Kejadian 15

Jou Lahatala I re Abramé rfajaji

Rewóré ta né, télél be Abramé dolo nbélisé, némnaw Jou Lahatala nwómo i, se nécego i fanfaje, “Abramé, anim fafaketé né Ya, se mati mémtat na. Ya ma nase kpo aw ta fié né félé sababta awé mdéréré Ya.”

2-3 Abramé ga ncónglo Jou, “Jou Lahatala, awé ta mkawasa ndimé. Mayta fawa? Ya nte re ntig pa se pote se néli bo kmóté, sói ta méjaji bo mpo ya né nase mnapo be nik beyak Eliezeré, kyat Damsyiké njé.”

4 Pocé bóngo Jou nméiténé nóté, “Eliezer pa ta bo mnapo i né, mayta antim tuo i ro ta nase bo nduké.” 5 Jou Lahatala nut Abram nétó néliké, bóngo nécegé i faje, “Mékngól néya langété lo bo métén ngó né. I féléo né nase météné méfen pa. Ntim re gbimé né, féléori né ma nase ta dolo ngó né.”

6 Abramé nlongé ta né, tabóngo ndélé ta fatuwé. Jou Lahatala nuné ta Abramé fatuw ta ndélé, se Abramé ncung tététén po Jou ni ta i kyat ta wlo métegél po I ni.

7 Rewóré ta né, Jou nméiténé nóté, néceg faje, “Ya Jou Lahatala. Ta aw po pnuw Ur, po bótén Babilonia né, Ya ta kané awé mlué aw lima se ktébtubo re kdéréré aw lima. Ta mulo kané aw lima né, bo kdo nim bótén ta nje, bo ndadi anim i.”

8 Pocé bóngo Abramé néceg faje, “Jou Lahatala, Awé ta mkawasa. Se ta mécegé bo mdo nik bóténé nje né, nase bo kuné fawa ta bo ndadi anik i né?”

9 Jou ncónglo i, “Bo muné ta bóténé njé bo ndadi anim i né, mpe fanfaje: Méyó sapi pégelo faisó, kabén pégelo faisó, re kabén món faisó, ta riri umuré né taga taun nuén telé. Fajé nóté, myó mané buté faisó, re mané pombo ta mya faisó. Farimé mut lima bo mpo Ya.”

10 Pocé bóngo Abramé nyó haiwan-haiwan ta Jou nécegé né, se npe nóp Jou usno lo. Sapi re kabéné né nfaskasé abén luwé ndimé, nfarén nae ta géwgówé. Mané né ga, néwétés si, mayta nfacomné si, nfapel si nópé né. 11 Nópé ga mané ta rénó haiwané né, réting nópé bo ró haiwan wóngto né, se Abramé nfausé si.

12 Ta ngénngané njé re bo ncep nópé né, Abramé nyénéfé némtolé, se nuné ni diri pa. Télél be ga nbósémé né némtaté sogado dolo bo nfakduko wlo pa. 13 Jou nécegé i faje, “Kfabingo awé ta fatuw ta nase bo ndadi po ntim re gbimé, nim wes re félbawé né ni: Si nase rtolén si po ta riri bóténé lo. Nase kolano ta po bangsa ta njé i npeé keé ni beyak si. Yabé ta réfen pa ma nase rkotalé si rpe re rfaspésé si, i mnuwo né taun nuén witén fóté. 14 Mayta bangsa ta njé, nase kfasólé keé si. Se antim re gbim, nim wes re félbawé né rcópén po bótén ta njé, bo réléy lima pote. Réléy lima né, nase ruté riri wódólé né cuce i pa.

15 Abramé, awé ga nase nim umuré né mlongé re mmót po féyfié wlólo. 16 Pote se néli sogado re ntim, re gbim, re wes sogado renim félbawé, ga taga nase kécegé, ‘Nte kyat Amori ta rtolén pote, róri sélsólé né re nbaké se bo kfasólé keé si óro.’ Pocé nase kélee ntimé re gbim re nim wes re félbawé né lima bo ryó keé riri bóténé nje nmulé.”

17 Ta ngénngané njé re ncep nópé se re dorémé né, Abramé néngóto néli po haiwan wóngto ta nfatwetcé se nfapel nópé né, télél be némnaw lutén isó ta nmaméyas re obor pusó nléblobé rwetco po haiwan wóngto né ni fapélun néli. 18 Pocé bóngo Jou Lahatala néjaji Abramé, néceg faje, “Bótén ta njé i, Ya kéjaji nase bo kdo ntim re gbimé né riri i ndimé, i mlóngo né po wóé Mesiré, sogado po wóé ta pélóy ta ngósno Efrat. 19 Nte kyat nésé ta rtolén pocé fajé né, suku Keni, Kenase, re Kadmoné, 20 suku Heté, Ferise, re Refaimé, 21 suku Amori, Kanaané, Girgasi, re Yebusé né. Mayta pote se néli nase ndadi ménimi i ndimé.”