Jou Lahatala nkakém Abramé
12
JOU Lahatala nméiténé ndé Abramé, “Abramé, kané awé bo mlué awé. Meé keé bótén ta nje, mfatoléné nim déluté, fténom re rémamé né, bo mfan aw po bótén esó ni ta bo kfaftulo awé. 2 Ya nase kpo ntim re gbim fafélé sogado ndadi bangsa isó ta npélóyé re kfabarakat awé sogado farimé kyaté rfayal ngósnomé né. Awé nase mdadi barakat po kyat ta félé. 3 Kyaté-kyat pai le ta rfabarakat awé, Ya nase kfabarakat si. Mayta pai ta nfakangelang awé né ga, Ya ma nase kfakangelang i. I mdio be mewé, nase farimé suku po langét pópo nje ni ma rduk barakat lima Ya ni.”a
4-5 Pocé bóngo Abramé npe ta dolo Jou Lahatala nécego i né. Nfané, neé pnuw Harané, i re ni dél pégelé Sarai, re Loté, fténo ntu njé. Abramé ni haréta re beyak re haiwan ta nduk po pnuw Haran né ma nuté ndimé. Ta Abramé nlué i né, ni umur taun nuén yóféfit re limé.
Rwóm néli po bótén Kanaané, 6 bóngo rfalów po géwgów isó ta nérakéné pnuw Sikhemé, ngósno Moré. Po géwgów ta néi, reni ay aysó, kyat Kanaan ta si po Sikhemé né rénjaréjeré pocé. (Ta si rwóm pocé né, kyat Kanaané né rtolén po bótén ta njé i ni lesu).
7 Pocé Jou Lahatala nwómo Abram néli se nécego i, “Bótén ta nje i óro ta Ya kéjaji awé bo kdo ntim re gbimé né riri i.” Abramé nlongé ta néi, bóngo nfajólo lóy lima, nfarén néya, nfakéwelo géwgów bo nfapélóy Jou ngósno pocé.
8 Pocé bóngo rfané nóté, rdé si néli po pnuw Betelé ni faspal ngancóo, po bétbét ta nmamététi lo né, bóngo rfawoslé riri tenda né po pnuw Betel re pnuw Ai ni fapéluné. Pnuw Betel i po faspal ngancepo, pnuw Ai ga po faspal ngancóo. Pocé fajé ma Abramé nfajólo lóyé nóté, nfarén néya, nfakéwelo géwgów se nfapélóy Jou Lahatala ngósno pocé. 9 Rewóré ta néi, rédirké si nóté, rénlué si né sogado rwóm po bótén Kanaané ni wómo néli ta ngósno Negeb.
Abram nfan po Mesiré
10 Abram ecé bo rtolén si pocé bótén Kanaané lesu, mayta néli lima reni mnóm pana se kyaté né nfatélóto i. Pocé bóngo rfané rfalów si néli sogado rwóm po bótén Mesiré, bo rtolén pocé. Sogado po Kanaan reni mnómé nóté ga nase rpólén si. 11 Pocé ta si re bo rcung po bótén Mesiré né, bóngo Abramé nécegé ni pégelé njé, “Sarai, awé nte, mbirahi. 12 It néli Mesiré nte, bo kyaté né rémnaw awé, nase mgo wlori awé. Iga runé ta ya nik pégelé awé, kémtat be rayé keé awé, ya ga rpuné keé ya. 13 Se ta fié né mécegé cogo rémag awé, bo si rut ya fié. Ta féléo i nte ndé be po aw ni, bo ma rpun ya na.”
14 Abramé i re Sarai re si po bótén Mesiré né, kyat Mesiré né rémnaw Sarai bóngo réceg faje, “Alli! Mépiné njé ga i ni birahi né!” 15 Pocé fajé kolano njé ni kyat ta pélóyé né rémnaw i, bóngo rfabingo kolano njé, “Jou Kolano, reni mépin isó nbirahi!” Pocé bóngo rut Sarai néli kolano njé ni kadatongé lo. 16 Néli, kolano njé némnaw Sarai, bóngo mgo wlo i, se nut Abram fié, npo i domba, kabéné, sapi, keledai, unta re beyak món re mépiné.
17 Ta kolano njé re nyó Sarai né, bóngo Jou Lahatala npo penyaket-penyaket ta météwé, mgo kolano njé re farimé kyat ta si po kadatongé wlólo né. 18-19 Pocé bóngo kolano njé nkakém Abramé se nécegé i, “Awé nte ga mépino ya né! Mpe sói se ga méceg pa, ta Sarai njé anim pégelé i né? Awé ga mécegé cogo rémam i se sogado kéfsóo i né! Wóré! Nim pégelé ta nje, méyó i ro, bo ffan mewé!” 20 Rewóré ta néi, bóngo kolano njé nané ni kyat ta pocé né bo rcópné Abramé i re ni pégelé njé po pnuw ta njéi ni. Pocé ta rfatebé keé si, sói néli ta si riri né rfauto ndimé.