni yabé né nmulé. Pua ta nané awé né, masike météwé ma, mpe le. 10 Ya nase bo kpo awé ntim re gbim ta félé, sogado reni kyat isó pa ta nétén si né néfené. 11 Awé nte re mpe lapomé. Mawyóyé né, ntimé njé nase món i. Se kécego awé bo mfangósno i Ismaelé, sababta Jou Lahatala re nuné re nlongé ta nim nyonya njé nut aw lé né. (Ismaelé ni ngale né ‘Jou Lahatala nlongé’) 12 Mayta ntimé njé nase nmakotale, kfatailo i dolo keledai ta nmasésró né, nase nfanpuné ndé kyat pai le. Tagare kyat pai le ma nase rfanpuné rdé i. I nase ntolén i nélówo kmó re rémó.”

13 Pocé bóngo Hagaré néceg faje, “Alli, ya nte re kémnaw Jou, Jou ta nfaménawé Ya njé.” Bóngo nkakmé Jou “El-Roi” ta ni ngale Jou ta nfaménawé Ya. 14 Necé ta mulo ga kyaté né rfangósno wóé njé, “Wóé Laha Roi”, ta ni ngale né, “Jou ta nhidup, ta nfaménawé ya, I nó wóé i”. Wóé ta njé nte re ndadi sumu i. I po pnuw Kades re pnuw Beredé ni fapéluné.

15-16 Pocé se néli, sogado Abramé ni umur taun nuén yóféwal re wonémé, bóngo Hagaré nmawyóyé. Ntu njé món i, bóngo ni papa Abramé nfangósno i Ismaelé.