Loté rgó i ga Abramé nyó i nmulé
14
1-4 Lóté Sodom reni pnuw sélimé: Sodomé, Gomora, Adma, Zeboim re Bela.a Pnuw sélim ta nesté nae ta re riri kolano, mayta pnuw Elamé ni kolano re nkuasa si i mnuwo taun nuén yófésó re luwé wlólo. Mgo po taun ta yófésó re telé né, bóngo wlori pana bo nkawasa si se rlongé i pana. Pocé bóngo riri kolano né rfasogaro si réyówé yéféné bo rwosélé rkumélé se bo rfajólo riri tentara né po lóté Sidimé, bo rtón kolano Elam i re ni tentara né bo rfangtingsé si pocé. (Nte lóté ta njé i re ndadi talaga i, ni wóé ma myaséné.)5 Re nfano i taun yófésó re fóté, kolano Elamé nyangété ni dél kolano sétel ta lima pnuw Babilonia, Elasar, re Goyim.b Si dórén fóté re riri tentara nesté rfajólo si lima bóngo rfané rfangtingsé kyaté-kyat suku Refaim po pnuw Asyterot-Karnaimé se rfalé si. Rewóré, rfan po pnuw Hamé se rfangtingsé kyat suku Zuzimé né. Rewóré, rfan po Syawe-Kiryataim se rfangtingsé kyat suku Emimé né. Kyat ta né ma réfen si pa. 6 Rewóré ga rfan po métét ta ngósno Seir se rfangtingésé rdé kyat suku Hori ta pocé né. Kyat Hori né rówés si se rfajalé si sogado po El-Paran, ta nérakno bótén ta néployé njéc ni wómo. 7 Rewóré ta néi, ga rpólén si néli En-Mispaté, ta nte re rfangósno Kades. Pocé si rfangtingsé suku Amaleké né se ryó keé riri bóténé né. Néli, Hazezon-Tamaré, suku Amori né ma réfen si pa.
Pocé ta bo réléy si po riri pnuwé lo né, 8 kolano sélimé né re rtón si, rfaréné riri tentara né po lóté Sidimé. 9 Kolano séfót re riri tentara né rwóm po lóté Sidimé, rfakduk re kolano sélimé nesté re riri tentara né tabóngo rfangtingésé. 10 Nópé ga kolano Sodom re Gomora re riri tentara né réfen si pa se rówés si. Po lóté ta njéi ni né, reni lop félé ta i wlólo né reni gétgité, se tentara Sodom re Gomora né rówésé né ga iglé rémnap si nóp lopé né wlólo. Iglé né ga rfalów si se rówés si néya métété lo. 11 Kolano séfót re riri tentara né ga si néli pnuw Sodom re Gomora se rimété keé riri wódól re róri mnóm ta pocé né se ruté keé. 12 Abramé fténo ntu Lot ta ntolén po Sodomé ma rówsé keé i nóté, re ni wódól nuéncó le.
13 Tentara Sodom re Gomora rówésé né, isó ga nfalów i néli Abramd ni se nfabingo i, “É, fténomé ntu Loté, re rówsé keé i!” Ngénngan ta né, Abramé ntolén po ay pópo lo, kyat Amori isó ngósno Mamre góo lo. (Mamre njé i re fténo Eskal re Anere, Abramé ni faljil si). 14 Abramé nlongé ta Loté rówsé i né, bóngo nfajólo ni beyake po ni umé lo ta rtingés fié né, féléori né witéntel re yófésó re séwalé. Bóngo re rfajalé kolano séfót re riri tentara né sogado rwóm po pnuw Dané. 15 Rwóm néli, Abramé nfara ni tentara né géwgów esó-esó, se dorém ta néi ro, rfangtingsé kolano séfóté nesté re riri tentara né. Rfajalé si sogado rwóm po pnuw Hoba. (Hoba njé po pnuw Damsyik néyao.)f 16 Sói néli ta kolano séfóté nesté ryó né, Abramé nyó keé nmulé. Loté ma nyó keé i re ni wódólé né nuéncó le. Fajé nóté, mépin re kyat ta rówsé si né ma Abramé nyó keé si nmulé.
Kolano Melkisedeke néror Abramé ni barakat po Jou ni
17 Abramé i re ni béyaké né rfangtingsé kolano séfóté né riri tentara né rewóré, bóngo réléy si. Pocé ga kolano Sodomé nfané nwetcé i po lóté Syawe. (Lóté ta njé rengósno ésó nóté, “Kolano njé ni Lóté”).
18 Kolano ta i po pnuw Salemé njé ngósno Melkisedek. I imam i, i ni yabé né nfawómo kyaté né riri réror, re ntapéné riri sadaka po Jou Lahatala ni, Jou né I ro, reni ta nésé pana. Abramé néléy lima né, kolano Melkisedeké ma nfan néli nwetcé i, nuté nó roti re angguré. 19 Néli bóngo néror Abramé ni barakaté, néceg faje, “Jou Lahatala, Awé ro, reni isó nésé pana ta néliw Awé. Aw ta mtulada langét re bétbété. Kéroré bo mfabarakat Abram! 20 Ktail Awé, Jou, Awé ro ta mpe sogado kyat ta riri lé Abramé né ma réfen i pa.” Rewóré ta né, Abramé nfajólo lima ndimé wódól ta nyó né se npe ténten abén yófésó. Ténten esó nyó se npo néli kolano Melkisadek ni.
21 Ténten abén popété né ga Abramé bo nfamul néli po kolano Sodomé njé ni. Pocé bóngo kolano Sodomé njé nécegé i, “Wóré, aniké kyat Sodomé né riri wódólé né, ma mfamul nóté na, myó nimé ro. Asal ta mfamul be niké kyaté-kyaté né.”
22 Mayta Abramé ncónglo i, “Matiné, ya kyó gélesó pa. Jou Lahatala ta ntulada langét re bétbété njé, I óro, ta isó bisa nliw I pa. Ya re kéjaji po I usno lo: 23 Masike lawé wétwetco faesó pari, tarupa ni wólé faspalé ma, nase kyó pa. Kdodato kyó nim fagélesó ga méceg ta mulo ya renik renak félé né, béréga awé.
24 Maduga mnóm ta niké kyaté né reró né, kfamul pa. Fajé nóté, nik faljil Aner, Eskol re Mamre riri téntené mare kpo si, rgali ya kfangtingésé se.”