Abramé i re Loté rfaeé
13
Pocé bóngo Abramé i re ni dél pégelé re Loté reé bótén Mesiré, bóngo rfan si néya bótén Kanaané ni wómo néli ta ngósno Negeb. Riri sói néli né ma rfauto ndimé. 2 Abramé reni renó félé nte. Reni domba, kabéné, sapi, bóngo salaka re guraci.3 Si po Negeb se rfané né rénfawluwo si sogado rérakén néli pnuw Betel. Rwóm po pnuw Betel re pnuw Ai ni fapéluné, po géwgów ta tatubé lima ta si ryénfo lo né. 4 Géwgów ta né ngané fis lima re nfajólo lóyé nfarén néya nfakéwelo géwgów ta nfapélóy Jou Lahatala ngósno. Rwóm pocé bóngo Abramé ncuba re nfapélóy Jou Lahatala ngósno nóté.
5 Loté ndé Abramé né, i ma reni domba, kabén, sapi, re ni beyak félé. 6 Abramé i re Loté bo rfatolné si pocé fajé né mnuwé lesu, mayta riri haiwané né félé se bétbét ta pocé ni gémuné né nase nbung si pa. 7 Sogado Abramé ni kyaté né, si re Loté ni kyaté né rfakotalé. (Waktu ta né, kyat Kanaan re kyat Ferise né rtolén po bótén ta njéi ni lesu.)
8 Pocé bóngo Abramé nécegé Loté, “Ité nte isó nésé it pa. Se dolo lé bo animé kyaté né, si re niké kyaté né, ga rfakotalé né. 9 Bóténé nje npélóyé, se mati tfafélae i na. Ta fié né, méyówé nim géwgówé bo mtolno. Bo awé mtolén faspal balété, ya ga ktolén faspal wónéyé. Bo awé mtolén faspal wónéyé, ya nase ktolén faspal balété.”
10 Pocé Loté néngóto bóténé njé néli re lima, se némnaw nóp lóté Yordané, bóngo néceg ta, “É, lóté ta njé, ga i ni birahi né, ni wóé ma félé, dolo Jou Lahatala nó bét i! Taga, dolo bétbét Mesiré ta nérakén pnuw Zoaré né.” (Lóté ta njé reni pnuw Sodom re pnuw Gomora. Pnuw ta né, Jou Lahatala néslay pafule). 11 Pocé bóngo re Loté npili farimé lóté Yordané né, bóngo nfané nlué i néli faspal ngancóo po lóté njé ni. Pocé fajé si dórén luwé rfaeé se nae ta rtolén si. 12 Abramé ntolén i pocé bótén Kanaané ro, Loté ga ntolén i po lóté Yordané, nfawoslé ni tenda né nérakno pnuw Sodomé. 13 Pnuw Sodomé njé, ni kyaté né, kyat léo bóto. Róri sélsól po Jou Lahatala ni ma félé.
Abramé nlué i néli pnuw Hebroné
14 Pocé Loté re nfan i né, bóngo Jou Lahatala nécego Abramé, “Po géwgów ta mwoslo lo né, méngóto néli re lima fafié! 15 Bótén ta mémnaw i njé, nase kdo aw re ntim re gbimé né nimi i ndimé, sogado fajé néli le. 16 Ya ma nase kpo awé ntim re gbim fafélé, sogado métén si ma méfen pa. Iga métén bétbété ni ngai né méfené, necé ga nase météné ntim re gbimé né ma méfené. 17 Se nte kané awé mfané bo méjel bótén ta nje, sababta kdo nimi i.”
18 Rewóré ta né, bóngo Abramé nlué ni tenda njé po ay-ay ta ngósno Mamre, nérakéné pnuw Hebron, se ntolén i pocé. Bóngo Abramé nfajólo lóy lima, nfarén néya, nfakéwelo géwgów ta bo nfapélóy Jou Lahatala ngósno.